1 ጾሳይ ሀዋዳን ያጌ፤ ኢሳ. 13:1—14:23፤ ኤር. 50:1፤ 51:64 “ሀነ ባብሎነ ዎዶራተ፥ ዱገ ዎꬋ፤ ባናን ኡታ። ሀነ ካላዳዌቱዋ ናተ፥ ነ ካተቱዋ አራታ አጋደ ሳኣን ኡታ። አያዉ ጎፐ፥ ሀዋፐ ስንꬃናዉ ኔን ኦቶሮትያኖነ ሹጋቶ ጌተታካ። 2 ዎጻ አካደ ካꬃ ጋጫ። ነ ጉለꬃ ቃራ፤ ነ አዱሳ ማዩዋካ ከሳ። ነ ጸፕያ በሳ፤ ያታደ ሻፋቱዋ ፕና። 3 ነ ካሉ ቃረታና፤ ነ ፖኩካ ቤታና። ታን ሀሉዋ ከሳና፤ ኦስካ ቃረትከ” ያጌ።

4 ኑና ዎዝያዌ፥ አዉ ሱንꬃይ ኡባፐ ዎልቃማ መꬍና ጎዳ ግድያዌ፥ እስራኤልያ ጌሻ።

5 ጾሳይ ሀዋዳን ያጌ፤ “ሀነ ካላዳዌቱዋ ናተ፥ ባ፤ ꬉማን ጮኡ ጋደ ኡታሻ። አያዉ ጎፐ፥ ሀዋፐ ስንꬃዉ ኔን ካዉተꬃቱዋ ካታቶ ጌተታካ። 6 ታን ታ አሳ ሀንቀታድ፤ ታ ላታካ ቱንሳድ፤ ታን ኡንቱንቱ ነ ኩሽያን አꬃደ እማድ። ኔን ኡንቱንቶ ቃረታባካ፤ ጭሜዳዋንቱ ቦላንካ ነ ሞርገ ምꬃን ሎይꬃ ዴጸታዳ። 7 ኔን፥ ‘ታን መꬍናዉ ካታቶ ግዳና’ ያጋዳ። ሄዋ ድራዉ፥ ሀ የዎቱዋ ነ ዎዛናን ቆፓባካ፤ ኡንቱንቱ ዉርሰꬃካ ሀሳያባካ።

8 “ኔኖ ዎፑ ጋደ ኡቴዳነ እሻሉዋ ዶስያነ፥ ስሳ። ሳፃ 18:7-8 ነ ዎዛናን፥ ‘ታና፤ ታፐ አትና፥ ሀራይ ባዋ። ታን አምኤ ግድከ፤ ዎይ የላደ ናእ ባይና ማይነ ግድከ’ ያጋዳ። 9 ሀ ላኡ የዎቱ እት ጋላስ አይፊ ልጳናዉ፥ ነ ቦላ ያና። ነ ብታይ ዳራ፥ ነ ሙሩኑካ ዎልቃማ ዎልቃማ ግዶፐነ፥ ኔን ነ ናናቱዋፐ መላ አትያዌነ አምኤተꬃይ ነ ቦላ ኩመንꬃን ይያዌ አተና።

10 “ኔን ነ ኢታተꬃን አማነታ ኡታዳ፤ ቃይ፥ ‘ታና ኦንነ በኤና’ ያጋዳ። ነ አꬌዳ ኤራተꬃይነ ጭንጫተꬃይ ኔና ዎራ ካለꬅና፥ ኔን ነ ዎዛናን፥ ‘ታና፥ ታፐ አትና፥ ሀራይ ባዋ’ ያጋዳ። 11 ሽን ኔን ዋታ ሙሩኑዋን ሃሳንንቶ ኤረና ኢታይ ነ ቦላ ያና። ኔን ጋትያ ጭጋናዉ ዳንዳየና ቦሻይ ነ ቦላን ዎꬋና፤ ቃይ ኔን አያነ ኤረና ባሻይ ቆፐናን ነ ቦላ ያና።

12 “አነ ኔን ነ ናአተꬃደፐ ኦꬃደ ደኤዳ ነ ብታነ ነ ሙሩኑዋ ሀእካ አጎፓ። ኦን ኤሪ፥ ነ ጎዋዳን ሀናነንቶ፤ ዎይ ኔን አን ዳጋንꬃንንቶ። 13 ዞረ ጻላላን ነ ዳቡራዳ። ሳሉዋ ጾልንትያ ፓይድያዋንቱ፥ አ ጼሊደ ትምቢትያ ኦድያዋንቱ፥ ቃይ፥ አግና ጼሩዋን ጼሩዋን ነ ቦላን ያናዋ ኦድያዋንቱ አነ ኔና አሽኖ። 14 በአ፥ ኡንቱንቱ ዱርጫ ማላ፤ ታማይ ኡንቱንታ ማና። ኡንቱንቱ ታማ ላጩዋፐ ባረና አሻናዉ ዳንዳይክኖ። ሄዌ አሳይ ባረ ቦላ ሆኤꬃናዉ ሆእያ ቦንቆ ዎይ ቃይ አሳይ አ ስንꬃን ኡታናዉ ዳንዳይያ ታማ ግደና። 15 ኔን ኡንቱንቱና ዳቡሬዳዋንቱ፥ ነ ናአተꬃደፐ ዶሚደ፥ ኔናና ዛልኤዳዋንቱ ነዉ ሄዋ ማላ። ኡንቱንቱ ኡባይካ ባረ ባጋና ባጋና ላለታና፤ ኔና አሽያዌካ እቱነ ባዋ።