1 አቤት መꬍና ጎዳዉ፥ ኔን ሳሎቱዋ ዳካደ ዱገ ዎꬋ! ደረቱካ ጋጅ ጋጂደ ኮኮርኖ። 2 ታማይ ቃይጼርያ ሚደ፥ ሃꬃ ፐንትስያዋዳን፥ ዱገ ዎꬋአደ፥ ነ ሱንꬃ ነ ሞርከቶ ኤርሳ፤ ካዉተꬃቱዋካ ነ ስንꬃን ኮኮርሳ። 3 ካሰካ ኔን ኑን ናግቤና ማላልስያባ ኦꬄዳ ዎደ ዎꬋአዳ፤ ደረቱ ነ ስንꬃን ጋጅ ጋጂደ ኮኮሬድኖ። 4 በንፐ ዶሚደ፥ ኔናን አማነቲደ፥ ናግያዋንቶ ማላልስያባ ኦꬄዳ ኔፐ አትና፥ ሀራ ጾሳ አሳ ሀይꬃይ ስስቤና፤ አሳ አይፊካ በእቤና። 1 ቆሮ. 2:9 5 ጽሎተꬃ ናሸቲደ ኦꬅያዋንታነ ነ ኦግያን ኔና ሀሳይያዋንታ ኔን ጋካደ ማዳሳ። በአ፥ ኔን ሀንቀታዳ፤ ሽን ናጋራ ኦꬅያዋ አግበይኮ። ኑን ናጋራ ኦꬂደ፥ አዱሳ ዎድያ ደኤዶ፤ ያትና፥ ኑን ዋኒደ አታኔ? 6 ኑን ኡባይካ ቱና አሳ ግዴዶ፤ ኑ ጽሎተꬃ ኦሶ ኡባይካ ቅታ ጩርቃ ማላ። ኑን ኡባይካ ቦንጭያዳን ሹሌዶ፤ ኑ ናጋራይ ኑና ጫርኩዋዳን፥ ፕቲደ አፌዳ። 7 ነ ሱንꬃ ጼስያዌ፥ ዎይ ኔና ምንስ ኦይካናዉ ኮይያዌ ባዋ። አያዉ ጎፐ፥ ኔን ነ ዴሙዋ ኑፐ ገንꬃደ ናጋራይ ꬋይሳናዳን፤ ኑና ኑ ናጋራ ድራዉ፥ አጋዳ።

8 ግዶፐነ፥ አቤት መꬍና ጎዳዉ፥ ኔን ኑ አዉዋ፤ ኑን ኡርቃ፤ ኔን ኡርቃ መꬌዳዋ፤ ኑን ኡባይካ ነ ኩሽያን መቴዶ። 9 አቤት መꬍና ጎዳዉ፥ ሎይꬃ ሀንቀቶፓ፤ ኑ ናጋራካ መꬍናዉ ሀሳዮፓ። ኑና በአ፥ ኑን ኡባይካ ነ አሳ። 10 ነ ጌሻ ካታማቱ ባዙዋ ግዴድኖ፤ ሀራይ አትና፥ ጽዮነ ካታማይካ ባዙዋ ግዴዳ፤ የሩሳላመካ መላ ሳ ግዴዳ። 11 ኑ አዎቱ ኔና ጋላቴዳ ጌሻነ ሎኦ ግዴዳ ኑ ጌሻ ጎሊ ታማን ጹገቴዳ፤ ቃይ ኑ ሎኦ ሳአቱ ኡባይካ ባዬድኖ። 12 አቤት መꬍና ጎዳዉ፥ ኔን ሀዋ ኡባ በኣደካ ኑና አጋኒ? ኔን ጮኡ ጋደ፥ ኑና ዛዋይ ባይና ሙሩዋ ሙራኒ?