1 “ታን ሀዋ ህንተንቱ ꬉበተና ማላ፥ ህንተንቶ ኦዳድ። 2 ኡንቱንቱ ህንተንታ ባረንቱ አይሁዳ ዎሳ ጎልያፐ ከስ የዳናዋንታ። ሄዋ ቦላ ቃይ ህንተንታ ዎꬍያ ኡራይ ጾሳዉ ኦꬅያዋ አዉ ማላትያ ዎዲ ያናዋ። 3 ኡንቱንቱ ሄዋ ህንተንቱ ቦላ ኦꬅያዌ ታናነ አዉዋ ኤረና ድራሳ። 4 ሽን ኡንቱንቱ ሄዋ ህንተንቱ ቦላ ኦꬅያ ዎዲ ጋክያ ዎደ፥ ታን ህንተንቶ ኦዴዳዋ ህንተንቱ ሀሳያና ማላ፥ ታን ህንተንቶ ሀዋ ኦዳድ።

“ታን ህንተናና ደእያ ድራዉ፥ ኮይሮ ሄዋ ህንተንቶ ኦዳበይከ። 5 ሽን ሀእ ታን ታና ኪቴዳዋኮ ባይ፤ ሽን ህንተፐ ኦንነ፥ ‘ሀቃ ባይ?’ ጊደ ታና ኦችያዌ ባዋ። 6 ሽን ታን ሀዋ ኦዴዳ ድራዉ፥ ህንተንቱ ዎዛናን ዳሮ ካዩ ደኤ። 7 ሽን ታን ህንተንቶ ቱሙዋ ኦዳይ፤ ታን ብያዌ ህንተንቶ ሎአ። አያዉ ጎፐ፥ ታን ባና ꬋዮፐ፥ መንꬅያዌ ህንተንቱኮ ዬና፤ ሽን ታን ቦፐ፥ አ ህንተንቱኮ የዳና። 8 ቃይ መንꬅያዌ ዪደ፥ ኡንቱንቱ ናጋራባ፥ ጾሳ ጽሎተꬃባነ ፕርዳባ ሀ ሳኣ አሳይ ባይዜዳዋ በሳናዋ። 9 ናጋራባይ አሳይ ታና አማነና ድራሳ። 10 ጽሎተꬃባይ ቃይ ታን አዉዋኮ ብያ ድራዉ፥ ህንተንቱ ታና ላኤንꬁዋ በእክታ። 11 ጾሳ ፕርዳባይ ቃይ አላምያ ሞድያዌ ፕርደቴዳ ድራሳ።

12 “ታን ህንተንቶ ኦድያባይ ዳሮባይ ደኤ፤ ሽን ሀእ ህንተንቶ ገለና። 13 ቱማተꬃ አያናይ ይያ ዎደ፥ ህንተንታ ቱማተꬃ ኡባኮ ካለꬃናዋ። አያዉ ጎፐ፥ እ ባረ ስሴዳዋ ኦዳናፐ አትን፥ ባረፐ አይነ ኦደና። ቃይ ስንꬃፐ ያናባ ህንተንቶ እ ኦዳናዋ። 14 እ ታና ቦንቻናዋ፤ አያዉ ጎፐ፥ እ ታዉ ደእያዋፐ አኪደ፥ ህንተንቶ ኦዳናዋ። 15 አዎ ደእያባይ ኡባይ ታዋ፤ መንꬅያዌ ታዉ ደእያባፐ አኪደ፥ ህንተንቶ ኦዳናዋ ታን ጌዳዌ ሀዋሳ።

16 “ጉꬃ ዎድያፐ ጉይያን፥ ህንተንቱ ታና በእክታ፤ ቃይ ጉꬃ ዎድያፐ ጉይያን፥ ህንተንቱ ታና በአና” ያጌዳ።

17 የሱሳ ካልያዋንቱፐ እቱ እቱ ባረንቱ ግዶን፥ “ ‘ጉꬃ ዎድያፐ ጉይያን፥ ህንተንቱ ታና በእክታ፤ ቃይ ጉꬃ ዎድያፐ ጉይያን፥ ህንተንቱ ታና በአንታ፤ አያዉ ጎፐ፥ ታን አዉዋኮ ባይ’ ግያዌ ሄዌ ዋግያዌ?” ያጌድኖ። 18 “ ‘ጉꬃ ዎድያፐ ጉይያን’ ግያዌ ዋግያዌ? እ አያዉ ሃሳይንቶነ ኑዉ ኤረተና” ያጌድኖ።

19 ኡንቱንቱ ባረና ኦቻናዉ ኮይያዋ የሱስ ኤሪደ፥ ኡንቱንታ ያጌዳ፤ “ታን፥ ‘ጉꬃ ዎድያፐ ጉይያን፥ ህንተንቱ ታና በእክታ፤ ቃይ ጉꬃ ዎድያፐ ጉይያን፥ ህንተንቱ ታና በአና’ ጌዳዎ ህንተንቱ እቱ እቱዋ ኦቺቴ? 20 ታን ህንተንቶ ቱሙዋ ኦዳይ። ህንተንቱ ዬካናነ ካዮታና፤ ሽን ሀ አላሚ ናሸታና። ቃይ ህንተንቱ ካዮታና፤ ሽን ህንተንቱ ካዮቶዌ ናሸቻ ግዳናዋ። 21 እት ምሽራታ ናኣ የላና ሀንያ ዎደ፥ ባረ የልያ ዎዲ ጋኬዳ ድራዉ፥ ኦይቀታዉ፤ ሽን ናአይ የለቴዳዋፐ ጉይያን፥ ናአይ ሀ ሳኣን የለቴዳ ናሸቻ ድራዉ፥ ባረ ኦይꬃ ሀሳዩኩ። 22 ሄዋ ድራዉ፥ ህንተንቱካ ህንተንቱ ዎዛናን ካዮቲታ፤ ሽን ታን ላኤንꬁዋ ህንተንታ በአና፤ ቃይ ህንተንቱ ዎዛናይ ሎይꬅ ናሸታና፤ ህንተንቱ ናሸቻ ኦንነ ህንተፐ አከና።

23 “ሄ ጋላስ ህንተንቱ ታና አይነ ዎስክታ። ታን ህንተንቶ ቱሙዋ ኦዳይ፤ ህንተንቱ ታ ሱንꬃን ዎስያዋ ኡባ አዉ ህንተንቶ እማናዋ። 24 ሀእ ጋካናዉ ታ ሱንꬃን አይነ ዎስበይክታ፤ ህንተንቱ ናሸቻይ ፖለታና ማላ፥ ጾሳ ዎስተ፤ ህንተንቱ አካና።

25 “ሀዋ ታን ህንተንቶ ሌምሱዋን ኦዳድ፤ ሽን ታን ሌምሱዋን ኦደና ዎዲ ያናዋ፤ ሽን አዉዋባ ታን ህንተንቶ ቆንጭያን ኦዳና። 26 ታን ሄ ጋላስ፥ ህንተንቱ ታ ሱንꬃን አዉዋ ዎሳና፤ ቃይ ህንተንቱ ድራዉ፥ ታን አዉዋ ዎሳና ጊከ። 27 አያዉ ጎፐ፥ አዉ ባረ ሁጰዉ ህንተንታ ሲቄ፤ ህንተንቱ ታና ሲቅያ ድራዉነ ታን አዉዋ ማታፐ ዬዳዋ አማኖ ድራዉ፥ እ ህንተንታ ሲቄ። 28 ታን አዉዋ ማታፐ ሀ አላምያ ያድ፤ ቃይ ሀ አላምያ አጋደ አዉዋኮ ባና” ያጌዳ።

29 የሱሳ ካልያዋንቱ ዛሪደ የሱሳ፥ “በአ፥ ሀእ ኔን ቆንጭያን ሃሳያሳ፤ ሌምሱዋን አይነ ሃሳያካ። 30 ኔን ኡባባ ኤርያዋ ኑን ሀእ ኤሬቶ፤ ቃይ ኔና ኦንነ ኦቻና ማላ፥ ኔን ኮየናዋ ኤሬቶ። ሄዌ ኑና ኔን ጾሳፐ ዬዳዋ አማንꬄ” ያጌድኖ።

31 የሱስ ዛሪደ ኡንቱንታ፥ “ሀእ አማኒቴ? 32 በእተ፥ ህንተንቱ ህንተንቱ ጎለ ጎለ ላለትያ ዎዲነ ታ ጻላላ የግ ባሽያ ዎዲ ያናዋ፤ ሀእካ ይ ድጌዳ። ሽን አዉ ታናና ደእያ ድራዉ፥ ታ ጻላላ ግድከ። 33 ህንተንቱ ታ ግዶን ደኢደ፥ ሳሮ ደአና ማላ፥ ታን ሀዋ ህንተንቶ ኦዳድ። አላምያን ህንተንቱ ዋየታና። ሽን ምንተ፤ ታን አላምያ ጾናድ” ያጌዳ።