ኢዮባ ማጻፋን ኑን በእያ ታርኪ፥ ዳሮ ቱጋይነ ባሻይ ጋኬዳ እት ኬካ ብታንያባ ኦድያ ታርክያ። ሀ ብታኒ ባረ ናናቱዋ ኡባፐነ ባረ ዱረተꬃ ኡባፐ መላ አቴዳ አሳ። ሄዋ ቦላካ ቃይ ኢታ ማይꬃን ሾጨቲደ ሳከቴዳ። ሄዋፐ ጉይያን ግንጹዋ ጻፉዋን ቆንጭሴዳ ሄዙ ሃሳያቱዋን ኢዮብ ነ ኢዮባ ላገቱ ሀ ሳኩዋን ባረንቶ ስሰቴዳዋ ሃሳዬድኖ። ዉርሰꬃን ቃይ ጾሳይ ኢዮባዉ ቆንጬዳ።

ኢዮባ ላገቱ ኢዮባ ጋኬዳ መቱዋ ቦላ ቆፋ እሚደ፥ በንፐ ባረንቱ ኤርያ አማኑዋ ዎጋን ባሰቲደ እሚኖ። ሄዋ ድራዉ ኡንቱንቱ፥ “ጾሳይ ኬካ አሳዉ ሎኦባ እሜ፤ ሽን ኢታ አሳ ሙሬ። ሄዋ ማራን ኢዮባ ሀ መቱ ኡባይ ጋኬዳዌ፥ እ ናጋራ ኦꬄዳ ድራሳ ግዳናዉ ኮሼ” ያጊኖ። ሽን ኢዮብ ጌሻነ ኬካ አሳ ግዴዳ ድራዉ፥ ሀዋ ማላ ሙሩዋ በስያ አሳ ግደና። ኡባ ቃይ ኤረተና ቃንእሸ ግዴዳዌ፥ አ ማላትያ ኬካ አሳ ቦላ ሀዋ ማላ ሙሩዋ ዎꬌዳ። ኢዮባ አማኑ ሳኣፐ ደሸናን ꬎዮፐካ፥ ልከ ፕርዳ ፕርዲደ፥ ባረና ሀ ሀርግያ ቃሹዋፐ ብላና ማላነ በን ደኦ ዛራና ማላ፥ ምንሲደ ዎስያዋ አግቤና።

ጾሳይ ኢዮብ ኦቼዳ ኦሻዉ እቶ እቶ ዛሩዋ እምቤናዋ ግዶፐነ፥ አ አማኑዋ ምኖተꬃ ናሺደ፥ ባረ ጾሳተꬃ ዎልቃነ ባረ አꬌዳ ኤራ ማላልስያ ግንጹዋ ሃሳያን ቆንጭሴዳ። ሄዋፐ ጉይያን ኢዮብ ጾሳይ ዎልቃማ ግድያዋነ አꬌዳ ኤራንቻ ግድያዋ ኤሪደ፥ ጻላንነ ሀንቁዋን ኩሜዳ ቃላቱዋ ሃሳዬዳዎ ካዮቲደ፥ ናጋራፐ ስሜዳ።

ዉርሰꬃን ግንጹዋ ግደና የዳ ጻፉዋን ጻፈቴዳ ሳኣን ኢዮባ ደኡ በንሳ ስሜዳዋዋነ አቁዋ ባጋና ግዶፐ፥ ካሰዋፐ ዳኮ ዳሩዋ ደሜዳዋ በኤቴ። ኢዮባ ላገቱ አ ጋኬዳ መቱ ሀቃና ዬደንቶ ኡንቱንቶ ገልቤና ድራዉ፥ ጾሳይ ኡንቱንታ ምኖ ሴራ ሴሬዳ። ሜዘ አማኑዋ ቆፋፐ ጾሳይ ዎልቃማ ግድያዋ ኤሬዳዌ ኢዮባ ጻላላ።