1 “ኡባ ዳንዳይያ ጾሳይ ፕርድያ ዎድያ አያዉ ኬረኔ? አ ኤርያዋንቱ ሄ ዎድያ አያዉ በእክኖ? 2 ኢታ አሳቱ ባረንቱ ጋድያ አሳናዉ፥ ዛዋን ደእያ ሹቻ ꬎቆሊኖ። ዶርሳካ ዉእ አሂደ፥ ባረንቱ ዶርሳ ዉድያን ጋꬂደ ሄሚኖ። 3 አዉ ባይና ናናቱዋ ሀረቱዋ ላጊደ፥ አክ ቢኖ፤ አምአቲ ቦራካ አጮ ኦይቂደ፥ ባረንቶ አኪኖ። 4 ህዬሳቱዋ ባረ ማታ ደመናዳን ድጊኖ፤ ቢታን ደእያ ህዬሳቱዋ ኡባ ባረንቱ ስንꬃፐ ቆሰꬂኖ። 5 ባዙዋን ደእያ ዎራ ሀረቱዋዳን፥ ህዬሳቱ ምያዋ ኮዪደ ዎጸረቲኖ፥ ባረንቱ ናናቶካ ባዙዋፐ ቁማ ኮዪኖ። 6 ኡንቱንቱ ደምባን ሀራ አሳዉ ካꬃ ጫኪኖ፤ ኢታ አሳቱዋ ዎይንያ ቴራ ዉርጩዋካ ቃርሚኖ። 7 ኡንቱንቱ ቃማ ካሎ አቂኖ፤ ሜጉዋ ዎደካ ቦላን ማይያዌ ኡንቱንቶ ባዋ። 8 ደረቱዋን ቡክያ እራን ኡንቱንቱ ጽርክኪኖ፤ ገልያሳ ꬋዪደ፥ ሹቻ ቆሚኖ።

9 “ኢታ አሳቱ አዉ ባይና ናኣ አት ꬋንꬃ ꬋምያሳፐ ዳፍ አኪኖ፤ ህዬሳቱዋ ጉꬃ ናናቱዋካ አጮ ኦይቂኖ። 10 ህዬሳቱ ማዩዋ ꬋዪደ፥ ካሎ ሀመቲኖ፤ ኡንቱንቱ ቱኩዋ ኬዚደ ኮሻቲኖ። 11 ኡንቱንቱ ዛይትያ ከሳናዉ ዎጋራ ቴራ ፑርጺኖ፤ ዎይንያ ቴራካ ጉምኢደ ሳመቲኖ። 12 ካታማን ሀይቃና ሀንያ አሳቱ ኦሊኖ፤ ደሸቴዳ አሳቱካ ማዱዋ ኮዪደ ዋሲኖ፤ ሽን ጾሳይ ኡንቱንቱ መቱዋ ጼለና።

13 “ፖኡዋ እጽያ አሳቱ ደኢኖ፤ ኡንቱንቱ ፖኡ አየንቶ ኤርክኖ፤ አ ኦግያፐካ ዎራ ቢኖ። 14 ሸምፑዋ ዎꬍያዌ ዎንቱማꬃ ደንዲደ፥ ህዬሳቱዋነ መቶታንቻቱዋ ዎꬌ፤ ቃማ ቃይ ካይሱዋዳን ዉኤ። 15 ሻርሙጽያዌ ሳአይ ꬉማናዋ ናጌ፤ እ፥ ‘ኦንነ ታና በኦፖ’ ጊደ፥ ባረ ሶምኡዋ ካሜ። 16 ካይሳቱ ቃማ ጎልያ ቦኪደ፥ ዉአናዉ ገሊኖ፤ ሽን ጋላስ ፖኡዋ እጺደ፥ ቆሰት ፔሺኖ። 17 ኡንቱንታ ጋላሳ ፖኡ ያሼ፤ ሽን ቃማ ꬉማይ ኡንቱንታ ዳጋንና።

18 “ኢታ አሳቱዋ ድኡዋ ሃꬃይ ቁጪደ አፌ፤ ኡንቱንታ ጋኬዳ ጋዲ ሸቀቴዳዋ ግዴ። ኦንነ ኡንቱንቱ ዎይንያ ቱራ ሳኣ ቤና። 19 ሻቻይ ሆምቢያን ሙሽና፥ አዋይ አ መልስ ꬋይስያዋዳን፥ ሄዋዳንካ፥ ናጋራንቻቱ ሀይቂደ ꬋዪኖ። 20 ሀራይ አትና፥ የሌዳ አየቱካ ኡንቱንታ ሀሳይክኖ። ጉጹኒ ኡንቱንቱ አሹዋ ማልእና ሜ። ኡንቱንቱ ኢታ ኦሱካ ኩንዴዳ ምꬃዳን መአና። 21 አያዉ ጎፐ፥ ኡንቱንቱ ናአይ ባይና ማይነ ማጫ አሳ ናቄድኖ፤ አምኤ ማጫ ምሽራትዉካ ማደናን እጼድኖ።

22 “ጾሳይ ባረ ዎልቃን ምኖቱዋ ꬋይሴ፤ ኡንቱንቶ ሳአይ እንጀቶዋ ማላቶፐካ ደኡዋ ህዶታይ ባዋ። 23 ጾሳይ ኡንቱንቱ ሳሮ ደአናዳን ኦꬆፐካ፥ ኡንቱንቱ ኦግያ ዎቼ። 24 ኢታ አሳቱ ጉꬃ ዎድያዉ ꬎቁ ꬎቁ ጊኖ፤ ሽን ኤለካ ሻራፋዳን ሹል ꬋዪኖ፤ ካꬃዳን ጫከቲኖ።

25 “ሄዌ ሀነና ጊደ፥ ካድያ አሳይ ደኢ? ታን ኦዴዳ ቃላካ ዎርዱዋ ጊደ፥ አማንꬅያ አሳይ ደኢ?” ያጌዳ።