1 አባ ማታን ደእያ ባዞ ኦደቴዳ ጾሳ ቃላይ ሀዋ።

ገድሳ ባጋፐ ጎትያ ጫርኩ ሱራጊደ ይያዋዳን፥ ባሻይ መላ ቢታፐ፥ ያሽያ ጋድያፐ ዬ።

2 እት ያሽያ ሳጻይ ታዉ ቆንጬዳ። አꬅ እምያዌ አꬅ እሜ፤ ኦሞድያዌ ኦሞዴ፤ ኤላማ ቢታዉ፥ ዎራጃ! ሜዶና ቢታዉ፥ ካታማ ዶዳ! ባብሎነ ጋሱዋን ጋኬዳ ኦልያ ታን ግድሳና።

3 ሄዋ ድራዉ፥ ታ ጼሳይ ሳኮ ጻላላ ግዴዳ፤ ማጫ አሳ የሉ ኦይቂያዋዳን፥ ታና ኡንኡ ኦይቄዳ፤ ታን ስስያዋፐ ደንዴዳዋን ሆካድ፤ ታን በኤዳዋፐ ደንዴዳዋን ዳጋማድ። 4 ታና ዪጮዬ፤ ታና ያሻይ ኮኮርሴ፤ ታን አሞቴዳ ኦማርሳይ ታዉ ኮኮርሳዉ ላመቴዳ።

5 ታን በኤዳ ሳጻን ኡንቱንቱ ግብራ ጊግሴድኖ፤ ምንጻፍያካ ሂጼድኖ፤ ያቲደ ሚኖነ ኡሺኖ። ያትሽን፥ “ህንተኖ ካፓቶ፥ ደንድተ! ህንተ ጎንዳለቱዋ ቁጭተ!” ያግያ አዛዙ ዬዳ።

6 ጎዳይ ታና ሀዋዳን ያጌዳ፤ “ባ፤ ጾሞስያ አሳ ዎꬃ፤ እ ባረ በእያዋ ኦዶ። 7 ጋማማ መህያ ቶግያዋንታ፥ ላኡዋ ላኡዋ ግዲደ ብያ ፓራ አሳቱዋ፥ ሀረቱዋ ቶግያዋንታነ ጋሎቱዋ ቶግያዋንታ በእያ ዎደ፥ ሎይꬂደ ጼሎ፤ ꬍሽ ጼሎ” ያጌዳ።

8 ሄዋፐ ጉይያን፥ ዎቼዳዌ ሀዋዳን ያግ ዋሴዳ፤ “ጎዳዉ፥ ታን ዎችያሳን ጋላስ ጋላስ ፓጭ ባይናን ኤቃድ፤ ታ ሳንታርያንካ ቃማ ሙልያ ቶለታድ። 9 በእተ፥ ጋማማ መህያ ቶግያ ፓራ አሳቱ ላአ ላአ ግዲደ ዪኖ” ያጌዳ። እ ቃይካ ሀዋዳን ያጌዳ፤ “ባብሎነ ኩንዴዳ፤ አ ጾሳቱዋ ምስለቱካ ኩንዴድኖ። ኡንቱንቱ ኡባይካ ሳኣን ዱገ ኩንዲደ ጋጨቴድኖ” ያጊደ ዋሴዳ። ሳፃ 14:8፤ 18:2 10 ህንተኖ፥ ታ ኡዱማን ቆጸቴዳ ታ አሳቶ፥ ኡባፐ ዎልቃማ መꬍና ጎዳፐ፥ እስራኤልያ ጾሳፐ ስሴዳዋ ታን ህንተንቶ ኤርሳይ።

11 ኤዶማ ቢታ ጾሳይ ሀዋዳን ያጌዳ፤ “እት ብታኒ ኤዶማ ባጋና ታና ጼሲደ፥ ‘ላ ዎችያዎ፥ ሳአይ ዎንታናዉ አፑኑ አቴዴ? ላ ዎችያዎ፥ ሳአይ ዎንታናዉ አፑኑ አቴዴ?’ ያጌ። 12 ዎችያዌ ዛሪደ፥ ‘ሳአይ ዎንታና ሀኔ፤ ቃይ ቃማና፤ ህንተ ኦቻናዉ ኮዮፐ፥ ስም ዪደ ኦችተ’ ያጌ” ያጌዳ።

13 አራባ ግያ ቢታ ጎዳይ ሀዋዳን ያጌ፤ “ህንተኖ ዳዳና ዛልአንቻቶ፥ ህንተ ህንተ ጫንያ ጋሎቱዋናካ አራባ ጋድያ ባዙዋን አቃና። 14 ህንተኖ፥ ቴማ ግያ ጋድያን ደእያ አሳቶ፥ ሳመቴዳዋንቶ ሃꬃ አህተ፤ በተቶ ምያዋ እምተ። 15 አያዉ ጎፐ፥ ኡንቱንቱ ማሻፐ፥ ሾኩዋፐ ሾዴዳ ማሻፐ፥ ዳፌዳ ዎንዳፍያፐነ ምኖ ኦላፐ ባቃቲደ ዬድኖ” ያጌ።

16 ሄዋፐ ጉይያን፥ ጎዳይ ታና ሀዋዳን ያጌዳ፤ “ኮንትራትያ ኦሳንቻ ዎድያዳን፥ መጽ እት ላይꬃ ግዶን ቄዳረ ቦንቹ ኡባይ ዉራና። 17 ቄዳረ ጋድያን ደእያ ዎንዳፍያን ዱክያ ዎልቃማ ኦላንቻቱዋፐ ጉꬃቱ አታና፤ ሄዋ መꬍና ጎዳይ እስራኤልያ ጾሳይ ኦዴዳ” ያጌዳ።