1 እሰይ ዱሩማፐ አጫይ ከሳና፤ አ ጻጱዋፐ አይፍያ ታሺ ከሳና። ሳፃ 5:5፤ 22:16 2 መꬍና ጎዳ አያናይ፥ አꬌዳ ኤራተꬃነ አኬካ አያናይ፥ ዞርያነ ዎልቃ አያናይ፥ ኤራተꬃነ መꬍና ጎዳዉ ያይያ አያናይ አ ቦላ ሸምፓና። 3 መꬍና ጎዳዉ ያይያዋን እ ናሸቴ፤ ባረ አይፊ በኤዳዋን ጮ ፕርደና፤ ዎይ ባረ ሀይꬃይ ስሴዳዋን ጮ ፕርደና። 4 ሽን ህዬሳቶ እ ጽሉዋን ፕርዳና፤ 2 ተስ. 2:8 ሳኣን ደእያ መቶታንቻቱ የዉዋካ እ ሱረተꬃን ፕርዳና። እ ባረ እንጻርሳ ጋትማን ሳኣ ሾጫና፤ ባረ ዶና ሸምፑዋን ኢታቱዋ ዎꬋና። 5 ጽሎተꬃይ አ ጼሳዉ ዳንጮ ግዳናዋ፤ አማነትያዌካ አ ምይያዉ ሳቂያ ግዳናዋ። ኤፈ. 6:14

6 ጄሪ ዶርሳ ማራና እትፐ ደአና፤ ኢሳ. 65:25 ማሂካ ዴሻ ማራና እትፐ ግሳና፤ ሚዛ ማራና፥ ጋሙዋ ማራናነ እትፐ ሄመታና፤ ጉꬃ ናእ ኡንቱንታ ሄማና። 7 ሚዛታነ ባባንꬃ ጌተትያ ዶአይ እትፐ ማና፤ ኡንቱንቱ ማራቱካ እትፐ ግሳና፤ ጋሙ ቦራዳን ኡቱላ ማና። 8 ꬋንꬃ ꬋምያ ናአይ ሾሻ ኦላን ካአና፤ ꬋንꬃ ዱꬄዳ ናአይ ዎꬍያ ሾሻ ኦላን ባረ ኩሽያ የዳና። 9 ታ ጌሻ ደርያን ኦንነ ቆሄተና፥ እምባ. 2:14 ዎይ ባየና፤ አያዉ ጎፐ፥ አባይ ሃꬃን ኩምያዋዳን፥ ሳአይ መꬍና ጎዳ ኤርያዋን ኩማና።

10 ሄ ጋላስ እሰይ ጻጱ አሳዉ ማላታ ግዲደ ኤቃና፤ ካዉተꬃ ኡባይ አ ኮያና፤ እ ደእያ ሳአይካ ቦንቼታና። ሮመ 15:12 11 ሄ ጋላስ ጎዳይ ባረ አሳ አቶተꬃ አሶረፐ፥ ግብጼፐ፥ ፓትሮሳፐ፥ ቶጵያፐ፥ ኤላማፐ፥ ባብሎነፐ፥ ሀማታፐነ አባ ዶናን ደእያ ቢታቱዋፐ ላኤንꬁዋ ዛር አካናዉ ባረ ኩሽያ የዳና። 12 ካዉተꬃቶ ማላታ እ ꬎቁ ኦꬂደ ደንꬃና፤ እስራኤልያፐ ላለቴዳዋንታ እትፐ ጋꬃና፤ ይሁዳፐ ፕስክ ጌዳዋንታካ ሳኣ ኦይዱ ሚዛናፐ እ ሺሻና።

13 ሄዋፐ ጉይያን፥ ኤፍሬማ ቃናቲ አፐ ሻከታና፤ ቃይ ይሁዳ ዋይስያዋንቱካ ꬎቆለት ꬋያና። ኤፍሬመ ይሁዳ ቃናተና፤ ይሁዳይካ ኤፍሬማ ዋይሰና። 14 ኡንቱንቱ አዋይ ዉልያ ባጋን ደእያ ፕልስጼማ ጋድያ ቦላ ፓሊደ ዎꬋና፤ አዋይ ዶልያ ባጋን ደእያ አሳካ ኡንቱንቱ እትፐ ቦንቃና። ኡንቱንቱ ኤዶማ ቦላነ ሞኣባ ቦላ ባረንቱ ኩሽያ ዎꬃና፤ አሞናቱካ ኡንቱንቶ አዛዘታና። 15 መꬍና ጎዳይ ግብጼ ምይያን ደእያ ዞኦ አባ ኡባና መልሳና፤ ባረ ላጽያ ጫርኩዋና ባረ ኩሽያ ኤፍራጺሳ ሻፋ ቦላ ደንꬃና። ያቲደ አሳይ መላ ኤለካ ፕናና ማላ፥ ላፑን ቄር ሻፋ ከሲደ ሾጫና። ሳፃ 16:12 16 እስራኤልያ አሳይ ግብጼ ጋድያፐ ከስያ ዎደ ኦጊ ደኤዳዋዳን፥ አ አሳፐ አቴዳዋንቶ አሶረ ጋድያፐ ከስያ ኦጊ ደአናዋ።