1 አብራሃመ ማምረፐ ደንዲደ፥ ነጌባ ግያ ጋድያ ቤዳ፤ ቃዴሳነ ሹራ ግያ ካታማቱዋፐ ግዱዋን ደኤዳ፤ ጋራራንካ አማሬዳ ዎድያ ታኬዳ። 2 ያን አብራሃመ ባረ ማቻቶ ሳሮ፥ “አ ታ ምቻቶ” ያጌዳ። ጋራራ ካቲ አብመሌክ ኪቲደ ሳሮ አፌዳ። ዶመꬃ 12:13፤ 26:7 3 ሽን ጾሳይ እት ቃማን አኩሙዋን አብመሌከኮ ዪደ፥ አ ሀዋዳን ያጌዳ፤ “ኔን አሄዳ ማቻት ጋሱዋን ሀይቃሳ፤ አያዉ ጎፐ፥ እዛ አሳ ማቻቶ” ያጌዳ።

4 ሽን አብመሌክ ኢኮ ሺቅቤና። ያቴዳዌ፥ “ጎዳዉ፥ ኔን ጽሎ ካዉተꬃ ꬋይሳኒየ? 5 እ፥ ‘እዛ ታ ምቻቶ’ ግቤነየ? ቃይ እዛ፥ ‘እ ታ እሻ’ ጋበይኬ? ታን ታ ዎዛና ሱረተꬃንነ ታ ኩሽያ ጌሻተꬃን ሀዋ ኦꬃድ” ያጌዳ።

6 ሄዋፐ ጉየ፥ ጾሳይ አኩሙዋን አ ያጌዳ፤ “ኤ፥ ኔን ነ ዎዛና ጌሻተꬃን ኦꬄዳዋ ታን ኤራድ፤ ሄዋ ድራዉ፥ ኔን እዞ ቦቼና ማላነ ታ ስንꬃን ናጋራ ኦና ማላ ኔና ታን ተኣድ። 7 ሀእ ሀ ብታንያ ማቻቶ ዛራ፤ አያዉ ጎፐ፥ እ ትምቢትያ ኦድያዋ፤ እ ነዉ ጾሳ ዎሳና፤ ኔን ፓጻ ደአና። ሽን እዞ ዛራና ꬋዮፐ፥ ኔንነ ነዉ ደእያባይ ኡባይ ሀይቂያዋ ቱሙፐ ኤራ” ያጌዳ።

8 አብመሌክ ዎንተꬃ ጋላስ ዎንታ ባረ ካዉተꬃ ካፓቱዋ ኡባ ጼሴዳ፤ ሀ የዉዋ ኡባ ኡንቱንቶ ኦድና፥ ኡንቱንቱ ሎይꬅ ዳሮ ያዬድኖ። 9 ያትና አብመሌክ አብራሃማ ጼሲደ፥ “ኔን አያ ኑ ቦላ ኦꬃዲ? ኔን ታ ቦላነ ታ ካዉተꬃ ቦላ ዎልቃማ ናጋራ አሀናዉ ታን ነዉ አይ ኢታባ ኦꬃድታ? ኔን ታ ቦላ ኦሰታናዉ በሰናባ ኦꬃዳ” ያጌዳ። 10 ቃይካ አብመሌክ አብራሃማ፥ “ኔና ሀዋ ኦስሴዳዌ አዬ?” ያጊደ ኦቼዳ።

11 አብራሃመ ያጌዳ፤ “ ‘ጾሳዉ ያይያ እት አሳይነ ሀ ሳኣን ባዋ’ ጋደ ቆፔዳ ድራሳነ፥ ‘ታ ማቻት ጋሱዋን ኡንቱንቱ ታና ዎꬋና’ ጋደ ቆፔዳ ድራሳ። 12 ሄዋ ቦላ እዛ ቱሙካ ታ ምቻቶ፤ ታ አት ናቶ ግዱኩፐ አትን፥ ታ አቡ ናቶ፤ ቃይ እዛ ታ ማቻቶ ግዳዱ። 13 ጾሳይ ታና ታ አዉዋ ጎልያፐ ከሴዳ ዎደ ታን እዝዉ፥ ‘ኑን ቤዳ ጋድያን ኡባን ኔን ታዉ ኦꬃና ኬካተꬃይ ሀዋ፤ “እ ታ እሻ” ጋደ ታባ ሃሳያ’ ያጋድ” ያጌዳ።

14 ሄዋፐ ጉየ አብመሌክ ዶርሳ፥ መህያ፥ ማጫ አይለቱዋነ አቱማ አይለቱዋ አሂደ፥ አብራሃመዉ እሜዳ፤ ቃይ አ ማቻቶ ሳሮ አዉ ዛሬዳ። 15 አብመሌክ፥ “ስም ታ ቢታይ ነ ስንꬃና፤ ኔና ሎኦሳን ደአ” ያጌዳ። 16 ሳሮካ፥ “ታን ነ እሻዉ እት ሻአ ጻጋራ ብራ *እት ሻአ ጻጋራ ብራ፦ ሀዌ ታማነ እታነ ባካ ኪሎ ግራመ ዴጼ። እማይ፤ ሀዌ ስም ኔናና ደእያ ኡባ ስንꬃን ኔን ጽላቶ ግድያዋነ ኔን ሻትሜዳዋ ኤርስያዋ ግዶ” ያጌዳ።

17-18 መꬍና ጎዳይ አብራሃመ ማቻት ሳር ጋሱዋን አብመሌካ ጎለ አሳ ኡባ ቃንꬃ ማይንስ ዎꬄዳ ድራዉ፥ አብራሃመ ጾሳ ዎስና፥ አብመሌክ፥ አ ማቻታነ አ ማጫ ቆማቱዋ ናኣ የላና ማላ ጾሳይ ኡንቱንታ ፓꬄዳ።