1 አሳይ ባረ መቶ መꬍና ጎዳ ቦላ ዙዙሜዳ፤ ኡንቱንቱ ዙዙሚና ጾሳይ ስሲደ፥ ሀንቁዋ ኤጽ ከሴዳ። ያትና መꬍና ጎዳ ታማይ ኡንቱንቱ ግዱዋን ኤጺደ፥ ኡንቱንቱ ዱንካኔዳ ሳአዉ እት እት ጋጻ ባጋ ሜዳ። 2 ያትና አሳይ ሙሴዉ ዋስና፥ ሙሴ መꬍና ጎዳ ዎሴዳ። ታማይ ቶኤዳ። 3 መꬍና ጎዳ ታማይ ኡንቱንቱ ግዱዋን ኤጼዳ ድራዉ፥ ሄ ሳአይ ታብኤራ *ታብኤራ፦ ሀ ሱንꬃ ብለꬃይ “ኤጼዳ” ግያዋ። ጌተት ጼሰቴዳ።

4 እስራኤላቱዋና ደእያ ዱማ ዱማ ጋደ አሳይ ሀራ ቁማ ሎይꬅ አሞቴዳ። እስራኤልያ አሳይካ ቃይ ሀዋዳን ያጊደ ዬኩዋ ዶሜዳ፤ “ላ ኑን አሹዋ ሀቃፐ ደማኔ? 5 ኑን ግብጼ ጋድያን ሚሻ ጭገናን ጮ ምያ ሞልያ ሀሳዬቶ፤ ቃይ ቃይያ ምያ ፓራንጅያ ሌክያ፥ ዞልዶ ሌኪያ ማላትያ ማልእያ ሃꬃይ ኩሜዳ ሜሎንያ፥ አዱሳ ፓራንጅያ ሱንቁሩትያነ ቱሙዋ ሀሳዬቶ። 6 ሽን ሀእ ኑ ቆꬊ ጎርደቴዳ፤ ኑ አይፊካ ሀ ማናፐ አትና፥ ሀራባ አይነ በኤና” ያጌድኖ።

7 ማናይ ዴቡዋ አይፍያ ማላቴ፤ አ ማላይ ቦጽያ ምꬃ ጮሻ ማላቴ። ከሳ 16:31 8 አሳይ ዩይ ዩይ አ ቆሬ፤ ዎጻን ጋጬ፥ ዎይ ኡዱላን ጫዴ፤ ኡንቱንቱ አ ኦቱዋን ፐንትሲደ፥ ባሽያን ኮምፒኖ። እ ዛይትያን ሙናቂደ ኡኬዳ ኡክꬃዳን ማልኤ። 9 ቃማ ዱንካኔዳሳን ጻሳይ ዎꬍያ ዎደ፥ ማናይ አናና ዎꬌ።ከሳ 16:13-15

10 አሳይ ባረ ዱንካንያ ፐንግያን ፐንግያን ዬክሽን፥ ሙሴ ስሴዳ። መꬍና ጎዳ ሀንቁ ኤጽ ከሴዳ ድራዉ፥ ሙሴ ኡንኤቴዳ። 11 ሄዋ ድራዉ፥ ሙሴ መꬍና ጎዳ ሀዋዳን ያጊደ ኦቼዳ፤ “ኔን ታ ቦላ ነ ቆማ ቦላ አያዉ ሀ መቱዋ አሃዲ? ኔን ታናን አያዉ ናሸታበይኪ? ኔን ሀ አሳ ኡባ ቶኩዋ ታ ቦላ አያዉ ዎꬃዲ? 12 ሀ አሳ ኡባ ታን ሻሃራድታየ? ዎይ ኡንቱንታ ታን የላድታ? ‘ኔን ኡንቱንቱ ማይዛ አዋቶ፥ “ታን ህንተንቶ እማና” ጋደ ጫቄዳ ቢታ ጋꬃናዉ፥ ናናቱዋ ድችያና ꬋንꬅያ ናኣ ባረ ክዉዋን እድምያዋዳን፥ ኔን ኡንቱንታ ነ ክዉዋን እድማ’ ያጋደ ታዉ አያዉ ኦዳይ? 13 ሀ አሳዉ ኡባዉ ታን አሹዋ ሀቃፐ ደማኔ? ኡንቱንቱ ታና፥ ‘ምያ አሹዋ ኑዉ እማ’ ያጊደ ዬኪኖ። 14 ታን ሀ አሳ ኡባ ታረካ ቶካና ዳንዳይከ፤ ቶኩ ታዉ ሎይꬅ ዴጼ። 15 ስም ኔን ታና ሀዋዳን መቶታናዳን ኦꬃናዋፐ ታዉ ቃረታደ ታና ሀእ ዎꬋ ባሻ፤ ያቶፐ፥ ታን መቱዋፐ ሸምፓና” ያጌዳ።

16 መꬍና ጎዳይ ሙሳ፥ “እስራኤልያ ጭማቱዋፐ ካለꬅያዋንታነ ካፓቱዋ ግድያ፥ ኔን ኤርያ ላፑን ታሙ ጭማቱዋ ታዉ ሺሻ፤ ኡንቱንቱ ኔናና ያን ኤቃና ማላ፥ ጾሳ ዱንካንያኮ፥ ኡንቱንታ ኔን አያ። 17 ታን ዱገ ዎꬋደ ኔናና ያን ሃሳያና፤ ታን ኔናን ደእያ አያናፐ አካደ፥ ሄ አያና ኡንቱንቱ ቦላ ዎꬃና። ኔን ኔረካ ቶከና ማላ፥ ኡንቱንቱ አሳ ቶኩዋ ቶኪደ፥ ኔና ማዳና።

18 “ኔን አሳዉ ሀዋዳን ጋደ ኦዳ፥ ‘ዎንትዉ ህንተና ጌሽተ፤ ያቲደ ህንተ አሹዋ ማና። ህንተ፥ “ላ ኑን አሹዋ ሀቃፐ ደማኔ? ኑዉ ግብጼ ጋድያን ሳአይ ሎአ ሽን!” ያጊደ ዬኬዳዋ መꬍና ጎዳይ ስሴዳ። መꬍና ጎዳይ አሹዋ ሀእ ህንተንቶ እማና፤ እምና ህንተ ማና። 19-20 ህንተ ግዱዋን ደእያ መꬍና ጎዳ ህንተ ካꬌዳ ድራዉነ ህንተ፥ “ኑን ግብጼ ጋድያፐ አያዉ ከሴዶ?” ያጊደ አ ስንꬃን ዬኬዳ ድራዉ፥ ህንተ እት ጋላሳ፥ ዎይ ላኡ ጋላሳ፥ ዎይ እቼሹ ጋላሳ፥ ዎይ ታሙ ጋላሳ፥ ዎይ ላታሙ ጋላሳ ጻላላ አሹዋ ሚክታ፤ ሽን ህንተንቶ ሲꬍያና ከሳና ጋካናዉ፥ ህንተና ሳለꬃና ጋካናዉ፥ እት አግና ኩመንꬃ ህንተ አሹዋ ማና’ ያጋ” ያጌዳ።

21 ሽን ሙሴ ጾሳ፥ “በአ፥ ታን ኡሱፑን ጼቱ ሻአ ግድያ አሳ ግዱዋን ደአይ፤ ኔን፥ ‘እት አግና ኩመንꬃ ኡንቱንቱ ማናዉ ኡንቱንቶ ታን አሹዋ እማና’ ጋዳ። 22 ሚዛ ዉድያነ ዶርሳ ዉድያ ኡንቱንቶ ሹክና ካልሳኔ? አባን ደእያ ሞልያ ኡባ ሺሽያዋ ግድንቶነ፥ ኡንቱንቶ ግዳኔ?” ያጌዳ።

23 መꬍና ጎዳይ ሙሳ፥ “መꬍና ጎዳ ኩሺ ቃንꬄየ? ታን ነዉ ግያባይ ቱመንቶነ ዎርደንቶ ኔን ሀእ በአና” ያጌዳ።

24 ሙሴ ካረ ከሲደ፥ መꬍና ጎዳይ ጌዳዋ አሳዉ ኦዴዳ። እ እስራኤልያ ጭማቱዋፐ ላፑን ታሙ አሳ ሺሺደ፥ ዱንካንያ ዩሹዋን ኤሴዳ። 25 መꬍና ጎዳይ ሻሪያን ዱገ ዎꬊደ፥ አናና ሃሳዬዳ፤ ያቲደ አ ቦላን ደእያ አያናፐ አኪደ፥ ሄ ላፑን ታሙ ጭማቱዋ ቦላ ዎꬄዳ። አያናይ ኡንቱንቱ ቦላን ሸምፔዳ ዎደ፥ ኡንቱንቱ ትምቢትያ ኦዴድኖ። ሽን ሄዋፐ ጉይያን፥ ዛረꬂደ ትምቢትያ ኦድበይክኖ።

26 ሄ ላፑን ታሙ ጭማቱዋና ማዝጎብያን ጻፈቴዳ አሳቱ ኤልዳዳነ መዳዳ ግያ ላአቱ ዱንካኔዳሳን አቴድኖ፤ ዱንካንያኮ ይበይክኖ፤ ሽን ኡንቱንቱ ቦላካ አያናይ ዎꬍና፥ ዱንካኔዳሳን ትምቢትያ ኦዴድኖ። 27 እት ዎዳላይ ዎጽ ዪደ፥ ሙሳ፥ “ኤልዳድነ መዳድ ዱንካኔዳሳን ትምቢትያ ኦዲኖ” ያጊደ ኦዴዳ።

28 ባረ ያላጋተꬃፐ ዶሚደ፥ ሙሳ ማድያ ኔዌ ናአይ ኢያሱ ሙሳ፥ “ታ ጎዳዉ ሙሴ፥ ኔን ኡንቱንታ ተአ” ያጌዳ።

29 ሽን ሙሴ አ፥ “ታ ግሻታ ነ ምሸታይ? መꬍና ጎዳ አሳይ ኡባይ ትምቢትያ ኦድያዋነ መꬍና ጎዳይ ባረ አያና ኡንቱንቱ ቦላ ዎꬅያዋ ግዴረኔሻ!” ያጌዳ። 30 ሄዋፐ ጉይያን፥ ሙሴነ እስራኤልያ ጭማቱ ዱንካኔዳሳ ስሜድኖ።

31 ሄዋፐ ጉይያን፥ መꬍና ጎዳይ ጫርኩዋ ደንꬅና፥ አባ ባጋፐ አካ አሳይ ዱንካኔዳሳ ኡባ ዩሹዋኮ ጫርኩ አሄዳ፤ ሄ ካፎቱ ሳኣ ዶናና ጋድያፐ ፑደ ላኡ ዋꬋ ኬሻን ፓሌድኖ። ዪደ ኡንቱንቱ ዱንካኔዳሳ ኡባፐ ጋጻና፥ እት ጋላሳ ኦገ ኬና ሳኣን ኡቴድኖ። 32 ሄ ጋላሳ ኡባን፥ ሄ ቃማ ኡባንነ ዎንተꬃ ጋላሳ ኡባን አሳይ ካረ ከሲደ፥ ሀ አካቱዋ ኦይቂደ ሺሼዳ፤ ኡንቱንቱፐ ኦንነ እት ሻአ ኪሎ ግራመፐ ጉꬃ ሺሽቤና። ኡንቱንቱ ሄዋፐ ጉይያን፥ ዱንካኔዳሳ ዩሹዋ ኡባን መልሳናዉ ምጬድኖ። 33 ሽን አሹ ብሮ ኡንቱንቱ ማታን ደእሽን፥ ኡንቱንቱ ጮሚደ ምተናን ደእሽን፥ መꬍና ጎዳ ሀንቁ አሳ ቦላ ኤጽ ከሴዳ፤ ያትና መꬍና ጎዳይ አሳ ዎልቃማ ቦሻን ሾጬዳ። 34 ያትና ሄ ሳአይ ክብሮት ሀታባ (አሙዋ ዱፉዋ) ጌተት ሱንቴዳ፤ አያዉ ጎፐ፥ አሹዋ አሞቴዳ አሳ ኡንቱንቱ ሄ ሳኣን ሞጌድኖ። 35 አሳይ ሄዋፐ ደንዲደ ሀጸሮታ ግያሳ ቢደ፥ ያን ዱንካኔዳ።