1 “ማጫ አሳፐ የለቴዳ አሳ ላይꬃይ ቃንꬃ፤ ሄዋ ኬሻካ መቱዋን ኩም ኡቴዳ። 2 እ ጪሻዳን ጪሺደ፥ ኤለካ ቆቆፈት አጌ፤ ቃይ ጋምኤናን ኩዋዳን ኤለካ አꬍ ክቼ። 3 ያትና ኔን፥ ጾሳይ፥ ሄዋ ማላ አሳካ ጼላይ? ቃይ አ ፕርዳናዉ ነ ስንꬃ ሺሻይ? 4 ቱናባፐ ጌሻባ ከሳናዉ ዳንዳይያዌ ኦኔ? ኦንነ ባዋ። 5 አሳይ ደአና ላይꬃቱ ዛዋት ኡቴድኖ፤ እ ደአና አግናካ ኔን ፓይዳ ዎꬃዳ፤ ኔን ዎꬄዳ ዛዋፐ አꬍያዌ ባዋ። 6 ሄዋ ድራዉ፥ ከራ ኦꬅያ አሳይ ባረ ኦሱዋ ፖሊደ ሸምፕያዋዳን፥ አሳይ ባረ ዳቡራ ላይꬃ ፖሊደ ሸምፓናዳን፥ አ አጋ።

7 “ምꬃዉካ ህዶታይ ደኤ፤ ምꬃይ ቃንጾፐ አጬ፤ አጫይካ ሄዋዳን ሀኒደ፥ ደእ ባሼ። 8 ሄ ምꬃ ጻጱ ቢታ ጋርሳን ኤጭንቶካ፥ አ ዱሩማይካ ቢታን ዎቆፐካ፥ 9 ሃꬃ ፔኑዋ ደሚደ አጬ፤ ፑትያዳን ኦራꬃ ልጩዋ ከሴ።

10 “ሽን አሳይ ሀይቂና፥ አ ዎልቃይ ዉሬ፤ አ ሸምፑ ከሶዋፐ ህን ባጋን፥ እ ሀቃን ደኢ? 11 አባፐ ሃꬃይ መልያዋዳን፥ ቃይ ሻፋ ሃꬃይካ ቶእያዋዳን፥ 12 ሄዋዳን አሳይካ ሀይቄ፤ ሄ ሳኣፐ ደንደና። ሳሎቱ አꬋና ጋካናዉካ አሳይ ቤጎተና፤ ባረ ገምእሹዋፐካ ደንደና።

13 “አቤት ጾሳዉ፥ ኔን ታና ዱፎ ግዶን ገንꬃደ፥ ነ ሀንቁ አꬋና ጋካናዉ ቆሴዳዋ ግዳርኪሻ! ኔን ታዉ ኬሩዋ እማደ፥ ሄ ጋላስ ታና ሀሳዬዳዋ ግዳርኪሻ! 14 እት አሳይ ሀይቆፐ፥ ስሚደ ፓጻኔ? ታ ላሚ ያና ጋካናዉ፥ ሀ ቱጋ ዎድያ ኡባ ዳንዳያን ናጋና። 15 ኔን መꬌዳ ታናካ በአናዉ ኔን ላሞትያ ዎደ፥ ኔን ታና ጼሳና፤ ታን ነዉ ኮያና። 16 ሄ ዎድያን፥ ኔን ቱሙዋፐ ታ ታንጉዋ ዎቻና፤ ሽን ታ ናጋራ ታ ቦላ ፓይዳካ። 17 ታ ባይዙ ቃርጪታ ግዶን ዪጨታና፤ ታ ናጋራካ ኔን ካማና።

18 “ደሪ ኩንድያነ መኤረትያዋዳን፥ ዛላይካ ꬎቆለትያዋዳን፥ 19 ሃꬃይካ ሹቻ ቦክያዋዳንነ ድኡካ ቢታ ሜጪደ አፍያዋዳን፥ ሄዋዳን ኔንካ አሳ ህዶታ ꬋይሳሳ። 20 ኔን አ መꬍናዉ ጾናሳ፤ ያቶፐ እ ብ አጌ። አ ማላ ላማደ፥ ነ ስንꬃፐ የዳሳ። 21 አ ናናቱ ቦንቼቶፐ፥ ሄዋ እ ኤረና፤ ኡንቱንቱ ቶሸቶፐካ በኤና። 22 ሽን አ ቦላ ሴላይ አ ጻላላዉ ስሰቴ፤ እ ባረ ጻላላዉ ዬኬ” ያጌዳ።