1 እት ዎደ ሙሴ ሚድያማ ጋደ ቄስያ፥ ባረ ቦሉዋ ዮቶራ ዶርሳቱዋ ሄሜ፤ እ ሄ ዉድያ ላግ አኪደ መላ ቢታ ጋጻ ጋካናዉ አፊደ ጾሳ ደርያ ሲና ጋኬዳ። 2 ሄ ሳኣን መꬍና ጎዳ ኪታንቻይ አጫን፥ ኤጽያ ታማ ላጩዋ ግዶን አዉ ቤቴዳ፤ አጫይ ታማን ጹገትንቶካ፥ ታማይ አጫ ሜናዋ ሙሴ በኤዳ። ኪታ 7:30-34 3 ሄዋ ድራዉ፥ ሙሴ፥ “ታን ያ ባደ፥ አጫይ አያዉ ታማን ሜተትቤነንቶ ሀ ኦራꬃባ አነ በአና” ያጊደ ቆፔዳ።

4 እ በአናዉ ያ ቤዳዋ መꬍና ጎዳይ በኢደ አጫ ግዶፐ ጾሳይ አ፥ “ሙሴ! ሙሴ!” ያጊደ ጼሴዳ።

ሙሴ፥ “አቤ” ጊደ ኮዬዳ።

5 ጾሳይ አ፥ “ሃ ሺቆፓ። ኔን ኤቄዳ ቢታይ ጌሻ ግድያ ድራዉ፥ ነ ገድያን ደእያ ጫማ ከሳ” ያጌዳ። 6 ቃይካ ጾሳይ አ፥ “ታን ነ አዉዋ ጾሳ፥ አብራሃሞ ጾሳ፥ ይሳቃ ጾሳ፥ ያቆባ ጾሳ” ያጌዳ። ሙሴ ጾሳ ጼላናዉ ያዬዳ ድራዉ፥ ባረ ዴሙዋ ገንꬄዳ።

7 መꬍና ጎዳይ ቃይካ ሀዋዳን ያጌዳ፤ “ታን ግብጼ ጋድያን ታ አሳይ ቱጋትያ ቱጋ ጌሻ በኣደ፥ ኡንቱንቱ ባረንቱ ካፖቱዋፐ ዋስያ ዋሱዋ ስሳደ፥ ታን ኡንቱንቱ መቱዋ ኡባ ꬊሻድ። 8 ሄዋ ድራዉ፥ ታን ኡንቱንታ ግብጼ ጋድያ አሳቱዋ ኩሽያፐ አሻናዉነ ሄ ጋድያፐ ኡንቱንታ ከሳደ፥ አኮነ ሎኦ ጋድያ አሀናዉ ዎꬋድ። ሄ ጋዲ ማꬃይነ ኤሳይ ጎግያ ቢታ፤ ሄ ጋድያን ካናነቱ፥ ሂተቱ፥ አሞራዋናቱ፥ ፓርዛዋናቱ፥ ሂዌቱነ ያቡሳዋናቱ ሀእ ደኢኖ። 9 ሀእ እስራኤለቱዋ ዋሱ ታኮ ጋኬዳ፤ ግብጼ ጋድያ አሳቱ ኡንቱንታ ናቂያ ናቁዋ ታን በኣድ፤ 10 ሄዋ ድራዉ፥ ሀእ ባ፤ ታ አሳቱዋ፥ እስራኤላቱዋ ግብጼፐ ከሳና ማላ፥ ግብጼ ካትያኮ ታን ኔና ኪታይ” ያጌዳ።

11 ሽን ሙሴ ጾሳ፥ “ካትያኮ ባናዉነ እስራኤላቱዋ ግብጼፐ ከሳናዉ ታን ኦኔ?” ያጌዳ።

12 ጾሳይ አ፥ “ታን ኔናና ግዳና፤ ቃይ ታን ኔና ኪቴዳዎ ማላይ ሀዋ: ኔን ሄ አሳ ግብጼፐ ከሴዳ ዎደ፥ ሀ ደርያ ቦላን ህንተንቱ ጾሳዉ ጎይናንታ” ያጌዳ።

13 ሙሴ ጾሳ፥ “ግዶ ሽን፥ ታን እስራኤለቱዋኮ ባደ፥ ኡንቱንታ፥ ‘ህንተ አዎቱዋ ጾሳይ ታና ህንተንቱኮ ኪቴዳ’ ያግና፥ ኡንቱንቱ ታና፥ ‘አ ሱንꬃይ ኦኔ?’ ያጊደ ኦቾፐ፥ ሄ ዎደ ታን ኡንቱንቶ ዋጋ ኦዶ?” ያጌዳ። ከሳ 6:2-3

14 ጾሳይ ሙሳ፥ “ታን ታና፤ ኔን እስራኤለቶ፥ ‘ታና ጌተትያዌ ህንተንቱኮ ታና ኪቴዳ’ ያጋ” ያጌዳ። ሳፃ 1:4፣ 8

15 ጾሳይ ሙሳ ቃይ፥ “ኔን እስራኤላቶ፥ ‘መꬍና ጎዳይ ህንተንቱ አዎቱዋ ጾሳይ፥ አብራሃሞ ጾሳይ፥ ይሳቃ ጾሳይ፥ ያቆባ ጾሳይ፥ እ ታና ህንተንቱኮ ኪቴዳ’ ያጋ፤ ሀዌ የለታፐ የለታይ ጋካናዉ ታን ሀሳየትያ መꬍናዉ ታ ሱንꬃ።

16 “ስም፤ ባደ እስራኤልያ ጭማቱዋ ሺሻደ፥ ‘መꬍና ጎዳይ ህንተንቱ አዎቱዋ ጾሳይ፥ አብራሃሞ፥ ይሳቃነ ያቆባ ጾሳይ ታዉ ቆንጪደ፤ ታና፥ ታን ህንተንታ ጾሞሳድ፤ ግብጼን ህንተንቱ ቦላ ኦሰቴዳዋካ ታን በኣድ። 17 ታን ህንተንታ ግብጼ ጋድያ ቱጋፐ ከሳደ፥ ማꬃይነ ኤሳይ ጎግያ ካናነቱዋ፥ ሂተቱዋ፥ አሞራዋናቱዋ፥ ፓርዛዋናቱዋ፥ ሂዌቱዋነ ያቡሳዋናቱዋ ጋድያ አፋና ጋ ኡታድ።’

18 “እስራኤልያ ጭማቱ ነ ቃላ ስሳናዋንታ፤ ሄዋፐ ጉይያን ኔንነ ሄ ጭማቱ ግብጼ ካትያኮ ቢደ አ፥ ‘መꬍና ጎዳይ፥ እብራዌቱዋ ጾሳይ፥ ኑናና ጋከቴዳ። ሀእ ኑን ሄዙ ጋላሳ ኦግያ መላ ቢታ ሀመት ቢደ፥ መꬍና ጎዳ፥ ኑ ጾሳዉ፥ ያርሹዋ ያርሻና ማላ ኑና የዳ’ ያግተ። 19 ሽን ዎልቃማ ኩሺ፥ አ፥ ዎልቃን የድሳና ꬋዮፐ፥ ግብጼ ካቲ ህንተንታ የደናዋ ታን ኤራይ። 20 ሄዋ ድራዉ፥ ታን ታ ኩሽያ የዳደ፥ ኡንቱንቱ ግዶን ታን ኦꬅያ ታ ማላታቱዋ ኡባን ግብጼቱዋ ሾጫና። ሄዋፐ ጉይያን እ ህንተንታ የዳናዋ።

21 “ቃይ ታን ግብጼቱዋን ሀ አሳ ሳቢሳና፤ ያቶፐ ህንተንቱ ከስያ ዎደ ኩሸ መላ ከስክታ። ከሳ 12:35-36 22 እብራዌ ማጫውና ኡባታ ባረ ግብጼ ሾራትኮነ ባረ ሶን ደእያ ግብጼ ማጫ አሳ ኦናነ ግዶፐ ኢኮ ቢደ፥ ብራ ሚሻቱዋ፥ ዎርቃ ሚሻቱዋነ አቱማ ናናይነ ማጫ ናናይ ማያና ማዮቱዋ ‘እምተ’ ጊደ ኦቻናዋንታ። ሄዋዳን ኦꬂደ ህንተንቱ ግብጼቱዋ ማጹዋ ቦንቃንታ” ያጌዳ።