1 ካዉተꬃቱዋባ ኦዳናዉ መꬍና ጎዳይ ኤርማሳዉ ኪቴዳ ቃላይ ሀዋ።

2 እዮስያሳ ናአይ እዮአቄም ይሁዳን ካተቴዳ ኦይደንꬆ ላይꬃን፥ ኤፍራጺሳ ሻፋ ማታን፥ ካርካሚሻ ግያ ሳኣን፥ ባብሎነ ካቲ ናቡካዳናጾር ጾኔዳ ግብጼ ካትያ ናኮ ኦላንቻቱዋባ ጾሳይ ሀዋዳን ያጌ፤ ኢሳ. 19:1-25፤ ህዝ. 29:1—32:32 3 “ህንተ ዎጋ ጎንዳልያነ ቄር ጎንዳልያ ጊግስተ፤ ኦላዉ ሳልፕተ! 4 ህንተ ፓራ ብጻሊደ ቶግተ፤ ህንተ ሁጲያን ብራታ ቆብያ ዎꬂደ፥ ህንተ ሳኣ ሳኣ ኦይቂተ! ህንተ ቶራ ሌፍተ፤ ህንተ ኦላ ማዩዋካ ማይተ! ያጊኖ።

5 “ሽን ሀዌ ታን በእያዌ አዬ? ግብጼ ኦላንቻቱ ያዪደ፥ ጉየ ስሜድኖ። ዎልቃማቱ ጾነቴድኖ፤ ጉየነ ጼለናን ኤሌሊደ ባቃቴድኖ። ኡንቱንቱ ዩሾ ኡባን ዳጋማይ ደኤ! መꬍና ጎዳይ ሀዋ ኦዳይ። 6 ኤሌሊደ ዎጽያዋንቱ ከስ አካናዉ ዳንዳይክኖ፤ ምኖ ኦላንቻቱካ አታናዉ ዳንዳይክኖ። ሁጲሳ ባጋ ቢታን፥ ኤፍራጺሳ ሻፋ ማታን ኡባይካ ꬉበቲደ ኩንድ አጊኖ።

7 “ሄዌ ናይለ ሻፋይ ኩሚደ፥ ዩሹዋ ኡባ ኩምያዋዳን፥ ቢታ ኡባ ኩሜዳዌ ኦኔ? 8 ሄዌ ናይለ ሻፋይ ኩሚደ፥ ዩሹዋ ኡባ ኩምያዋዳን፥ ቢታ ኡባ ኩሜዳዌ ግብጼ! ግብጼ ሀዋዳን ያጌ፤ ‘ታን ክጻደ፥ ቢታን ሳኣን ኤላና፤ ካታማቱዋነ ካታማቱዋን አሳ ኡባ ባይዛና። 9 ፓራቶ፥ ፕሪጽተ! ፓራ ጋረቱዋ ላግያዋንቶ፥ ኤለካ ላግተ! ጎንዳልያ ኦይቄዳ ቶጵያፐነ ሊብያፐ *ሊብያፐ፦ እብራዌꬁዋን “ፑጻ” ጌተቴ። ዬዳ ኦላንቻቶ፥ ከስተ! ሊድያፐ ዬዳ ዎንዳፍያ ዱከꬃን ሎሄዳ ኦላንቻቶ፥ ዎራጅተ!’ ያጌ” ያጌዳ።

10 ሄ ጋላሳይ ጎዳይ፥ ኡባፐ ዎልቃማ መꬍና ጎዳ ጋላሳ፥ ጾሳይ ባረ ሞርከቱዋ ቦላን ሀሉዋ ከስያ ጋላሳ። አ ማሻይ ካላና ጋካናዉ፥ ኡንቱንታ ማና፤ አላና ጋካናስካ ኡንቱንቱ ሱꬃ ኡሻና። አያዉ ጎፐ፥ ጎዳይ፥ ኡባፐ ዎልቃማ መꬍና ጎዳይ ሁጲሳ ባጋ ቢታን፥ ኤፍራጺሳ ሻፋ ማታን ኡንቱንታ ያርሹዋ ኦꬂደ አካና። 11 ህንተኖ፥ ግብጼ አሳቶ፥ ጋላኣደ ቢታ ቢደ፥ ህንተዉ ኦከትያ ꬋልያ ደምተ። ግዶ ሽን፥ ህንተ ጮ መላ ꬋልያ ዳርሲታፐ አትና፥ ህንተዉ ፓጹ ሙለ ባዋ። 12 ህንተ ዬላ ካዉተꬃቱ ስሴድኖ፤ ህንተ ዬክያ ዬኩዋ ቢታይ ሳአይ ስሴዳ። አያዉ ጎፐ፥ ህንተ ኦላንቻቱ እቱ እቱዋን ꬉበቲደ፥ ኡባይ እትፐ ኩንዴድኖ።

13 ባብሎነ ካቲ ናቡካዳናጾር ግብጼ ቢታ ኦላናዉ ይያ ዎደ፥ መꬍና ጎዳይ ትምቢትያ ኦድያ ኤርማሳዉ ኦዴዳ ቃላይ ሀዋ:ኤር. 43:10-13 14 “ሀዋ ግብጼን ኦዳ፤ ቃይ ግብጼ ካታማቱዋን ምግዶላን፥ መምፕሳንነ ጻፍናሳን አዋያ። ‘ኦላይ ህንተ ዩሹዋን ደእያ አሳ ኡባ ዉርሲድ ደእያ ድራዉ፥ ደንድ ኤቂደ ጊገትተ!’ ያጋ። 15 ህንተ ዎልቃማ ኦላንቻቱ አያዉ ኩንዴድኖ? መꬍና ጎዳይ ኡንቱንታ ሱጌዳ ድራዉ ኩንዴድኖ። 16 ህንተ ኦላንቻቱ ꬉበቲደ ኩንዴድኖ። እቱ እቱዋ፥ ‘ደንድተ! ሀ ሞርክያ ማሻፐ አታናዉ፥ ኑ አሳኮ፥ ኑ ቢታ አነ ስሜቶ’ ያጊኖ። 17 ኡንቱንቱ ያን ግብጼ ካትያ ፓሮና፥ ‘ባረ ካጫን ጎኤተናን ጮ አꬅያ ኦዳንቻ’ ጊደ ሱንꬃና” ያጌዳ።

18 ኡባፐ ዎልቃማ መꬍና ጎዳ ጌተትያ ካቲ ሀዋዳን ያጌ፤ “ታን ታ ደኡዋን ጫቃይ: ደረቱዋ ግዱዋን ታቦራ ደሪ፥ ዎይ አባ ላንቂያን ደእያ ቃርመሎሳ ደሪ አዱቂያዋዳን አዱቂያ ሞርኪ ህንተ ቦላ ያና። 19 ህንተኖ፥ ግብጼ ቢታን ደእያዋንቶ፥ ኦሞዱዋን ባናዉ ጊግተ። አያዉ ጎፐ፥ መምፒሳ ካታማይ ኮለቲደ፥ ኦንነ ደኤና ባዞ ግዳናዋ።

20 “ግብጼ ቢታይ ሎእያ ኡሳት ማላ፤ ሽን ሁጲሳ ባጋ ቢታፐ ይያ ዱክያ ኡዱንጽያን አ ሳኤታና። 21 ግብጼን ሚሻይ ጭገትያ ኦላንቻቱ ሞꬌዳ ኮሩማቱዋ ማላ። ኤ፥ ኡንቱንቱካ እትፐ ጉየ ስሚደ ባቃቴድኖ፤ ኡንቱንቱ ባረንቱ ሳኣን ኤቂበይክኖ። አያዉ ጎፐ፥ ኡንቱንቱ ባየꬃ ጋላሳይ፥ ኡንቱንቱ ሙረታና ዎዲ ጋክ ክቼዳ።

22 “ሞርከቱ ዎልቃን ገልያ ዎደ፥ ግብጼ አሳይ ባቃትያ ሾሻዳን ሶልዳና፤ ሄ ሞርከቱ ምꬃ ቃንጽያ አሳቱዋዳን፥ ካልታ አኪደ፥ አ ቦላ ያና። 23 አሳይ ስጽማ ዎራ ቡꬂደ ꬋይስያዋዳን፥ ግብጼ አሳ ሲፍ ዉርሳና። ታን መꬍና ጎዳይ ሀዋ ኦዳይ። ሞርከቱዋ ፓይዱ ቦልያፐካ ጮራቴ፤ ኡንቱንታ ፓይዳናዉ ዳንዳየተና። 24 ግብጼ አሳይ ካዉሻና፤ ሁጲሳ ባጋፐ ይያ አሳቱዋ ኩሽያንካ አꬊደ እመታና” ያጌ።

25 ኡባፐ ዎልቃማ መꬍና ጎዳይ፥ እስራኤልያ ጾሳይ ሀዋዳን ያጌ፤ “ታን ቴብሳ ካታማ ጾሳ አሞና፥ ግብጼ ካትያ፥ ግብጼ ቢታነ ግብጼ ጾሳቱዋ፥ ግብጼ ካተቱዋነ ግብጼ ካትያን ዘምፕያዋንታ ኡባ ሙራና። 26 ኡንቱንቱ ዎꬋናዉ ኮይያ ባብሎነ ካትያ ናቡካዳናጾራ ኩሽያንነ አ ኦላንቻቱዋ ኩሽያን አꬃደ እማና።

“ሄዋፐ ስምና፥ ግብጼ ቢታይ ካሰዋዳን አሳይ ደእያ ቢታ ግዳናዋ። መꬍና ጎዳይ ሀዋ ኦዳይ።

27 “ህንተኖ፥ ታ ቆማቶ፥ ያቆባ ዛረቶ፥ ያዮፕተ!ኤር. 30:10-11 ህንተኖ፥ እስራኤላቶ፥ ዳጋሞፕተ! ህንተ ሃኮ ሳን ደእሺና፥ ታን ህንተና አሻና፤ ህንተ ዛራቱዋካ ኡንቱንቱ ኦሞደቲደ ቢታፐ የድሳና። ያቆባ ዛራቱ ስሚደ፥ አየንቶ ቦቼናን ሳሮ ደአና። ኡንቱንታ አይ አሳይነ ያሽሰና። 28 ህንተኖ፥ ታ ቆማቶ፥ ያቆባ ዛረቶ፥ ታን መꬍና ጎዳይ ህንተናና ደእያ ድራዉ፥ ያዮፕተ! ታን ህንተና ላሌዳ ካዉተꬃቱዋ ኡባ ኡባና ꬋይሳና፤ ሽን ህንተና ኡባና ꬋይስከ። ታን ህንተና ልከ ፕርዳን ሙራና፤ ሙራይ ባይናን ህንተና ኡባና ጮ የድከ። ጾሳይ ሀዋ ኦዳይ” ያጌ።