1 የሱስ፥ “ታን ህንተንቶ ቱሙዋ ኦዳይ፤ ዶርሳ ስኩዋ ፐንግያና ገለናን ሀራሳና ገልያ ኦንነ ካይሱዋነ ፓኑዋ። 2 ሽን ፐንግያና ገልያዌ ዶርሳ ሄምያ አሳ። 3 ፐንግያ ናግያዌ አዉ ፐንግያ ዶዬ፤ ዶርሳቱካ አ ኮሻ ስሳና፤ እ ባረ ዶርሳቱዋ ኡንቱንቱ ሱንꬃን ሱንꬃን ጼሲደ፥ ካረ ካለꬃና። 4 እ ባረዋንታ ካረ ከሴዳዋፐ ጉይያን፥ ኡንቱንቱፐ ስንꬃና ሀመቴ፤ ኡንቱንቱካ አ ኮሻ ኤርያ ድራዉ፥ አ ካሊኖ። 5 ሀራ ኡራ ኮሻ ኡንቱንቱ ኤረና ድራዉ፥ አፐ ባቃታናፐ አትን፥ አ ጌዱዋ ካልክኖ” ያጌዳ።

6 የሱስ ኡንቱንቶ ሀ ሌምሱዋ ኦዴዳ፤ ሽን እ ኡንቱንቶ አይ ኦድንቶነካ ኡንቱንቱ አኬክበይክኖ።

7 የሱስ ቃይካ ኡንቱንቶ፥ “ታን ህንተንቶ ቱሙዋ ኦዳይ፤ ታን ዶርሳቶ ገልያ ፐንግያ። 8 ታፐ ካሰ ዬዳ ኡባይ ካይሱዋነ ፓኑዋ፤ ሽን ዶርሳቱ ኡንቱንቱ ግያዋ ስስበይክኖ። 9 ፐንጊ ታና፤ ታናን ገልያ ኦንነ አታናዋ። እ ገላናነ ከሳና፤ ቃይ ሎኦ ማታይ ደእያ ሳካ ደማናዋ። 10 ካይሱ ዉአናዉ፥ ዎꬋናዉነ ꬋይሳናዉ ይያዋፐ አትን፥ ሀራባዉ ዬና፤ ታን ኡንቱንቶ ደኡ ደአና ማላነ ኩሚደ ፓላሀና ማላ ያድ።

11 “ታን ዶርሳ ሎይꬃ ሄምያዋ፤ ዶርሳ ሎይꬅ ሄምያዌ ሄ ዶርሳቱዋ ድራዉ ሀይቄ። 12 ሚሻ አኪደ ሄምያ ኡራይ ዋልያ ይያ ዎደ በኢደ፥ ዶርሳቱዋ የግ ባሺደ ባቃቴ። አያዉ ጎፐ፥ ዶርሳቱ አዋንታ ግድክኖ፤ ቃይ እካ ዶርሳቱዋ ሄምያዋ ግደና። ሄዋ ድራዉ፥ ዶርሳቱዋ ኦይቄነ ላሌ። 13 ሻሉዋ አኪደ ሄምያዌ ባረ ሻሎ ሄምያ ድራዉነ ዶርሳባይ አ ቆፈና ድራዉ፥ ዶርሳቱዋ አጊደ ባቃቴ።

14-15 “ታን ዶርሳ ሎይꬃ ሄምያዋ፤ ታ አቡ ታና ኤርያዋዳን፥ ታንካ ቃይ ታ አባ ኤራይ። ሄዋዳንካ፥ ታን ታ ዶርሳቱዋ ኤራይ፤ ታ ዶርሳቱካ ታና ኤሪኖ። ቃይ ታን ታ ዶርሳቱዋ ድራዉ፥ ሀይቃናዉ ኮያድ። 16 ሀ ስኩዋን ባይና ሀራ ዶርሳቱካ ታዉ ደኢኖ። ታን ኡንቱንታካ አሀናዉ በሴ። ቃይ ኡንቱንቱ ታ ኮሻ ስሳና፤ እት ዉዲ ደአና፤ ሄምያዌካ እቱዋ ግዳናዋ።

17 “ታን ታ ሸምፑዋ ዛራደ አካና ማላ፥ አꬃደ እማናዉ ኮይያ ድራዉ፥ ታ አቡ ታና ሲቄ። 18 ታን ዶሳደ ታ ሸምፑዋ አꬃ እምያዋፐ አትን፥ ታፐ ኦንነ አከና። ታዉ ታ ሸምፑዋ አꬃ እምያ ማታይ ደኤ፤ ቃይ ዛራደ አካናዉካ ማታይ ደኤ። ታን ሀ አዛዙዋ ታ አዉዋፐ አካድ” ያጌዳ።

19 ሄ ሃሳያ ድራዉ፥ አይሁዳቱዋ ግዱዋን ቃይካ ሻኩ መቴዳ። 20 ኡንቱንቱፐ ዳርያ ባጋይ፥ “አን ጻላሂ ደኤ! እ ጎዬ! አ ሃሳያ አያዉ ስሲቴ?” ያጌድኖ።

21 ሀራቱ ቃይ “ጻላሂ ኦይቄዳ አሳይ ሀዋዳን ሃሳየና፤ ጻላሂ ቆቃ አሳ አይፍያ ጼልሳናዉ ዳንዳዪዬ?” ያጌድኖ።

22 የሩሳላመን ጌሻ ጎልያ አንጅሴዳ ጋላሳ ሀሳይስያ ባላይ ጋኬዳ፤ ሳአይ ሄ ዎደ ባልጉዋ። 23 የሱስ ጌሻ ጎልያን ሶሎሞና ባራንዳን፥ ያነ ሃነ ሀመቴ። 24 አይሁዳቱ የሱሳ ማታን ዩይ አꬊደ፥ “ኔን ኑና አዉደ ጋካናዉ ስꬍሳደ ዎꬃኒ? ኔን ክርስቶሳ ግዶፐ፥ ኑዉ ጌሻደ ኦዳ” ያጌድኖ።

25 የሱስ ኡንቱንቶ ዛሪደ፥ “ታን ህንተንቶ ኦዳድ፤ ሽን ታና አማንክታ፤ ታን ታ አቡ ሱንꬃን ኦꬅያ ኪታይ ታባ ማርካቴ። 26 ሽን ህንተንቱ ታ ዶርሳ ግደና ድራዉ አማንክታ። 27 ታ ዶርሳቱ ታ ኮሻ ስሲኖ፤ ታን ኡንቱንታ ኤራይ፤ ኡንቱንቱካ ታና ካሊኖ። 28 ታን ኡንቱንቶ መꬍና ደኡዋ እማይ፤ ቃይ ኡንቱንቱ ኡባካ ሀይቂክኖ። ኦንነ ታ ኩሽያፐ ኡንቱንታ ዎꬅ አካናዉ ዳንዳየና። 29 ኡንቱንታ ታዉ እሜዳ ታ አቡ ኦፐነ *ኦፐነ፦ ኡባፐ ጉሳ። አꬌ፤ ኦንነ ታ አቡ ኩሽያፐ ኡንቱንታ ዎꬅ አካናዉ ዳንዳየና። 30 ታነ ታ አቡ እቱዋ” ያጌዳ።

31 አይሁዳቱ የሱሳ ጫዳናዉ ቃይካ ሹቻ ደንꬄድኖ። 32 የሱስ ኡንቱንታ፥ “ታን ኦꬃናዉ ታ አቡ ታዉ እሜዳ ዳሮ ሎኦ ኦሱዋ ህንተንታ በሳድ፤ ሄዋንቱፐ ሀቃዋንቱ ድራዉ፥ ታና ሹቻን ጫዳናዉ ኮዪቴ?” ያጌዳ።

33 አይሁዳቱ ዛሪደ፥ “ኑን ኔና ሎኦ ኦሱዋ ድራዉ፥ ሹቻን ጫዳናዉ ኮዮኮ፤ ሽን ኔን ጾሳ ቦላ ቦርያ ቃላ ሃሳይያ ድራዉነ ቃይ አሳ ግዳደ ነ ሁጲያ ጾሳ ኦꬄዳ ድራዉ፥ ጫዳናዉ ኮዬቶ!” ያጌድኖ። ዎጋ 24:16

34 የሱስ ዛሪደ፥ “ህንተንቱ ህግያን ጾሳይ፥ ‘ህንተ ጾሳቱዋ’ ጌዳዌ ጻፈትቤኔ?ማዝ. 82:6 35 ጾሳ ማጻፋቱዋ ላማናዉ ዳንዳየተና፤ ጾሳይ ባረ ቃላይ ዬዳ አሳቱ፥ ‘ጾሳቱዋ’ ጊደ ጼሴዳዋ ግዶፐ፥ 36 ታን፥ ‘ታን ጾሳ ናኣ’ ጌዳ ድራዉ፥ ታ አቡ አንጂደ፥ ሳኣ ኪቴዳ ታና፥ ‘ጾሳ ቦላ ቦርያ ቃላ ሃሳያ’ ያጊቴ? 37 ታን ታ አቡ ኦꬅያዋ ኦꬃና ꬋዮፐ፥ ታና አማኖፕተ። 38 ሽን ታን ኦꬅያዋ ግዶፐ፥ ሀራይ አቶ ህንተንቱ ታና አማናና ꬋዮፐካ፥ ታ አቡ ታናን ደእያዋነ ታንካ ታ አቡን ደእያዋ ኤራናዳንነ አኬካናዳን፥ ታ ኦሱዋ አማንተ” ያጌዳ።

39 ቃይካ ኡንቱንቱ አ ኦይቃናዉ ኮዬድኖ፤ ሽን እ ኡንቱንቱፐ ከስ አኪደ ቤዳ።

40 ዮሃንስ ካሰ ጻማቅያሳ ዮርዳኖሳ ሻፋፐ ሄፍንꬃ የሱስ ፕኒደ፥ ያን ደኤዳ። 41 ዳሮ አሳይ የሱሳኮ ዪደ፥ “ዮሃንስ ዎልቃማ ማላታ ኦꬅቤና፤ ሽን እ ሀ ብታንያባ ሃሳዬዳባይ ኡባይ ቱማ” ያጌድኖ። 42 ያን ዳሮ አሳይ የሱሳ አማኔዳ።