1 ሄዋፐ ጉይያን፥ ተማና ቢታፐ ዬዳ ኤልፋዝ ሀዋዳን ያጊደ ዛሬዳ፤ 2 “አሳይ ጾሳ ጎአናዉ ዳንዳዪ? ሀራይ አቶ አꬌዳ ኤራንቻ ግድንቶካ፥ እ ባረና ጎአናፐ አትና፥ ጾሳ ጎኤና። ኢዮባ 35:6-8 3 ኔን ጽሉዋ ግዶፐ፥ ሄዌ ኡባ ዳንዳይያ ጾሳ ናሸቺ? ነ ኦጊ ቶሺ ባይናዋ ግዶፐ፥ ሄዋን እ አያ ዎꬍያ ደሜዴ?

4 “ኔን አ ቦንችያ ድራዉ፥ እ ኔና ሴሪነ ፕርዲ? 5 ነ ኢታተꬃይ ዳራ ግደኔ? ነ ናጋራዉ ዛዋይ ባዋ። 6 ኔን ነ እሻቱዋ ጋሱ ባይናን ዋስያ ጼስሳዳ፤ አሳ ማዩዋካ ቃራደ ኡንቱንታ ካሎ አሻዳ። 7 ኔን ሳመቴዳዋንታ ሃꬃ ኡሻባካ፤ ኮሻቴዳዋንታካ ቁማ ድጋዳ። 8 ኔን ነ ዎልቃንነ ነ ማታን ዘምፓደ፥ ሀራ አሳ ቢታ ነዉ ጮ አካዳ። 9 አምኤቱዋ መላ ኩሽያ የዳዳ፤ አዉ ባይናዋንታካ ኡቁናዳ። 10 ነ ዩሹዋን ግቲ ዶድ ኡቴዳዌ፤ አኬከናን ያሻይ ኔና ኮኮርስያዌካ ሄዋሳ። 11 ኔን በኤናዳን፥ ነዉ ꬉምያዌ፤ ቃይ ኩንꬆ ሃꬃይ ኔና ሙክያዌካ ሄዋሳ።

12 “ጾሳይ ቦላ ꬎቃ ሳሉዋን ኡቲደ፥ ꬎቃን ደእያ ጾልንተቱዋ ዱገ ጼሌ። 13 ሽን ኔን፥ ‘ጾሳይ አያ ኤሪ? እ ሄዋ ማላ፥ ꬍጵ ጎ ꬉማ ግዱዋናካ ፕርዳናዉ ዳንዳዪ? 14 ሳሉዋነ ሳኣ ዳንꬁዋ ቦላ እ ስመረትያ ዎደ፥ እ በኤናዳን፥ ስኬዳ ሻሪ አ ጎዜ’ ያጋሳ።

15 “ናጋራንቻቱ ሀመቴዳ በን ኦግያን ባናዉ ቆፋ ቃቻዲ? 16 ኡንቱንቱ ባረንቱ ዎዲ ጋከናን ደእሺና ሀይቄድኖ፤ ኡንቱንቱ ደኡዋ ባሱካ ድኡዋን ሜጨት ꬋዬዳ። 17 ኡንቱንቱ ጾሳ፥ ‘ኑፐ ሃካ! ኡባ ዳንዳይያ ጾሳይ ኑዉ አያ ኦꬃናዉ ዳንዳዪ?’ ያጌድኖ። 18 ግዶፐነ፥ ኡንቱንቱ ጎልያን ሎኦባ ኩንꬄዳዌ ጾሳ። ሄዋ ድራዉ፥ ኢታ አሳቱዋ ቆፋይ ታዉ ገለና።

19 “ኢታ አሳቱዋ ቦላ ጋክያዋ በኢደ፥ ጽሎቱ ናሸቲኖ፤ ሱረ አሳቱካ ሀዋዳን ያጊደ፥ ኡንቱንቱ ቦላ ቅሊጪኖ፤ 20 ‘ቱሙዋፐ ኑ ሞርከቱ ꬋዬድኖ፤ ኡንቱንቱ ዱረተꬃካ ታማይ ሜዳ’።

21 “ኢዮባ፥ ሀእካ ጾሳዉ ሞደታ፤ አናና ሳሮ ደአ። ያቶፐ፥ ኔን አንጀታና። 22 አ ዶናፐ ትምርትያ አካ፤ አ ቃላቱዋካ ነ ዎዛናን ዎꬃ። 23 ኔናተꬃ ሆክሳደ፥ ኡባ ዳንዳይያ ጾሳኮ፥ ኔን ስሞፐ፤ ኢታ ኦሱዋ ኡባ ነ ሶፐ ድጎፐ፤ 24 ነ ዎርቃ ሳኣን ኦሎፐ፤ ነ በርተ ዎርቃካ ሻፋ ሹቻን ኦሎፐ፤ 25 ኡባ ዳንዳይያ ጾሳይ ነዉ ዎርቃነ ዶረቴዳ ብራ ግዳናዋ።

26 “ሄዋፐ ጉይያን፥ ኔን ኡባ ዳንዳይያ ጾሳን ቱሙ ናሸታና፤ ዬላተናን ጾሳኮ ፑደ ጼላና። 27 ኔን ጾሳ ዎሳና፤ እ ስሳና፤ ቃይ ኔን ነ ቃንግያ አዉ ጋꬃና። 28 ኔን ዞረታደ ቃቼዳዌ ነዉ ፖለታና፤ ነ ሀመትያ ኦግያንካ ፖኡ ፖአና። 29 አያዉ ጎፐ፥ ጾሳይ ኦቶረትያዋንታ ካዉሼ፤ ሽን ባረንታ ሆክስያዋንታ አሼ። 30 እ ሱረ አሳ ዎꬅ አኬ። ነ ኩሺ ናቁዋፐ ጌሻ ግዶፐ፥ እ ኔና አሻና” ያጌዳ።