1 ሄዋፐ ጉይያን ሙሴነ አሮነ ግብጼ ካትያኮ ዪደ አ፥ “መꬍና ጎዳይ፥ እስራኤልያ ጾሳይ ሀዋዳን ያጌ፤ ‘ታ አሳይ ታዉ መላ ቢታን ባላ ቦንቻና ማላ፥ ኡንቱንታ የዳ’ ያጌ” ያጌድኖ። 2 ካቲ፥ “ታን አዉ አዛዘታደ እስራኤልያ የዳናዉ ሄ መꬍና ጎዳይ ኦኔ? ታን መꬍና ጎዳ ኤርከ፤ እስራኤልያካ የድከ” ያጌዳ። 3 ሄዋፐ ጉይያን ኡንቱንቱ፥ “እብራዌቱዋ ጾሳይ ኑናና ጋከቴዳ። ሀእ ኑን መꬍና ጎዳ፥ ኑ ጾሳዉ፥ ያርሹዋ ያርሻናዉ ሄዙ ጋላሳ ኦግያ መላ ቢታ ግዶ ባናዉ ኑና የዳርኪ፤ ሄዌ ꬋዮፐ፥ እ ኑና ኢታ ሀርግያን ዎይ ኦላን ዎꬋናዋ” ያጌድኖ።

4 ሽን ግብጼ ካቲ ያጌዳ፤ “ሙሴ! አሮና! አሳ አያዉ ኪታ ድጊቴ? ህንተንቱ ኪታዉ ስሚደ ቢተ” ያጌዳ። 5 ካቲ ሄ ዎደ፥ “በእተ፥ ሀ ጋድያን አሳይ ጮራቴዳ፤ ቃይ ህንተንቱ ኡንቱንታ ኪታ ድጊታ” ያጌዳ። 6 ካቲ ሄ ጋላስ ግብጼቱዋ ካፖቱዋነ እስራኤለቱዋ ዳጉዋ ሱንꬃቱዋ አዛዚደ፥ 7 “ሀሮደዋዳን ጹብያ መꬍያ ኡቱላ አሳዉ እሞፕተ፤ ኡንቱንቱ ኡቱላ ባረንቶ ቢደ ሺሽኖ፤ 8 ሽን ኡንቱንቱ ፓይዱዋን ካሰዋ ኬሻ ጹብያ መꬊደ፥ ሼꬋናዳን አዛዝተ፤ ሄ ፓይዱዋፐ ፓጭሶፕተ፤ አያዉ ጎፐ፥ ኡንቱንቱ አዛላ፤ ኡንቱንቱ፥ ‘ኑን ኑ ጾሳዉ ያርሹዋ ያርሻና ማላ፥ ኑና የዳርኪ’ ያጊደ ዋስያዌ ሀዋሳ። 9 ኡንቱንቱ ኪታን ሼካና ማላነ ዎርዱዋ ሃሳያ ስሰናን አጋና ማላ፥ ኡንቱንቶ ኦሱዋ ዴጽስተ” ያጊደ አዛዜዳ።

10 ሄዋፐ ጉይያን፥ ሄ ካፖቱነ ሄ ሱንꬃቱ ከሲደ አሳ፥ “ካቲ ሀዋዳን ያጌ፤ ‘ስም ታን ህንተንቶ ኡባካ ኡቱላ እምከ፤ 11 ህንተንቱ ኡቱላ ደማና ዳንዳይያሳፐ ህንተንቱ ሁጲያዉ ሺሽተ፤ ሽን ህንተንቱ ሼꬍያ ጹብያ ፓይዱ ኡባካ ፓጨና’ ያጌዳ” ያጌድኖ። 12 አሳይ ኡቱላዉ ሀንያዋ ሺሻናዉ ግብጼ ቢታ ኡባን ላለቴዳ። 13 ግብጼቱዋ ካፖቱ ኡንቱንታ፥ “ህንተንቶ ኡቱላ እምያ ዎደ ህንተንቱ ሀቼ ሀቼ ኦꬅያዋ ኬሻ ኦꬅተ” ያጊደ ኡንቱንታ ጎደቴድኖ። 14 ግብጼቱዋ ካፖቱ እስራኤለቱዋ ዳጉዋ ሱንꬃቱዋ ዋꬊደ፥ “ህንተንቱ ካሰ ኦꬅያዋ ኬሻ ጹብያ ዝኖ ዎይ ሀቼ አያዉ ኦꬅ ዉርስበይክቴ?” ያጊደ ኦቼድኖ።

15 ሄዋፐ ጉይያን እስራኤልያ ሱንꬃቱ ቢደ ካትያዉ ማጋኔድኖ፤ ኡንቱንቱ ባረንቱ መቱዋፐ ደንዶዋን አ፥ “ኔን ነ ቆማቱዋ ሀዋዳን አያዉ ኦꬃይ? 16 ነ ቆማቶ ኡቱላ እምክኖ፤ ሽን፥ ‘ጹብያ መꬍተ’ ያጊኖ፤ ኑና ነ ቆማቱዋ ዋꬊኖ፤ ሽን ባላይ ነ አሳ ቦላና” ያጌድኖ። 17 ሽን ካቲ ኡንቱንታ፥ “ሀ አዛላቱ! ህንተንቱ አዛላ! ሄዋ ድራዉ፥ ህንተንቱ ዛር ዛሪደ፥ ‘ኑን መꬍና ጎዳዉ ያርሻና ባናዉ ኑና የዳርኪ’ ያጊታ። 18 ሀእ ቢተ፤ ኦꬅተ፤ ኡንቱንቱ ህንተንቶ አይ ኡቱላካ እምክኖ፤ ሽን ህንተንቱ ካሰዋ ኬሻ ጹብያ መꬊታ” ያጌዳ። 19 እስራኤላቱዋ ሱንꬃቱ፥ “ህንተንቱ ሀቼ ሀቼ መꬍያ ጹብያ ፓይዱዋ ካሰዋፐ ፓጭሶፕተ” ጌዳ ዎደ፥ ኡንቱንቱ መቱዋን ገሌዳዋ አኬኬድኖ። 20 ኡንቱንቱ ካትያ ማታፐ ከሲደ፥ ሙሴነ አሮነ ኡንቱንቱና ጋከታናዉ ናግያዋንታ ደሜድኖ። 21 ኡንቱንቱ፥ “ህንተና መꬍና ጎዳይ ጼሎ! ህንተንቱ ቦላ እ ፕርዶ! ህንተንቱ ኑና ካትያናነ አ ኦሳንቻቱዋን እጽሴድታ፤ ቃይ ኡንቱንቱ ኑና ዎꬋና ማላ፥ ማሻ ኡንቱንቱ ኩሽያን ዎꬄድታ” ያጌድኖ።

22 ሙሴ መꬍና ጎዳኮ ስሚደ፥ “አቤት ጎዳዉ፥ ኔን ሀ አሳ ቦላ መቱዋ አያዉ አሃዲ? ኔን ታና ኪቴዳዌ ሀዋሴ? 23 ታን ነ ሱንꬃን ካትያዉ ሃሳያናዉ ቤዳ ዎደፐ ዶምና፥ እ ሀ አሳ ቦላ መቱዋ አሄዳ። ቃይ ኔንካ ነ አሳ ሙለ አሻባካ” ያጌዳ።