1 አዳረ ጌተትያ ታማነ ላኤንꬆ አግናን ታማነ ሄዘንꬆ ጋላሳይ ጋኬዳ። ሄ ጋላሳይ፥ ካቲ ኮይሮ ከሴዳ አዋዩዋ ማራን አይሁዳቱ ሞርከቱ ኡንቱንታ ጾናና ጌዳ ጋላሳ። ሽን የዉ አꬍ ዎꬍና፥ አይሁዳቱ ባረንቱ ሞርከቱዋ ጾኔድኖ። 2 ካትያ አርጸክሲሳ ካዉተꬃ ግዶን ደእያ አይሁዳቱ ኡባይ ባረንታ ቆሀናዉ ኮይያ ኡባ ꬋይሳናዉ ባረንቱ ካታማን ካታማን እትፐ ሺቄድኖ። ኡንቱንቱና አይ አሳይነ ኤቀታናዉ ዳንዳይቤና፤ አያዉ ጎፐ፥ ሀራ ዛርያ ግዴዳ አሳይ ኡባይ ኡንቱንቶ ያዬዳ። 3 ኡባ ቃይ ማርዶክዮሳዉ ያዬዳ ድራዉ፥ ካትያፐ ጋርሳና ጋድያ ሞድያዋንቱ፥ አዉራጃ ሞድያዋንቱ ጋድያ ካፓቱነ ዱማ ዱማባ ኦꬅያዋንቱ ኡባይ አይሁዳቱዋ ሃ ማዴድኖ። 4 አያዉ ጎፐ፥ ማርዶክዮስ ካትያ ጎለን ዎልቃማ ማታይ እመቴዳነ ዎልቃ ጉጅ ጉጅ ብያ አሳ ግዴዳዌ፥ ሄ ካዉተꬃ ግዶን ደእያ ቢታ ኡባን ኤረቴዳ።

5 ሄ ኬሬዳ ጋላስ አይሁዳቱ ባረንቱ ሞርከቱዋ ኡባ ማሻን ዎꬍ ꬋይሴድኖ፤ ባረንታ እጽያ ኡባ ቦላንካ ባረንቱ ኮዮዋ ኦꬄድኖ። 6 ዋና ካታማ ግዴዳ ሱሳ ካቲ ደኢያሳ ጻላላን እቼሹ ጼቱ አሳ ዎꬍ ꬋይሴድኖ። 7-10 ኡንቱንቱ ቃይ ፓርሻንዳታ፥ ዳልፎና፥ አስፓታ፥ ፖራታ፥ አዳልያ፥ አሪዳታ፥ ፓርማሽታ፥ አሪሳያ፥ አሪዳያነ ዋይዛታ ጌተትያ፥ ሀማዳታ ናኣ አይሁዳቱ ሞርክያ ሀማና ናና ታሙዋካ ዎꬌድኖ። ሽን ኡንቱንቱ ኡንቱንቱ አቁዋ ቦንቂበይክኖ።

11 አይሁዳቱ ሱሳ ካታማን ካቲ ደእያ ሳኣን ዎꬌዳ አሳ ፓይዱ አፑነንቶ ሄ ጋላስካ ካትያዉ ኦደቴዳ። 12 ያትና፥ ካቲ ካታቶ አስቴሮ ሀዋዳን ያጌዳ፤ “አይሁዳቱ ዋና ካታማ ግዴዳ ሱሳ ካቲ ደኢያሳ ጻላላን እቼሹ ጼቱ አሳነ ሃማና ናና ታሙዋ ዎꬍ ꬋይሴድኖ። ሄዌ ሄዋ ግዶፐ፥ ካትያ ቢታቱነ ሀራቱዋን ኡንቱንቱ ዎꬌዳዋንቱ አፑና ግዳንድኖሻ! ቃይ ሀእ ኔን ዎስያባይ አዬ? ታን ነዉ እማና። ኔን ታና ኦችያባይ ሀራባይ አዬ? ታን ነዉ ፖላና” ያጌዳ።

13 አስትራ ዛራደ፥ “ካትያ ሀ ቆፋይ ናሸቾፐ፥ ሱሳን ደእያ አይሁዳቱ ሀቼ ኦꬄዳዋዳን ዎንትካ ኦꬅኖ። ቃይ ሃማና ናና ታማቱዋ አሃካ ኮጫ ቦላን ካቃናዳን አዛዛ” ያጋዱ።

14 ሄዋፐ ጉየ ካቲ ሄዋ ኦꬃናዳን አዛዜዳ፤ አዋዩካ ሱሳን ላኤንꬁዋ እመትና፥ ሃማና ናና ታማቱዋ አሃይ ኮጫ ቦላን ካቀቴዳ። 15 አዳረ ጌተትያ አግናን ታማነ ኦይደንꬆ ጋላሳን፥ ሱሳ ደእያ አይሁዳቱ ቃይካ እትፐ ሺቂደ፥ ሀራ ሄዙ ጼቱ አሳ ዎꬌድኖ፤ ሽን ሀእካ ኡንቱንቱ ኡንቱንቱ አቁዋ ቦንቂበይክኖ።

16 ሄ ዎደ ካትያ ካዉተꬃ ጋርሳን ደእያ ቢታቱነ ሀራቱዋን ደእያ አይሁዳቱካ እትፐ ሺቂደ፥ ባረንቱ ሞርከቱዋ ኡባ ኦለቲደ ተኤድኖ። ኡንቱንቱ ኡባና 75,000 አሳ ዎꬌዳዋፐ ጉይያን፥ ባረንቱ ሞርከቱዋፐ ሸምፔድኖ። ሽን ኡንቱንቱ አቁዋ ቦንቂበይክኖ። 17 ሀዌ ኡባይ ሀኔዳዌ አዳረ ግያ አግናን ታማነ ሄዘንꬆ ጋላሳና፤ ታማነ ኦይደንꬆ ጋላሳን ኡንቱንቱ ሸምፒደ፥ ባላ ሚደ፥ ኡሺደነ ናሸቲደ ፔሽያ ጋላሳ ኦꬄድኖ።

18 ሽን ሱሳን ደእያ አይሁዳቱ ታማነ ሄዘንꬆነ ታማነ ኦይደንꬆ ጋላሳቱዋን ዎꬍ ፔሺደ፥ ታማነ እቼሻንꬆ ጋላሳን ሸምፔድኖ። ሄ ጋላሳ ኡንቱንቱካ ባላ ሚደ፥ ኡሺደነ ናሸቲደ ፔሽያ ጋላሳ ኦꬄድኖ።

19 ሄዋ ድራዉ፥ ቄር ቄር ካታማቱዋን ደእያ አይሁዳቱ ሀቼ ጋካናዉካ አዳረ ጌተትያ አግናን ታማነ ኦይደንꬆ ጋላሳ ባላ ጋላሳ ኦꬂደ ቦንቺኖ። ሄ ጋላሳን ሚኖነ ኡሺኖ፤ ቃይ እቱ እቶ ቁማ እሞታ እሚኖ።

20 ማርዶክዮስ ሀ ሀኔዳ ኡባ ታርክያ ጻፊደ ዳብዳቢያ ካትያ አርጸክሲሳ ቢታቱዋን ኡባን፥ ሃኩዋን ማታን፥ ደእያ አይሁዳ ኡባዉ ኪቴዳ። 21 ሄ ዳብዳቢያን ማርዶክዮስ አዳረ አግናን ታማነ ኦይደንꬆነ ታማነ እቼሻንꬆ ጋላሳቱዋ፥ አይሁዳቱ ላይꬃን ላይꬃን ባላ ኦꬂደ ቦንቻና ማላ፥ ኡንቱንቶ ኦዴዳ። 22 አያዉ ጎፐ፥ ሄ ጋላሳቱ አይሁዳቱ ባረንቱ ሞርከቱዋፐ ሸምፑዋ ደሜዳ ጋላሳቱዋ፤ ቃይ ሄ አግናይካ ኡንቱንቱ ካዩነ ዬኩ ናሸቻዉነ ባላ ሙሳዉ ላመቴዳ አግና። ሄዋ ድራዉ፥ ኡንቱንቱ ሙሳንነ ኡሻን ናሸቲደ፥ እቱ እቶ ቁማ ህዬሳቶ እሞታ እሚደ ቦንቻና ማላ፥ ኡንቱንቶ ኦደቴዳ።

23 አይሁዳቱ ማርዶክዮስ እሜዳ አዛዙዋ አኪደ፥ ኡንቱንቱ ቦንቻናዉ ዶሜዳ ባላ ላይꬃን ላይꬃን አገናን ቦንቻናዉ ማዬድኖ። 24 ጋሱነካ አጋጋ ዛሪ ሀማዳታ ናአይ ሃማን፥ አይሁዳቱ ኡባቱዋ ሞርኪ፥ ኡንቱንታ ꬋይሳናዉ ካሰ ማቀቴዳ፤ ኡንቱንታ ዉርስ ዎꬍያ አግናነ ጋላሳ ኤራናዉ ፑሪማ ግያ ሳማ የግሴዳ። አስ. 3:7 25 ሽን አስትራ ካትያኮ ገሌዳዋፐ ጉይያን፥ ሃማን አይሁዳቱ ቦላ ማቀቴዳ ኢታ ማቁ ኡባይ ጉየ ስሚደ፥ አ ቦላ ፖለታናዳን ካቲ ጻፉዋን አዛዜዳ። ያትና፥ ሃማንነ አ ናናይ ታሙ ኮጫን ካቀቴድኖ። 26 ሄዋ ድራዉ፥ ሀ ላኡ ጋላሳቱ ፑሪማ ጌተትያ ሳማ ባላ ጌተቲኖ። ሀ ዳብዳቢያን ኡንቱንቶ ጻፈቴዳዋ ኡባ ጋሱዋን፥ ኡንቱንቱ ባረንቱ አይፍያን በኤዳዋ ጋሱዋንነ ኡንቱንቱ ቦላን ጋኬዳዋ ጋሱዋን 27 አይሁዳቱ ባረንቶ፥ ባረንቱ ዛረቶነ አይሁዳ ግዳናዉ ኮይያ ኡባዉ፥ ሀ ባላ ቦንችያዋ ዎጋ ኦꬄድኖ። ሄዌካ ላይꬃን ላይꬃን አገናን ሀ ላኡ ጋላሳቱዋ ቦንቻናሳ። 28 ቃይ፥ ሀ ካዉተꬃ ጋድያን ኡባንነ ካታማቱዋን ኡባን ደእያ አይሁዳቱ ጎልያ አሳይ ኡባይነ ያና የለታ ኡባይ ሀ ፑሪማ ባላ ሀሳያናዉ በስያዌ ቃሸቴዳ። ሄዋ ቦላንካ፥ አይሁዳቱ አዉደ ግዶፐነ፥ ሀ ፑሪማ ጋላሳቱዋ ቦንቻናዉነ ሄ ጋላሳቱዋን ሀኔዳባይ ኡንቱንቱ ዛርያንካ ዶገተናን አጋናዉ በሰ።

29 ሄዋፐ ጉይያን፥ አብሀይላ ናታ፥ ካታታ አስትራነ አይሁዳይ ማርዶክዮስ ፑሪማ ባላ ጼልያዋን ካሰ ጻፌዳ ዳብዳቢያ ምንꬃናዉ ሀዋ ላኤንꬆ ዳብዳቢያ ኩመንꬃ ማታን ጻፌድኖ። 30 ሄ ዳብዳበቱ አርጸክሲሳ ካዉተꬃን፥ ጼታነ ላታማነ ላፑን ጋድያን ደእያ አይሁዳቶ ኡባዉ ሳሩነ ዎፓይ ግዶ ግያ ሳሮታና ጻፈቲደ ኪተቴድኖ። 31 ቃይ ኡንቱንቱ ካሰ ጾማናዉነ ካዮታናዉ ዎጋ ከሴዳዋዳን፥ ሀእ ኡንቱንታ ግድና፥ ስንꬃፐ ይያ ኡንቱንቱ ዘረꬃ ግድና፥ ሀ ፑሪማ ጋላሳቱዋ ላይꬃን ላይꬃን ዎጋ ኦꬂደ ቦንቻና ማላ፥ ሄ ዳብዳበቱ ቆንጭሲኖ። ሄዌ አይሁዳይ ማርዶክዮስነ ካታታ አስትራነ ላኡ ከሴዳ አዛዙዋ። 32 ካታት አስትር አዛዙ ፑሪማ ባላ ዎጋ ምንሴዳ፤ እካ ማጻፋን ጻፈቴዳ።