1 ጌዶና ናአይ አብመሌክ ሰኬማ ካታማን ደእያ ባረ ዳይ ዳቦቱዋኮ ቤዳ፤ ኡንቱንታነ ባረ ዳይ ዘረꬃ ኡባቱዋ ሀዋዳን ያጌዳ፤ 2 “አነ ሰኬማ ካታማን ደእያ አሳ ኡባ ሀዋዳን ያጊደ ኦችተ፤ ‘ጌዶና ላፑን ታሙ ናናይ ኡባይ ህንተንታ ሞዶፐ ሎኤየ? ዎይ እት አሳይ ሞዶፐ ሎኤ?’ ያጊደ ኦችተ። ታን ህንተዉ አሹዋን ማታ ዳቦ ግድያዋ ቃይ ዶጎፕተ” ያጌዳ።

3 ሄዋፐ ጉየ እዝ ዳይ ዳቦቱ ሀ ቃላ ኡባ አ ድራዉ ሰኬማ ካታማ አሳዉ ኦዴድኖ፤ አብመሌክ ኡንቱንቶ ዳቦ ግዴዳ ድራዉ፥ ሰኬማ አሳይ አ ካላናዉ ቆፋ ቃቼዳ። 4 ያጊደ ኡንቱንቱ ባኣል-ባሪታ ኤቃ ጎልያፐ ላፑን ታሙ ጻጋራ ብራ አኪደ፥ አዉ እሜድኖ።

አብመሌክ ሄ ብራን ሹፉሮቱዋነ ቦንቂያዋንታ ቃጻሪደ፥ ባረና ካላናዳን ኦꬄዳ። 5 ኦፍራ ግያ ሳን ደእያ ባረ አዉዋ ሶ ቢደ፥ ባረ እሻቱዋ፥ ጌዶና ናና ላፑን ታማቱዋ፥ እት ሹቻ ቦላን ሲፍሴዳ። ሽን ጌዶና ናአይ፥ ዉርሰꬃ ቴፋይ፥ ዮኣታመ ቆሰቲደ፥ ሀይቀናን አቴዳ። 6 ሄዋፐ ጉይያን፥ ሰኬማ አሳይነ ቤትሚሎ አሳይ እትፐ ሺቂደ፥ ሰኬማን ደእያ ጎይንያ ዎላ ቱሳኮ ቤድኖ፤ ያን አብመሌካ ካተዬድኖ።

7 ዮኣታመ ሄዋ ስሴዳ ዎደ፥ ቢደ ጋሪዛማ ደርያ ጼራ ከሲደ፥ ባረ ቃላ ꬎቁ ኦꬂደ፥ ሀዋዳን ያጊደ ዋሴዳ፤ “ህንተንቶ ሰኬማ አሳቶ፥ ህንተንቱ ታን ኦድያዋ ስስተ! ጾሳይካ ህንተንቱ ኦድያዋ ስሳናዋ።

8 “እት ጋላስ ምꬃቱ ኡባይ ሺቂደ፥ ባረንቱ ቦላ ካትያ ካተያናዉ ቢደ ዎጋራ፥ ‘ሃያ፥ ኑ ቦላ ካተታ’ ያጌድኖ። 9 ሽን አትክልትያ ሳአይ፥ ‘ታ ህንተንቱ ቦላ ካተታና ኮሽያዋ ግዶፐ፥ ጾሳቱዋነ አሳቱዋ ቦንችስያ ታ ዛይትያ እምያዋ አጋይ ግያዋ’ ያጊደ ዛሬዳ።

10 “ሄዋፐ ጉይያን፥ ምꬃቱ ባላስያ ጌተትያ ምꬃ፥ ‘ሃያ፥ ኑ ቦላ ካተታ’ ያጌድኖ። 11 ሽን ባላሲ፥ ‘ታ ህንተንቱ ቦላ ካተታና ኮሽያዋ ግዶፐ፥ ማልእያ ሎኦ አይፍያ አይፍያዋ አጋይ ግያዋ’ ያጊደ ዛሬዳ።

12 “ያትና፥ ምꬃቱ ዎይንያ ቱራ፥ ‘ሃያ፥ ኑ ቦላ ካተታ’ ያጌድኖ። 13 ሽን ዎይንያ ቱራይ፥ ‘ታ ህንተንቱ ቦላ ካተታና ኮሽያዋ ግዶፐ፥ ጾሳቱዋነ አሳቱዋ ናሸችያ ዎይንያ ኤሳ እምያዋ አጋይ ግያዋ’ ያጊደ ዛሬዳ።

14 “ያትና፥ ዉርሰꬃን ምꬃቱ ኡባይ ካሽያ፥ ‘ሃያ፥ ኑ ቦላ ካተታ’ ያጌድኖ። 15 ሄዋፐ ጉየ ካሺ፥ ‘ህንተ ቱሙፐ ታና ህንተንቱ ቦላ ካተያናዉ ኮዮፐ፥ ሃ ዪደ ታ ኩዋን ሸምፕተ። ሄዋ ህንተንቱ እጾፐ፥ ካሺያፐ ታማይ ከሲደ፥ ሊባኖሳ ዝጋቱዋ ሞ’ ያጌዳ።

16 “አብመሌካ ህንተንቱ ካተዬዳዌ ቱማተꬃንነ ሱረተꬃነ? ጌዶን ህንተንቶ ኦꬄዳዋ አኬኪደ፥ አ ጎለ አሳዉ በስያዋዳን ኩሽያ ዛሬድቴ? 17 ታ አዉ ህንተንቶ ኦለቴዳዋ አኬክተ፤ ሚድያማ አሳፐ ህንተንታ አሻና ያጊደ፥ ባረና ሀይቆ አꬂደ እሜዳ። 18 ሽን ህንተንቱ ሀቼ ታ አዉዋ ጎልያ አሳ ቦላን ደንዲደ፥ አ ላፑን ታሙ ናና እት ሹቻ ቦላን ሲፌድታ፤ ጌዶን ቆማትፐ የሌዳ አብመሌክ ህንተንቶ ዳቦ ግዴዳ ድራዉ፥ ሰኬማን ካተዬድታ። 19 ሀእ ስም ጌዶናዉነ አ ጎልያ አሳቶ ህንተንቱ ኦꬄዳ ኪታይ ቱማተꬃናነ ሱረተꬃና ግዶፐ፥ አብመሌካና እትፐ ናሸትተ፤ እካ ህንተናና ናሸቶ። 20 ሽን ሄዋ ግዳና ꬋዮፐ፥ አብመሌካፐ ታማይ ከሲደ፥ ሰኬማ አሳነ ቤትሚሎ አሳ ሞ፤ ሄዋዳንካ ቃይ፥ ሰኬማ አሳፐነ ቤትሚሎ አሳፐ ታማይ ከሲደ፥ አብመሌካ ሞ” ያጌዳ። 21 ዮኣታመ ባረ እሻ አብመሌካዉ ያዬዳ ድራዉ፥ ባቃቲደ ባኤራ ግያ ሳኣ ቢደ ያን ደኤዳ።

22 አብመሌክ እስራኤልያ ጋድያን ሄዙ ላይꬃ ካተቴዳ። 23 ሄዋፐ ጉይያን፥ ጾሳይ አብመሌካፐነ ሰኬማ አሳፐ ግዱዋን ኢታ አያና ኪቴዳ፤ ሰኬማ አሳይ አብመሌካ ቦላ አማነተናን እጺደ ደንዴዳ። 24 ጾሳይ ሄዋ ኦꬄዳዌ፥ አብመሌክ ባረ እሻቱዋ ዎꬌዳ ድራሳነ ጌዶና ላፑን ታሙ ናና ሱꬃ ሀሉዋ እ ጭገታናዳን ሰኬማ አሳይ አ ምንꬄዳ ድራሳ። 25 ሰኬማ አሳይ አማሬዳ አሳ ዶሪደ፥ ደርያ ጼራን አብመሌካ ቦላ ሙጊደ ኡታናዳን ኦꬄዳ። ሙግ ኡቴዳዋንቱ ኦግያና መንꬅያ አሳ ኡባ ቦንቄድኖ፤ አብመሌክ ሄዋ ኡባ ስሴዳ።

26 ሄዋፐ ጉይያን፥ ኤቤዳ ናአይ ጋኣል ባረ እሻቱዋና ሰኬማ ዬዳ፤ ሰኬማ አሳይ አን አማነቴዳ። 27 ኡባይካ ባረንቱ ጋደ ቢደ፥ ዎይንያ ቴራ ማጼድኖ፤ ዎይንያ ኤሳ አጊደ፥ ዎልቃማ ባላ ከሴድኖ። ባረንቱ ኤቃ ጎልያ ገሊደ፥ ያን ሚድነ ኡሺደ አብመሌካ ሸቄድኖ። 28 ኤቤዳ ናአይ ጋኣል፥ “ኑን ሰኬማ አሳይ ሞደታናዉ አብመሌክ ኦኔ? እ ጌዶና ናኣ ግደኔ? ዛቡልካ ሀ ካታማ ሞዳናዳን አብመሌክ ሱንꬄዳዋ ግደኔ? ሄዋፐ ሸኬማ አዉዋ ሀሞራ ዛረቶ አነ ሞደቴቶ። 29 ሀ አሳ ካለꬅያዌ ታና ግዳርክታሻ! ያትንቶ ታን አብመሌካ ድጋና ሽን። አብመሌካ ጼሳደ፥ ‘ነ ኦላንቻቱዋ ዳርሳ አካደ፥ ኦለታናዉ ሃያ’ ያጋና ሽን” ያጌዳ።

30 ኤቤዳ ናአይ ጋኣል ጌዳዋ ካታማ ሞድያ ዛቡል ስሴዳ ዎደ፥ ሀንቁዋ ኤጽ ከሴዳ፤ 31 ያቲደ አሩማ ካታማን ደእያ አብመሌካኮ አሳ ኪቴዳ። ሄዋፐ፥ “ኤቤዳ ናአይ ጋኣልነ አ እሻቱ ሰኬማ ዬድኖ፤ ካታማን ደእያ አሳ ነ ቦላ ደንꬄድኖ። 32 ሄዋ ድራዉ፥ ኔንነ ኔናና ደእያ አሳይ ቃማን ደንዲደ፥ ሾይቃን ሙጊደ ናግተ። 33 ዎንታ ጉራ አዋይ ኬሲያ ዎደ፥ ኡንቱንቱ አኬከናን ካታማ ቦላ ዎራጅተ፤ ጋኣልነ አናና ደእያ አሳይ ህንተንታ ኦላናዉ ከስያ ዎደ፥ ህንተንቶ ሀኔዳ ኬሻ ምኒደ ኦለትተ” ያጌዳ።

34 አብመሌክነ አናና ደእያ አሳይ ኡባይ ቃማን ደንዲደ፥ ሰኬማፐ ካረና ኦይዱ ጭታን ሻከቲደ ሙጌድኖ። 35 አብመሌክነ አናና ደእያ አሳይ ኤቤዳ ናአይ ጋኣል ከሲደ፥ ካታማ ገልያ ፐንግያን ኤቄዳዋ በኢደ፥ ቆሰቴዳ ሳፐ ከሴድኖ። 36 ጋኣል አሳ በኤዳ ዎደ ዛቡላ፥ “ጼላ! አሳይ ደረቱዋ ሁጲያፐ ዎꬌ” ያጌዳ።

ሄዋፐ ጉየ ዛቡል፥ “ሄዋንቱ አሳ ግድክኖ፤ ደረቱዋ ኤሹ አሳ ማላትያዋ በኣደ ጋዳ” ያጊደ ዛሬዳ።

37 ጋኣል ዛረꬂደ፥ “ጼላ! አሳይ ደርያዉ ግዱዋ ኦይቂደ ዎꬌ፤ ሀራ ጭታይ ቃይ ሻሬቻቱ ዎላይ ደእያ ኦግያና ዬ” ያጌዳ።

38 ያትና፥ ዛቡል ጋኣላ፥ “ ‘ኑን አዉ ሞደታናዉ አብመሌክ ኦኔ?’ ያጌዳ ነ ዶናይ ሀእ ሀቃ ቤዴ? ሀዋንቱ ኔን ካꬌዳ አሳቱዋ ግድክኖየ? ሀእ ከሳደ ኡንቱንቱና ኦለታ!” ያጌዳ። 39 ሄዋፐ ጉየ ጋኣል ሰኬማ አሳ ካለꬅ ከሲደ፥ አብመሌካና ኦለቴዳ። 40 አብመሌክ የደርስና፥ ጋኣል ባቃቴዳ፤ ካታማ ገልያ ፐንግያ ጋካናዉ ዳራቱ ደሸቲደ ኩንዴድኖ። 41 አብመሌክ አሩማን ደእና፥ ዛቡል ጋኣላነ አ እሻቱዋ ሰኬማፐ የደርሲደ ከሴዳ።

42 ዎንተꬃ ጋላስ ሰኬማ አሳይ ጎሻዉ ቤዳዋ አብመሌክ ስሴዳ፤ 43 ባረ አሳ አኪደ፥ ሄዙ ጭታን ሻክ፥ ሾይቃን ሙጊደ ናጋናዳን ኦꬄዳ። ያቲደ አሳይ ካታማፐ ከስያዋ በኤዳ ዎደ፥ ኡንቱንታ ዎꬋናዉ ቆሰቴዳ ሳፐ ከሴዳ። 44 አብመሌክነ አናና ደእያ ጭታይ ስንꬃዉ ዎጽ ቢደ፥ ካታማ ገልያ ፐንግያን ኤቄድኖ፤ አቴዳ ላኡ ጭታቱ ጎሻን ደእያ አሳቱዋ ኦለቲደ ዎꬌድኖ። 45 ጋላሳ ኡባ አብመሌክ ካታማ አሳና ኦለቲደ ካታማ ኦይቄዳዋፐ ጉይያን፥ ካታማን ደእያ አሳ ኡባ ዎꬌዳ። ያቲደ ካታማ ክንቼዳ፤ ኡባ ጋድያ ቦላ ማጽንያ ዘሬዳ።

46 ሰኬማ አዱሳ ግምቢያ ግዱዋን ደእያ አሳይ ኡባይ ሄዋ ስሴዳ ዎደ፥ ኤል-ባሪታ ኤቃ ጎለን ደእያ ጌሱዋ ግዶ ገሌዳ። 47 ኡንቱንቱ ሄ ሳኣን ሺቄዳዋ አብመሌክ ስሴዳ። 48 እነ አናና ደእያ አሳይ ኡባይ ደርያ ጻልሞና ፑደ ከሴድኖ። አብመሌክ ካልታ አኪደ፥ ምꬃ ታሽያ ቃንጺደ፥ ባረ ሀሽያን ቶኬዳ፤ ባረናና ደእያ አሳቱዋ፥ “ታን ኦꬅሽን በኤዳዋ፥ ህንተንቱካ ኤለካ ሀእ ኦꬅተ” ያጌዳ። 49 ሄዋፐ ጉየ አሳይ ኡባይካ ምꬃ ታሽያ ቃንጽ አኪደ፥ አብመሌካ ካሌዳ፤ ሄ ታሸቱዋ ጌሱዋ ዩሹዋን ዘምፔስ ዎꬂደ፥ አሳይ አ ግዶን ደእሽን ታማ ኦይꬄድኖ፤ ያትና፥ ጌሱዋ ግዶን ደእያ አሳይ ኡባይ ሀይቂ ዉሬዳ። ሀይቄዳ አቱማ አሳነ ማጫ አሳ ፓይዱ እት ሻኣ ግዳናዋ።

50 ሄዋፐ ጉይያን፥ አብመሌክ ተበጻ ጌተትያ ካታማ ቢደ፥ ካታማ ዶዲደ ኦይቄዳ። 51 ሄ ካታማ ግዶን እት ምኖ አዱሳ ግምቢ ደኤ። ካታማ አሳይ ኡባይ፥ ማጫዌ አቱማዌ፥ ካለꬅያዋንቱ አተናን ሄ አዱሳ ግምቢያኮ ያ ዎጺደ፥ አ ግዶ ገሌድኖ፤ ፐንግያ ጎርዲደ፥ ግምቢያ ቦላ ደምባዪደ ኬጼድኖ ፑደ ከሴድኖ። 52 አብመሌክ ኦለቲደ አዱሳ ግምቢያ ጋኪደ፥ ታማን ጹጋናዉ ፐንግያኮ ሺቄዳ። 53 ሽን እት ምሽራታ አብመሌካ ሁጲያን ዎጻ ማይድያ ጎንዶርሳ ኦላደ፥ አ ጉግያ ሆምፑ ኦꬃዱ።2 ሳሜላ 11:21 54 ባረ ኦላ ሚሻ ቶክያ ዎዳላ ኤለካ ጼጊደ፥ “ታና አሳይ፥ ‘ኤበላ ማጫውና ዎꬋዱ’ ጌና ማላ፥ ነ ማሻ ሾኩዋፐ ሾዳደ፥ ታና ዎꬋ” ያጌዳ። ሄዋፐ ጉየ ዎዳላይ ማሻን ጫዲና እ ሀይቄዳ። 55 እስራኤልያ አሳይ ኡባይ አብመሌክ ሀይቄዳዋ በኢደ፥ ባረ ሶ ባረ ሶ ቤዳ።

56 አብመሌክ ባረ እሻቱዋ ላፑን ታማቱዋ ዎꬊደ፥ ባረ አዉዋ ቦላ ኦꬄዳ ጎምያ ጾሳይ አ ቦላ ዛሬዳ። 57 ሄዋዳንካ፥ ጾሳይ ሰኬማ አሳ ኢታተꬃ ኡባ ኡንቱንቱ ቦላ ዛሬዳ። ሄዋዳን ሀኒደ፥ ጌዶና ናአይ ዮኣታመ ሸቄዳ ሸቃይ ኡንቱንታ ጋኬዳ።