1 ቢታ ጾኒደ ኦይቄዳዋፐ ጉይያን፥ እስራኤልያ ማባራ ኡባይ ሴሎን ሺቂደ ጾሳዉ ጎይንያ ዱንካንያ ያን ኤሴዳ። 2 ሽን እስራኤልያ አሳፐ ጋድያ ሻክ አክቤና ላፑን ዛራቱ አቴድኖ።

3 ኢያሱ እስራኤልያ አሳ፥ “መꬍና ጎዳይ ህንተንቱ አዎቱዋ ጾሳይ ህንተንቶ እሜዳ ጋድያ ላተናን አዉደ ጋካናዉ ጋምአንቴ? 4 እት እት ዛርያፐ ሄዙ ሄዙ አሳቱዋ ዶርተ። እት እት ዛሪ ላታና ጋድያ ሀኖታ ኤራናዳን፥ ታን ኡንቱንታ ኪታና። ኡንቱንቱ ጋድያ ኡባ ቢደ ጌዲደ ሄ ቢታባ ጻፍ አኪደ፥ ታኮ ስም ያናዋንታ። 5 ኡንቱንቱ ሄ ጋድያ ላፑኑዋ ከሲደ ሻካና። ሽን ይሁዳ ዛራቱ ገድሳ ባጋና ደእያ ባረንቱ ጋድያን፥ ዮሴፎ ዛራቱካ ሁጲሳ ባጋና ደእያ ባረንቱ ጋድያን ደአና። 6 ሀ ላፑኑዋ ከስ ሻከቴዳ ጋድያ ሀኖታ ጻፌዳዋፐ ጉይያን፥ ታኮ አኪደ ዪና ታን መꬍና ጎዳ ኑ ጾሳ ስንꬃን ህንተንቶ ሳማ የጋና። 7 ግዶፐነ፥ ሌዊያ ዛራቱ ህንተናና ሳማን ላትክኖ፤ አያዉ ጎፐ፥ ኡንቱንቱ ቄሳቱዋ ግዲደ መꬍና ጎዳዉ ኦꬅያ ኪታይ ኡንቱንቱ ላታ። ጋደ ዛራቱ ሮቤላ ዛራቱነ ምናሰ ዛራቱዋፐ ባጋይ ዮርዳኖሳ ሻፋፐ አዋይ ዶልያ ባጋና፥ መꬍና ጎዳ ቆማይ ሙሴ ኡንቱንቶ እሜዳ ጋድያ ካሰት ላቴድኖ” ያጌዳ።

8 አሳቱ ጋድያ ሀኖታ ጻፋናዉ ባናፐ ካሰቲደ፥ ኢያሱ ኡንቱንታ፥ “ቢተ፤ ዩይ በኤዳዋ ጻፍተ። ያቲደ ታኮ ስም ዪተ። ሀዋን ሴሎን መꬍና ጎዳ ስንꬃን ታን ህንተንቶ ሳማ የጋና” ያጊደ አዛዜዳ። 9 አሳቱ ቢደ፥ ቢታ ኡባ ዩዬድኖ። ካታማቱዋ ኡባ ጻፊደ፥ ጋድያ ዋቲደ ላፑኑዋ ከስ ሻካነንቶ ኤርሴድኖ። ያቲደ ኢያሱ ዱንካኔዳ ሳኣ ሴሎ ስሜድኖ። 10 ሄዋፐ ጉይያን ኢያሱ መꬍና ጎዳ ስንꬃን ሴሎን ኡንቱንቶ ሳማ የጌዳ፤ ያን ኢያሱ እስራኤልያ አሳዉ ጋድያ ኡንቱንቱ ዛርያ ግሹዋዳን ሻክ እሜዳ።

11 ኮይሮ ሳማይ ቢንያማ ዘረꬃ ኡንቱንቱ ያራን ያራን ጋኬዳ። ኡንቱንታ ጋኬዳ ቢታይ ይሁዳ ዛራቱዋ ቢታፐነ ዮሴፎ ዛራቱዋ ጋድያፐ ግዱዋን ደኤዳ። 12 ሁጲሳ ባጋና ኡንቱንቱ ዛዋይ ዮርዳኖሳ ሻፋፐ ዶሚደ፥ ያርኮፐ ሁጲሳ ባጋና ደእያ ፑደꬃን ዛዋቴ፤ ሄዋፐ አዋይ ዉልያ ባጋና ገዝያ አꬊደ፥ ቤት-አዌና ዎራን ዛዋቴ። 13 ሄዋፐ ገድሳ ባጋ ስሚደ፥ ካሰ ሎዛ ጌተትያ ቤቴለ ፑደꬃ አꬊደ፥ አጻሮት-አዳራ ዱገꬃ አꬊደ፥ ህርክ ቤት-ሆሮናፐ ገድሳ ባጋን ደእያ ደርያን ዛዋቴ። 14 ሄ ዛዋይ ገድሳ ባጋና ቤት-ሆሮና ስንꬃን ደእያ ደርያፐ አዋይ ዉልያ ባጋ ምርቀቲደ፥ ቅርያት-ባኣላ ዎይ ቅርያት-ይኣሪማ ጌተትያ ይሁዳ ዛራቱዋ ካታማን ዛዋቴ። አዋይ ዉልያ ባጋና ደእያ ዛዋይ ሀዋ። 15 ገድሳ ባጋ ዛዋይ ቅርያት-ይኣሪማፐ ደንዲደ፥ ነፍቶሀ ሃꬃ ፑልታቱዋን ዛዋቴ። 16 ሄዋፐ ዛዋይ ዱገ ቢደ ራፋይማ ዛንጋራፐ ሁጲሳ ባጋን ደእያ ህኖማ ዛንጋራፐ ስንꬃ ባጋ ደርያ ገድሳና ዛዋቴ። ሄዋፐ ህኖማ ዛንጋራ አꬊደ ቢደ፥ ያቡሳዋናቱዋ ካታማ የሩሳላመዉነ ኤንሮጌላ ካታማ ገድሳ ባጋ ፑደꬃን ዛዋቴ። 17 ሄዋፐ ቃይ ሁጲሳ ባጋ ኤንሸሜሻኮ ምርቀቲደ፥ አዱሚማ ፑደꬃፐ ስንꬃ ባጋና ደእያ ጋልሎታን ዛዋቴ፤ ሄዋፐ ቃይ ሮቤላ ናኣ ቦሃና ሹቻዉ ዱገ ዎꬌ። 18 ሄዋፐ ቃይ ቤት-አራባ ሁጲሳ ባጋ ፑደꬃና አꬊደ፥ ዱገ አራብያ ዛንጋራ ዎꬌ። 19 ቤት-ሆግላ ፑደꬃፐ ሁጲሳ ባጋና አꬊደ፥ ዮርዳኖሳ ሻፋይ ጎጊደ ገልያሳ፥ ማጽንያ አባፐ ሁጲሳ ባጋ ጋጻ ጋኬ። ሄዌ ገድሳ ባጋ ዛዋ። 20 አዋይ ዶልያ ባጋና ደእያ ዛዋይ ዮርዳኖሳ ሻፋ። ቢንያማ ዛራቱ ላቴዳ ቢታይ ኡባ ሳናካ ዛዋቴዳ ዛዋቱ ሀዋንታ።

21 ቢንያማ ዛራቱ ባረንቱ ያራን ያራን አኬዳ ካታማቱ ያርኮ፥ ቤት-ሆግላ፥ ኤመቅ-ቃጺጻ፥ 22 ቤት-አራባ፥ ጻማራይማ፥ ቤቴለ፥ 23 አዊማ፥ ፓራ፥ ኦፍራ፥ 24 ካፋር-አሞና፥ ኦፍናነ ገባአ። ኡንቱንቱ ኡባና ታማነ ላአ፤ ኡንቱንቱ ዩሹዋን ደእያ ሞꬃቱካ ኡንቱንቱን ጉጀቲኖ። 25 ቃይ ጋባኦና፥ ራማ፥ ባኤሮታ፥ 26 ምጽጳ፥ ካፊራ፥ ሞጻ፥ 27 ረቄማ፥ ይርጳኤላ፥ ታራላ፥ 28 ጸላአ፥ ኤሌፋ፥ የሩሳላመ ጌተትያ ያቡሳዋናቱዋ ካታማ፥ ግብአነ ቅርያት-ይኣሪማ። ኡንቱንቱ ኡባና ታማነ ኦይዳ፤ ኡንቱንቱ ዩሹዋን ደእያ ሞꬃቱካ ኡንቱንቱን ጉጀቲኖ። ቢንያማ ዛራቱ ባረንቱ ያራን ያራን ላቴዳ ቢታይ ሀዋ።