1 መꬍና ጎዳይ ሙሳ ሀዋዳን ያጌዳ፤ 2 “እስራኤልያ አሳ ሀዋዳን ያጋ፤ ‘ታን፥ መꬍና ጎዳይ፥ ህንተ ጾሳ። 3 ህንተ ካሰ ደኤዳ ግብጼ ቢታ አሳይ ኦꬅያዋዳን ኦꬆፕተ፤ ዎይ ሀእ ታን ህንተና አፍያ ካናነ ቢታ አሳይ ኦꬅያዋዳንካ ኦꬆፕተ፤ ኡንቱንቱ ዎጋካ ካሎፕተ። 4 ህንተ ታ አዛዙዋ ኦꬅተ፤ ታ ዎጋካ ናግተ፤ ቃይ አን ቢተ። ታን፥ መꬍና ጎዳይ፥ ህንተ ጾሳ። 5 ሄዋ ድራዉ ታ አዛዙዋነ ታ ዎጋ ናጎፐ፥ ህንተ ፓጻ ደአና። ታን መꬍና ጎዳ። ናህ. 9:29፤ ህዝ. 18:9፤ 20:11-13፤ ሉቃሳ 10:28፤ ሮመ 10:5፤ ጋላ. 3:12

6 “ ‘ህንተፐ ኦንነ አሹዋ አሙዋ ፖላናዉ ባረ ማታ ዳቡዋና ግሶፖ። ታን ጾሳ። 7 ነ አሹዋ አሙዋ ፖላናዉ ነ ዳይና ግሶፓ፤ ነ አዉዋ ካዉሾፓ። እዛ ነ ዳዮ፤ ኢናና ግሶፓ። 8 ነ አሹዋ አሙዋ ፖላናዉ ነ አዉዋ ማቻትና ግሶፓ፤ ነ አዉዋ ካዉሾፓ። ዎጋ 20:11፤ ዛረ. 22:30፤ 27:20

9 “ ‘ነ አሹዋ አሙዋ ፖላናዉ ነ ምቻትና ግሶፓ፤ ዎይ ቃይ ሶን የለቴዳ ዎይ ካረን የለቴዳ ነ አዉዋ ዎይ ነ ዳይ ናትናካ ግሶፓ። ዎጋ 20:17፤ ዛረ. 27:22

10 “ ‘ነ አሹዋ አሙዋ ፖላናዉ ነ ናኣ ናትና ዎይ ነ ናት ናትና ግሶፓ። ነ ሁጲያዉ ኔና ካዉሻሳ። 11 ነ አሹዋ አሙዋ ፖላናዉ ነ አዉዋ ማቻት ናትና ግሶፓ፤ እዛ ነ ምቻቶ ግድያ ድራዉ ኢናና ግሶፓ። 12 ነ አሹዋ አሙዋ ፖላናዉ ነ አዉዋ ምቻትና ግሶፓ። እዛ ነ አዎ ማታ ዳቦ። ዎጋ 20:19-20 13 አሹዋ አሙዋ ፖላናዉ ነ ዳይ ምቻትና ግሶፓ፤ እዛ ነ ዳይዉ ማታ ዳቦ። 14 ነ አዉዋ እሻ ካሉዋ ቃራደ ነ አሹዋ አሙዋ ፖላናዉ አ ማቻትና ግሶፓ፤ እዛ ነ አዉዋ እሻ ማቻቶ። 15 ነ አሹዋ አሙዋ ፖላናዉ ነ ናኣ ማቻትና ግሶፓ፤ እዛ ነ ናኣ ማቻቶ ግድያ ድራዉ፥ ኢናና ግሶፓ። ዎጋ 20:12 16 ነ አሹዋ አሙዋ ፖላናዉ ነ እሻ ማቻትና ግሶፓ፤ ግሶፐ ነ እሻ ካዉሻሳ። ዎጋ 20:21

17 “ ‘ነ አሹዋ አሙዋ ፖላናዉ ምሽራትናነ እ ናትናነ ላኡዋና ግሶፓ። እ ናት ናትና ዎይ ቃይ እ ናኣ ናትናካ ግሶፓ፤ ኡንቱንቱ እዝዉ ማታ ዳቦ ግድያ ድራዉ፥ ሄዌ ሻርሙጻ። ዎጋ 20:14፤ ዛረ. 27:23

18 “ ‘ነ ማቻታ ፓጻ ደእሽን፥ ነ ማቻት ምቻቶ አካደ ነ አሹዋ አሙዋ ፖላናዉ ኢናና ግሶፓ።

19 “ ‘ነ አሹዋ አሙዋ ፖላናዉ ፒላይ ዪና ቱና ኡቴዳ ምሽራትና ግሶፓ። ዎጋ 20:18

20 “ ‘ኔን ቱነናዳን ነ ሾሩዋ ማቻትና ግሶፓ። ዎጋ 20:10

21 “ ‘ነ ጾሳ ሱንꬃ ቱንሳናዉ ነ ናናቱዋፐ እቱዋነ ታማን ጹጊደ፥ ሞሎካ ግያ ኤቃዉ ያርሻናዳን እሞፓ። ታን መꬍና ጎዳ። ዎጋ 20:1-5

22 “ ‘ማጫ አሳና ግስያዋዳን አቱማ አሳና ግሶፓ፤ ሄዌ ሸነይያባ። ዎጋ 20:13

23 “ ‘ኔን ቱነናዳን አይ መህያናነ ግሶፓ፥ ቃይ ማጫ አሳይካ መህያና ግሳናዉ መህያ ስንꬃ አꬎፖ። ሄዌ ዎጋይ ባይናዋ። ከሳ 22:19፤ ዎጋ 20:15-16፤ ዛረ. 27:21

24 “ ‘ታን ህንተ ስንꬃፐ የደርስያ ካዉተꬃቱ ሀ ኦሶቱዋን ቱኔዳ ድራዉ፥ ህንተ ሀዋንታ ማላትያዋቱዋን ቱኖፕተ። 25 ሀራይ አቶ ኡንቱንቱ ቢታይካ ቱኔዳ ድራዉ፥ አ ናጋራዉ ታን አ ሙራድ፤ ቢታይካ ባረናን ደእያዋንታ ጩቼዳ። 26 ሽን ህንተ ታ ህግያነ ታ አዛዙዋ ናግተፐ አትና፥ እስራኤልያ አሳ ግድና ዎይ ህንተ ግዶን ደእያ ሀራ ቢታ አሳፐ ኦንነ ሀዋ ማላ ቱና ኦሱዋ ኦꬆፕተ።

27 “ ‘ህንተፐ ካሰ ሀ ጋድያን ደኤዳ አሳቱ ሀዋ ማላ ቱናባ ኦꬄዳ ድራዉ፥ ቢታይ ቱኔዳ። 28 ህንተ ሀ ቢታ ቱንሶፐ፥ ህንተፐ ካሰ ደኤዳ ካዉተꬃቱዋ ሀ ቢታይ ጩቼዳዋዳን፥ ህንተናካ ጩቼናዳን ናገትተ። 29 ሄዋንታ ማላትያ ቱና ኦሶቱዋፐ እቱዋነ ኦꬅያ አሳይ ደኦፐ፥ ሄ አሳይ ባረ አሳ ግዶፐ ቦሄቶ።

30 “ ‘ሄዋ ድራዉ ህንተፐ ካሰ ደኤዳ አሳቱ ኦꬄዳ ቱና ኦሶቱዋ ኡባ ኦꬂደ ህንተ ቱነናዳን፥ ህንተ ታ አዛዙዋ ናግተ፤ ታን፥ መꬍና ጎዳይ፥ ህንተ ጾሳ’ ያጋ” ያጌዳ።