1 ይሁዳ ቢታባነ የሩሳላመ ካታማባ አሞጻ ናአይ እስያስ በኤዳዌ ሀዋ።

2 ዉርሰꬃ ጋላሳቱዋን መꬍና ጎዳ ጌሻ ጎሊ ኬጸቴዳ ደሪ ደረቱዋ ኡባፐ ꬎቂደ ቤታና፤ ዞዘቱዋ ኡባቱዋፐካ ቦላና ꬎቁ ꬎቁ ጋና። ካዉተꬃቱዋን ደእያ አሳይ ኡባይ አኮ ዛታና። 3 ዳሮ አሳይ ዪደ፥ “ሃይተ! መꬍና ጎዳ ደርያ፥ ያቆባ መꬍና ጎዳ ጌሻ ጎልያ አነ ፑደ ከሶይተ። እ ኮይያዋዳን ኑን ባና ማላ፥ እ ኑና ባረ ኦግያ ታማርሳና” ያጋና። አያዉ ጎፐ፥ ህጊ ጽዮነፐ፥ ጾሳ ቃላይካ የሩሳላመፐ ከሳና። 4 ካዉተꬃቱዋፐነ ካዉተꬃቱዋፐ ግዱዋን እ ፕርዳናነ ዳሮ አሳቱዋ ፓሉምያ ሻካና። ኢዩ. 3:10 ኡንቱንቱ ባረንቱ ማሻ ማራሻ፥ ባረንቱ ቶራካ ባጫ ከሳናዉ ቆጻና። ካዉተꬃይ ካዉተꬃ ቦላ ማሻ ደንና። ሄዋፐ ጉይያን ኡንቱንቱ ሙለካ ኦላ ትምርትያ ታማርክኖ።

5 ህንተኖ፥ ያቆባ ዛረቶ፥ ሃይተ! አነ መꬍና ጎዳ ፖኡዋን ሀመቶይተ።

6 ጾሳዉ፥ ነ አሳ፥ ያቆባ ዛራቱዋ አጋዳ። ኡንቱንቱ አዋይ ዶልያ ባጋ ጋድያ አሳቱዋ ቢታን ኩሜድኖ፤ ፕልስጼማ አሳቱዋዳን ካዪኖ። ኡንቱንቱ አላጋ አሳቱዋና እትፐ ዙፐቲኖ። 7 ኡንቱንቱ ጋዲ ብራይነ ዎርቃይ ኩሜዳዋ፤ ኡንቱንቱ ሻሎ ዛዋይ ባዋ። ኡንቱንቱ ጋዲ ፓራይ ኩሜዳዋ፤ ኡንቱንቱ ፓራ ጋረቶ ዛዋይ ባዋ። 8 ኡንቱንቱ ጋዲ ኤቃቱዋን ኩሜዳዋ፤ ኡንቱንቱ ባረንቱ ኩሺ ኦꬄዳ ኦሶ ሆኪደ ጎይኒኖ።

9 ሄዋ ድራዉ፥ አሳይ ኡባይ ቶሸታናነ ካዉሻና። ኡንቱንቶ አቶ ጎፓ።

10 መꬍና ጎዳ ዳጋማፐነ አ አንጋ ቦንቹዋፐ አታናዉ ዛላኮ ቢተ፤ ቢታ ግዶን ቆሰትተ!ሳፃ 6:15፤ 2 ተስ. 1:9 11 አሳ ኦቶሩ ጊያና፤ አ ክላሁካ ሲላና፤ ሄ ጋላስ መꬍና ጎዳ ጻላላይ ꬎቁ ꬎቁ ጋና። 12 ኡባፐ ዎልቃማ መꬍና ጎዳይ እት ጋላሳ ኬሬዳ። ሄ ጋላስ ኦቶረትያዋንታ፥ አይያዋንታነ ꬎቁ ꬎቁ ጌዳዋንታ ካዉሻና፤ 13 አዱሳነ ꬎቃ ግድያ ሊባኖሳ ዝጋቱዋነ ባሳነ ዎላ ኡባ ꬋይሳና፤ 14 ꬎቃ ደረቱዋካ ዞዘቱዋካ ደምባያና፤ 15 ካታማ ናግያ አዱሳ ሚጻቱዋ ኡባነ ካታማ ዩሹዋን ደእያ ምኖ ግምበቱዋ ዝቂሳና፤ 16 ጾሳይ ግታነ ሎእያ ማርካባቱዋካ ሃꬃን ምትሳና። 17 አሳ ኦቶሩ ዝቂ ጋና፤ አ አዩካ ꬋያና። ሄ ጋላስ መꬍና ጎዳ ጻላላይ ꬎቁ ꬎቁ ጋና፤ 18 ኤቃ ኡባይካ ኡባና ꬋያና።

19 መꬍና ጎዳይ ሀ ጋድያ ቃꬃናዉ ደንድያ ዎደ፥ አ ዳጋማፐነ አ አንጋ ቦንቹዋፐ አታናዉ አሳይ ሹቻ ጎንጎሎነ ቢታ ኦላዉ ባቃታና። 20 ሄ ጋላስ አሳይ ጎይናናዉ መꬌዳ ባረንቱ ብራ ምስለቱዋነ ባረንቱ ዎርቃ ምስለቱዋ ኦጮቶነ ሀራ ካፎቶ ኦላና። 21 መꬍና ጎዳይ ሀ ጋድያ ቃꬃናዉ ደንድያ ዎደ፥ አ ዳጋማፐነ አ አንጋ ቦንቹዋፐ አታናዉ ኡንቱንቱ ጎንጎሎ ግዶነ ሹቻ ኮፖ ግዶ ባቃታና።

22 ስም ሀይቂያ አሳን አማነትያዋ አግተ! አሳይ አይ ማዳኔ?