5
ዎንታ ዎሳ
ዛማረቱዋ ካፖ ሱሱላቱዋን የጸቴዳ፥ ዳዊታ ማዝሙርያ
1 አቤት መꬍና ጎዳዉ፥ ታን ኦድያዋ ሀይዛ፤
ታ ኦልያነ ስሳ።
2 ታ ካትያዉነ ታ ጾሳዉ፥
ታና ማዳ ጋደ ታ ኔኮ ዋስይያ ድራዉ፥
ታ ዎሳ ስሳ።
3 አቤት መꬍና ጎዳዉ፥
ዎንታ ዎንታ ጉራን ኔን ታ ቃላ ስሳሳ።
ዎንታ ዎንታ ጉራን ታን ታ ዎሳ ነ ስንꬃ ሺሻደ፥
ኔን ታዉ እምያ ዛሩዋ አካና ጋደ ናጋይ።
4 ኔን ኢታተꬃን ናሸተና ጾሳ፤
ኢታባይ ኔናና ደኤና።
5 ጬቀትያዋንቱ ነ ስንꬃን ኤቂክኖ፤
ኢታባ ኦꬅያ ኡባቱዋ ኔን እጻ።
6 ዎርዱዋ ሃሳይያዋንታካ ኔን ꬋይሳሳ።
ሱꬃ ጉስያዋንታነ ጭምያ አሳቱዋ፥
ጾሳይ ሸነቴ።
7 ሽን ታን ነ ማሮታ ዳሩዋን
ነ ጎልያ ገላና።
ነ ጌሻ ጎልያኮ ስማደ፥
ነዉ ያሻተꬃን ጎይናና።
8 አቤት መꬍና ጎዳዉ፥ ታና ነ ጽሎተꬃን ካለꬃ፤
ታ ሞርከቱዋ ድራዉ ጋደ፥
ነ ኦግያ ታ ስንꬃን ሱርሳ።
9 ኡንቱንቱ ዶናፐ ከስያዌ አማንና።ሮመ 3:13
ኡንቱንቱ ዎዛናንካ ገኒ ኩሜዳ፤
ኡንቱንቱ ዶናይ ዶየቴዳ ዱፉዋ ማላ፤
ኡንቱንቱ ባረንቱ እንጻርሳን ጭሚኖ።
10 አቤት ጾሳዉ፥ ኡንቱንታ ኔን ፕርዳ፤
ኡንቱንቱ ኮባይ ኡንቱንታ አክ ቦ።
ኡንቱንቱ ናጋራይ ዳሮ ግዴዳ ድራዉ፥
ኔን ኡንቱንታ የደርሳ፤
አያዉ ጎፐ፥ ኡንቱንቱ ነ ቦላ ማካሌድኖ።
11 ሽን ኔኮ ባቃት ቆሰት አትያ ኡባይ ናሸትኖ፤
ኡንቱንቱ ኡባ ገደ ናሸቻን የጽኖ።
ኔንካ ኡንቱንታ ናጋና፤
ነ ሱንꬃ ሲቅያ ኡባቱ ኔናን ሎይꬅ ናሸትኖ።
12 አያዉ ጎፐ፥ አቤት መꬍና ጎዳዉ፥
ቱሙካ ኔን ጽሉዋ አንጃሳ።
ኔን ጎንዳሊ ካምያዋዳን ነ ኬካተꬃን አ ካማሳ።