1 ሄ ዎድያን እት እት አሳቱ የሱሳኮ ዪደ ጵላጾስ ጋሊላ አሳ ዎꬊደ ኡንቱንቱ ሱꬃ ያርሹዋና እትፐ ዋላኬዳዋ አዉ ኦዴድኖ። 2 የሱስካ ዛሪደ፥ “ሀዋንቱ ጋሊላ አሳቱ ሀይቄዳ ድራዉ፥ ያትና ኡንቱንቶ ሀራ ጋሊላ አሳ ኡባፐካ አꬊደ ናጋራንቻቱዋ ግዶዋንታ ማላቲኖ? 3 ታን ያጋይ፥ ሀዋዳን ግደና፤ የዉዋን ቃይ ህንተ ናጋራ ፓጺደ ናጋራፐ ስመናን እጾፐ፥ ህንተንቱ ኡባቱካ ሄዋዳን ሀይቂታ። 4 ዎይ ሳልሆማ ግምቢ ኡንቱንቱ ቦላ ኩንዲደ፥ ዎꬌዳ ታማነ ሆስፑን አሳቱዋ የሩሳላመን ደእያዋንቱ ኡባፐ አꬊደ ናቆዋንታ ማላቲኖ? 5 ሀዋዳን ግደና ያጋይ፤ የዉዋን ቃይ ናጋራ ፓጻና ꬋዮፐ ኡባቱካ ሀዋዳን ባያንታ” ያጌዳ።

6 የሱስካ ሀዋዳን ያግ ሌምሱዋ ኦዴዳ፥ “እት ብታነዉ ዎይንያ ቱራ ጎሻ ጋደን ቶከቴዳ ባላስያ ጌተትያ አይፊ ሜተትያ ምꬃታ ደአዉ፤ ሄ ብታኒካ ምꬃታ አይፋደንቶነ ጊደ ዬዳዌ፥ አይኔካ አይፍያ ደምቤና። 7 ዎይንያ ቱራ ናግያዋ እ፥ ‘ታን ሀ ባላስያ ጌተትያ ምꬃትፐ አይፍያ ደማናዉ ሄዙ ላይꬃ ስመረታደ አያነ ደማበይከ። ሄዋ ድራዉ ደካ ደንꬃ ድጋ፤ አያዉ ቢታ ጮ መልሳይ?’ ያጌዳ። 8 ናግያዌካ ዛሪደ፥ ‘ጎዳዉ፥ ታን እ ዩሹዋ ሀሩማናዉነ ፕቱዋ ኦላናዉ፥ ሀ ላይꬃ ጻላላዉ ባሻ። 9 ስንꬃዉ አይፎፐ ሎአ፤ ሽን አይፈናን እጾፐ ደከቱ’ ጌዳ” ያጌዳ።

10 የሱስካ እት ሳምባታ ጋላስ አይሁዳ ዎሳ ጎላቱዋፐ እቱዋን ታማርስ ደኤ። 11 ሄዋንካ ታማነ ሆስፑን ላይꬃ ኩመንꬃ ቱና አያናይ ቁንሴዳ ምሽራታ ደአዉ። እዛካ ሱራደ ኤቃናዉ አይነ ዳንዳያበይኩ። 12 የሱስካ እዞ በኤዳ ዎደ ጼሲደ፥ “ሀ ምሽራቴ፥ ነ ሀርግያፐ ፓጻዳ” ያጌዳ። 13 የሱስ ባረ ኩሽያ እዝ ቦላ ዎꬅና፥ ሄ ዎደ ሱራ ስት ጋ ኤቃደ ባረ ጾሳ ጋላታዱ።

14 ሽን አይሁዳ ዎሳ ጎለ ካፑ ቃይ የሱስ ሳምባታን ፓꬄዳዋ ድራዉ ሀንቀት ዛሮዋሽን አሳቱዋ፥ “ኪተታናዉ በስያ ኡሱፑን ጋላሳቱ ደኢኖ፤ ሄ ጋላሳቱን ዪደ ፓጽተፐ አትን ሳምባታን ግደና” ያጌዳ። ከሳ 20:9፣ 10፤ ዛረ. 5:13፣ 14

15 ጎዳይካ ዛሪደ፥ “ሀ ሎአ ማላትያ ኢታ አሳቶ፥ ህንተንቱፐ እቱካ ሳምባታ ጋላስ ቦራ ማጋዱዋፐ ዎይ ሀርያ ጋጻታፐ ብሊደ ሃꬃ ኡሻናዉ አፈኔ? 16 ሀና አብራሃሞ ያራ ግዴዳዉና፥ ታማነ ሆስፑን ላይꬃ ኩመንꬃ ጻላሂ ቃቼዳዉና ሳምባታ ጋላስ ሄ ቃሹዋፐ ብለታናዉ በሰኬ?” ያጌዳ። 17 ሀዋ ኦዴዳ ዎደ ኤቀትያዋንቱ ኡባይ ዬላቴድኖ፤ አሳይ ኡባይ ቃይ እ ኦꬄዳ ማላልስያ ኦሱዋን ኡባን ናሸቴድኖ።

18 የሱስካ፥ “ጾሳ ካዉተꬃይ አያ ማላቲ? እ አያ ማላትንቶ፥ ታን ህንተንታ ዎታ በሶ? 19 ጾሳ ካዉተꬃይ ሳናፍጭያ ጌተትያ ቄር ምꬃት አይፍያ ማላቴ። ሄ ምꬃት አይፍያ አሳይ አኪደ ጎሻ ጋርሳን ዘሬዳ፤ ዘረቶና ድጫደ ዎጋ ምꬃ ግዳዱ፤ ያትና ሳሉዋ ካፋቱካ እዝ አጫ ቦላ ባረንቶ ጎልያ ኬጼድኖ” ያጌዳ።

20 የሱስካ ዛሪደ፥ “ጾሳ ካዉተꬃይ አያ ማላትንቶ፥ ታን ህንተንታ ዎታ በሶ? 21 እት ምሽራታ ሄዙ ከርያ ꬊልያ አካደ፥ ሙናቄዳ ሙናቃይ ኡባይ ደንዳና ጋካናዉ፥ አን ትጌዳ እርሹዋ ማላቴ” ያጌዳ።

22 ሄዋፐ ካላ የሱስ የሩሳላመ ቢደ፥ ዎጋ ካታማንነ ቄር ካታማን ደእያ አሳ ታማርሲደ አꬌዳ። 23 ሄ ዎደ እት ብታኒ ሺቂደ አ፥ “ጎዳዉ፥ ጾሳ ፕርዳፐ አትያዋንቱ ጉꬃ አሳ ጻላሌ?” ያጌዳ።

ሄዋፐ ጉየ የሱስ ኡንቱንታ፥

24 “ታን ህንተንቶ ኦዳይ፤ ኡንአ ፐንግያና ገላናዉ ባጸትተ። ጮራ አሳይ ገላናዉ ኮዪኖ፤ ሽን ዳንዳይበይክኖ። 25 ጎልያዉ ደንዲደ፥ እፍꬃ ቃቾዋፐ ጉየ ህንተንቱ ካረን ኤቂደ፥ ‘ጎዳዉ፥ ጎዳዉ፥ ኑዉ ዶያርኪ’ ያጊደ ጼሳ ዶምያ ዎደ፥ እካ ዛሪደ፥ ‘ሀቃፐ ዬድተንቶ፥ ታን ህንተንታ ኤርከ’ ያጋናዋ።

26 “ሄ ዎደ ህንተንቱ፥ ‘ኑን ኔናና እትፐ ሜዶ፤ ኡሼዶ፤ ኔን ኑ ሄራንካ ታማርሳዳ’ ያጋናዋንታ።

27 “የሱስ ቃይ፥ ‘ታን ህንተንቶ ኦዳይ፤ ህንተንቱ ሀቃፐ ዬድተንቶ፥ ታን ህንተንታ ኤርከ፤ ኡባቱካ ማካላንቻቱ ታ ማታፐ ሃክተ’ ያጋናዋ። ማዝ. 6:8

28 “አብራሃሞ፥ ይሳቅ፥ ያቆብነ ናባቱ ኡባይ ህንተንቱ ካረን ኤቂሽን፥ ጾሳ ካዉተꬃን ደእያዋንታ ህንተንቱ በእያ ዎደ፥ ህንተንቶ ዬኮነ አቻ ꬋቁዋ ግዳናዋ። ማቶሳ 22:13፤ 25:30፤ 13:28፣ 29፤ ማቶሳ 8:11፣ 12

29 “አሳይ አዋይ ዶልያሳፐነ ዉልያሳፐ፥ ቃይ ክልባጋፐነ ህርክባጋፐ ዪደ፥ ጾሳ ካዉተꬃ ጋይታን ኡቲኖ። 30 በእተ፤ ጉየቴዳዋንቱ፥ ስንꬃታናዋንታ፤ ስንꬃቴዳዋንቱ ቃይ ጉየታናዋንታ” ያጌዳ። ማቶሳ 19:30፤ 20:16፤ ማር. 10:31

31 ሄ ዎደ ፓርሳዋቱዋፐ እቱ እቱ የሱሳኮ ዪደ፥ “ሄሮድሰ ኔና ዎꬋናዉ ኮይያ ድራዉ፥ ሀዋፐ ባ ድጋ” ያጌድኖ።

32 የሱስ ዛሪደ፥ “ቢደ ሄ ዎራካናዉ፥ ‘ሀቼነ ዎንት ኢታ አያናቱዋ ከሳና፤ ሀርጋንቻቱዋካ ፓꬃና፤ ሄዘንꬆ ጋላስ ታ ኦሱዋ ዉርሳና’ ያግተ። 33 ሀኖፐ አትን ናቢ የሩሳላመፐ ሀራሳን ሀይቃናዉ በሰና ድራዉ፥ ታን ሀቼ፥ ዎንትነ ዎንትፔሽ ኦግያ ቦላ ደአናዉ በሴ።

34 “የሩሳላመ ካታማ አሳዉ፥ የሩሳላመ ካታማ አሳዉ፥ ናባቱዋ ዎꬍያዋንቶ፥ ህንተንቱኮ ኪተቶዋንታ ሹቻን ጫድያዋንቶ፥ ኩታታ ባረ ማራቱዋ ባረ ቀፍያፐ ጋርሳና ሺሻ ሀጵያዋዳን፥ ታን ህንተንቱ ናና እት ጋድያ ሺሻናዉ አፑ ገደ ኮያድታ! ሽን ታና ድጌድታ። 35 በእተ፤ ጾሳይ ህንተንቱ ጎልያ አይነ ኦልቤና፤ ታን ህንተንቶ ያጋይ፤ ህንተንቱ፥ ‘ጎዳ ሱንꬃን ይያዌ አንጀቴዳዋ’ ጋና ጋካናዉ፥ ታና በእክታ” ያጌዳ።