1 ሄዋፐ ጉይያን፥ ጵላጾስ የሱሳ ኦይቂደ፥ ልሱዋን ሾጬዳ። 2 ዎታዳራቱ አጉንꬃፐ ካላቻ ጊግሲደ፥ አ ሁጲያን ዎꬄድኖ፤ ቃይ ዞኦ ማዩዋካ አ ማይዜድኖ። 3 አኮ ሺቂደ፥ “አይሁዳ ካተዉ፥ ሸምፑዋ ጋምአ!” ያጊደ አ ሻይያ ባቄድኖ።

4 ጵላጾስ ቃይካ ካረ ከሲደ አይሁዳቱዋ፥ “በእተ፥ ታን አን አይ ባላነ ደማቤናዋ ህንተንቱ ኤራና ማላ፥ አ ህንተንቱኮ ካረ ከሳና” ያጌዳ። 5 ሄዋፐ ጉይያን፥ የሱስ አጉንꬃ ካላቻ ባረ ሁጲያን ዎꬂደ፥ ዞኦ ማዩዋ ማዪደ፥ ካረ ከሴዳ፤ ጵላጾስ አይሁዳቱዋ፥ “ብታንያ ሀዋ በእተ” ያጌዳ።

6 ቄሳቱዋ ካፓቱነ ዎታዳራቱ አ በኤዳ ዎደ፥ ባረንቱ ኮሻ ꬎቁ ኦꬂደ፥ “ማስቃልያ ቦላ ምስማርያን ꬍሻደ አ ሱላ! ሱላ!” ያጌድኖ።

ጵላጾስ ኡንቱንታ፥ “ህንተንቱ አ አፊደ፥ ማስቃልያ ቦላ ምስማርያን ꬍሺደ ሱልተ፤ አያዉ ጎፐ፥ ታን አይ ባላነ ደማበይከ” ያጌዳ።

7 አይሁዳቱ ዛሪደ፥ “ኑዉ ህጊ ደኤ፤ ኑ ህጊ ግያዋዳን፥ እ ሀይቃናዉ በሴ፤ አያዉ ጎፐ፥ እ ባረና ጾሳ ናኣ ኦꬄዳ” ያጌድኖ።

8 ጵላጾስ ሄዋ ስሴዳ ዎደ፥ ካሰዋፐ ሎይꬅ ያዬዳ። 9 ቃይካ ጵላጾስ ባረ ኦሱዋ ጎለ ስም ገሊደ የሱሳ፥ “ኔን ሀቃፐ ያዲ?” ያጊደ ኦቼዳ፤ ሽን የሱስ አዉ አይነ ዛርቤና። 10 ሄዋ ድራዉ፥ ጵላጾስ አ፥ “ታዉ ኦድኪ? ኔና ብላናዉ ዎይ ማስቃልያ ቦላ ምስማርያን ꬍሻደ ካቃናዉ ታዉ ማታይ ደእያዋ ኤርኪየ?” ያጌዳ።

11 የሱስ፥ “ጾሳይ ነዉ ቦላፐ ማታ እምቤናባ ግድንቶ፥ ነዉ ታ ቦላ ማታይ ደኤና ሽን። ሄዋ ድራዉ፥ ታና ነዉ አꬅ እሜዳዌ አꬍያ ናጋራ ኦꬄዳ” ያጌዳ።

12 ጵላጾስ ሄዋ ስሴዳ ዎደ፥ የሱሳ ብላናዉ ኦግያ ኮዬዳ፤ ሽን አይሁዳቱ ባረንቱ ኮሻ ꬎቁ ኦꬂደ፥ “ኔን አ ብልያዋ ግዶፐ፥ ካትያ ቄሳረ ዳቦ ግዳካ! ባረና ካትያ ግያ ኦንነ ቄሳረ ሞርከ!” ያጌድኖ።

13 ጵላጾስ ሄዋ ስሲደ፥ የሱሳ ካረ ከሴዳ። ያቲደ ሹቻ ባሱዋ ግያ ሳኣን ፕርዳ ኦይድያን ኡቴዳ፤ እብራይስጸ ቃላን ሄ ሳአይ ጋይታ ግያዋ። 14 ሄ ጋላሳይ ፓስጋ ቦንችያ ጋላሳዉ ጊግስያ ጋላሳ፤ ሳአይ ኡሱፑን ሳትያ ሄራ ግዳናዋ። ጵላጾስ አይሁዳቱዋ፥ “ህንተንቱ ካትያ ሀዋ በእተ!” ያጌዳ።

15 አይሁዳቱ ባረንቱ ኮሻ ꬎቁ ኦꬂደ፥ “ድጋ! ድጋ! ማስቃልያ ቦላ ምስማርያን ꬍሻደ ሱላ!” ያጌድኖ።

ጵላጾስ ዛሪደ፥ “ህንተንቱ ካትያ ታን ማስቃልያ ቦላ ምስማርያን ꬍሻደ ሱልያዋ ኮዪቴ?” ያጊደ ኦቼዳ።

ቄሳቱዋ ካፓቱ፥ “ቄሳረፐ ሀራ ካቲ ኑዉ ባዋ!” ያጌድኖ።

16 ሄዋፐ ጉይያን፥ ኡንቱንቱ ማስቃልያ ቦላ ምስማርያን ꬍሺደ፥ የሱሳ ካቃና ማላ፥ ጵላጾስ ኡንቱንቶ አꬅ እሜዳ።

ኡንቱንቱ የሱሳ ኦይቂደ፥ አፌድኖ። 17 የሱስ ባረ ማስቃልያ ቶኪደ፥ ጉግያሳ ጌተትያሳ ቤዳ። “ጉግያሳ”*“ጉግያሳ” ሄዋን አሳ ጉግያ ማላት መቴዳ ዎጋ ሹቻይ ደእያ ድራዉ፥ “ጉግያሳ ጌተቴዳ”። ግያዌ እብራይስጸ ቃላን “ጎልጎታ” ግያዋ። 18 ኡንቱንቱ ሄ ሳኣን ማስቃልያ ቦላ ምስማርያን ꬍሺደ፥ የሱሳ ካቄድኖ፤ ቃይ አናና ሀራ ላኡ አሳቱ፥ እቱዋ ያ ባጋና ቃይ እቱዋ ሀ ባጋና የሱሳ ግዱዋን ዎꬂደ፥ ማስቃልያ ቦላ ምስማርያን ꬍሺደ ካቄድኖ። 19 ጵላጾስ ጽፋትያ ጻፊደ፥ ማስቃልያ ቦላ ዎꬄዳ። እ ጻፌዳዌ፥ “አይሁዳቱ ካትያ፥ ናዝሬትያ የሱሳ” ያጌ። 20 የሱስ ማስቃልያ ቦላ ምስማርያን ꬍሸቲደ ሱለቴዳ ሳአይ ካታማ ማታን ደእያ ድራዉ፥ ዳሮ አይሁዳቱ ሄ ጽፋትያ ናባቤድኖ። ጽፋቲ እብራይስጸ ቃላን፥ ሮማይስጸ ቃላንነ ግሪከ ቃላን ጻፈቴዳ። 21 ሄዋ ድራዉ፥ አይሁዳ ቄሳቱዋ ካፓቱ ጵላጾሳ፥ “ ‘ሀ ብታኒ ባረና አይሁዳ ካትያ ያጌዳ’ ጋደ ጻፋፐ አትን፥ ‘አይሁዳ ካትያ’ ጋደ ጻፎፓ” ያጌድኖ።

22 ጵላጾስ፥ “ታን ጻፌዳዋ ጻፋ ድጋድ” ያጊደ ዛሬዳ።

23 ዎታዳራቱ ማስቃልያ ቦላ ምስማርያን ꬍሺደ፥ የሱሳ ካቄዳዋፐ ጉይያን፥ አ ማዩዋ አኪደ፥ ኦይዱ ከስ ሻኬድኖ፤ እት እት ዎታዳራ እት ሻኩ ጋኬዳ። አ አዱሳ ማዩዋካ አኬድኖ፤ አዱሳ ማዩ ሀሽያፐ ዶሚደ፥ ዱገ ጋካናዉ የድ ማየትያዋፐ አትን፥ ቃንጸቲደ ስከትቤና። 24 ዎታዳራቱ እቱ እቱዋ፥ “ኦና ጋካነንቶ፥ ሳማ ዎይ ኤጻ የጋናፐ አትን፥ ማዩዋ ፔꬎኮ” ያጌድኖ። ሄዌ ሀኔዳዌ ጾሳ ማጻፋይ፥ “ታ ማዩዋ ሻክ አኬድኖ፤ ታ አዱሳ ማዩዋን ሳማ የጌድኖ” ግያዌ ፖለታናሳ። ሄዋ ድራዉ፥ ዎታዳራቱ ሄዋ ኦꬄድኖ።ማዝ. 22:18

25 ሽን የሱሳ ማስቃልያ ማታን አ ዳያ፥ አ አት ምቻታ፥ ቃልዮጳ ማቻታ ማይራማነ ማግዳላ ጌተትያ ካታማፐ ዬዳ ማይራማ ኤቄድኖ። 26 የሱስ ባረ ዳያነ እ ሲቅያ ካልያዌ ሄዋን ኤቄዳዋንታ በኢደ፥ ባረ ዳዮ፥ “ሀ ምሽራቴ፥ ነ ናኣ ሀዋ በአ!” ያጌዳ።

27 ሄዋፐ ጉይያን፥ ሄ ካልያዋ “ነ ዳዮ ሀኖ በአ!” ያጌዳ። ሄ ካልያዌ እዞ ሄ ሳትያፐ ዶሚደ፥ ባረ ሶይ አፌዳ።

28 ሄዋፐ ጉይያን፥ የሱስ ኡባባይ ሀቅ ፖለቴዳዋ ኤሪደ፥ ጾሳ ማጻፋይ ጌዳዌ ፖለታና ማላ፥ “ታና ሳሜ” ያጌዳ። ማዝ. 69:21፤ 22:15

29 ሄ ሳኣን እት ጹጋ ኩሜዳ ጫላ ዎይንያ ኤሳይ ደኤ። ኡንቱንቱ እስፖንጅያ ሄ ዎይንያ ኤሳን የጊደ፥ ህሶጵያ ጌተትያ ምꬃ ጼራን ዎꬂደ፥ የሱሳ ዶናኮ ሺሼድኖ። 30 የሱስ ዎይንያ ኤሳ ጋንጽ በኤዳዋፐ ጉይያን፥ “ፖለቴዳ” ያጌዳ።

ቃይ ሄዋፐ ጉይያን፥ ባረ ሁጲያ ቶቺደ፥ ባረ ሸምፑዋ እሜዳ።

31 ሄ ጋላሳይ አይሁዳቶ ጊገትያ ጋላሳ †አይሁዳቶ ጊገትያ ጋላሳ፦ ፓስጋይ ሳምንታፐ እት ጋላሳ አዉደነ ግዳና ዳንዳዬ፤ ሽን ዮሃንሳ ምሽራቹ ታማርስያዋዳን፥ ፓስጋ ዎዲ ሀናናዉ በስያዌ፥ ላይꬃ ላይꬃን የሱስ ማስቃልያን ካቀት ሀይቄዳ ሳምባታና ግዳና ኮሼ። ግድያ ድራዉነ ቃይ ሄ ሳምባታይ ዳሮ ቦንቾ ግድያ ድራዉ፥ ሳምባታን አሳቱዋ አሃይ ማስቃልያ ቦላ ፔሸና ማላ፥ ሱለቴዳ አሳቱዋ ሱይልያ መንꬂደ፥‡ሱለቴዳ አሳቱዋ ሱይልያ መንꬂደ፦ ሀ ዎጋይ ሮመ ካዉተꬃ ዎጋዳን፥ ማስቃልያን ሱለቴዳ አሳቱ ኤለካ ሀይቃና ማላ ኦꬅያ ኦግያ ጉሳ። ማስቃልያፐ ዎꬃና ማላ፥ አይሁዳቱ ጵላጾሳ ዎሴድኖ። 32 ሄዋ ድራዉ፥ ዎታዳራቱ ዪደ፥ የሱሳና ሱለቴዳ ኮይሮ ብታንያ ሱይልያ መንꬄድኖ፤ ቃይ አናና ሱለቴዳ ላኤንꬆ ብታንያ ሱይልያካ መንꬄድኖ። 33 ሽን የሱሳኮ ዬዳ ዎደ እ ሀይቂ ድጌዳዋ በኢደ፥ አ ሱይልያ መንꬅበይክኖ። 34 ግዶፐነ፥ ዎታዳራቱዋፐ እቱ አ ምይያ ቶራን ጫዴዳ። ኤለካ ሱꬃይነ ሃꬃይ ጎግ አጌዳ። 35 ህንተንቱ አማናና ማላ፥ ሀዋ በኤዳዌ ማርካቴዳ፤ እ ማርካትያዌካ ቱሙዋ፤ ቃይ ባረ ሃሳያይ ቱማ ግድያዋ እ ኤሬዳ። 36 ሄዌ ሀኔዳዌ ጾሳ ማጻፋይ፥ “አ መቀꬃቱዋፐ እቱነ መኤና” ጌዳዌ ፖለታናሳ። ከሳ 12:46፤ ፓይ. 9:12፤ ማዝ. 34:20 37 ቃይካ ጾሳ ማጻፋይ ሀራይ፥ “አሳይ ባረ ጫዴዳዋ በአና” ያጌ። ዛካ. 12:10፤ ሳፃ 1:7

38 ሄዋፐ ጉይያን፥ አርማትያሳ ጌተትያ ካታማፐ ዬዳ ዮሴፎ የሱሳ አሃ አኪደ አፋናዉ ጵላጾሳ ዎሴዳ፤ ዮሴፎ አይሁዳቶ ያዬዳ ድራዉ፥ አሳይ ኤረናን የሱሳ ካልያዋ።

ዮሴፎ ዎስና ጵላጾስ፥ “አፋ” ያጌዳ። ሄዋ ድራዉ፥ ዮሴፎ ቢደ፥ የሱሳ አሃ አፌዳ። 39 ቃይ ንቆድሞስ ሄዋፐ ካሰ የሱሳኮ ቃማ ዬዳዌ፥ ካዋራናነ ጎዳረ ኡꬃና ዋላከቴዳ ኦይታማነ እቼሹ ኪሎ ግራመ ግድያዋ ኬና ሽቱዋ ኦይቂ አኪደ፥ ዮሴፎና ዬዳ። 40 ሄ ላኡ አሳቱ የሱሳ አሃ አኪደ፥ አይሁዳቱ አሃ ጻጽያ ዎጋዳን፥ ሽቱዋና ጋꬂደ፥ ሞጉዋ አፍላን ጻጼድኖ። 41 የሱስ ማስቃልያ ቦላ ምስማርያን ꬍሸቲደ ሱለቴዳ ሳኣን ዳሮ አትክልትያ ሳአይ ደኤ፤ ሄ አትክልትያ ሳኣ ግዶን ሹቻ ዎጭ ከሴዳ ብሮ ኦንነ ሞገትቤና ኦራꬃ ዱፉ ደኤ። 42 ሄ ዱፉ ማታን ደእያ ድራዉነ ቃይ አይሁዳቱ ሳምባታዉ ጊገትያ ጋላሳ ግድያ ድራዉ፥ የሱሳ ያን ዎꬄድኖ።