7
የደሳ ዎድያን ጽሎ አሳ ዎሳ
ቢንያማ ዛርያ ኩዛዋ ዳዊተ፥ ጾሳኮ ዝላሌዳ ዝላሳ።
1 አቤት መꬍና ጎዳዉ፥ ታ ጾሳዉ፥ ታን ኔኮ ባቃታደ ቆሰታይ።
ታና የደርስያ ኡባቱዋፐ ኔን ታና አሻ አካ።
2 ኔን ታና አሸናባ ግዶፐ፥
ኡንቱንቱ ታና ጋሙዋዳን ቦንቂደ፥
ኦንነ አሸናን መንሬꬃና።
3-4 አቤት መꬍና ጎዳዉ ታ ጾሳዉ፥
ታን አሳ ናቄዳዋ ግዶፐ፥
ሄዌነ ታ ላግያዉ ሎኡዋ ድራዉ ኢታ ዛሬዳዋ ግዶፐነ፥
ዎይ ጋሱ ባይናን ታ ሞርክያ ቦንቄዳዋ ግዶፐ፥
ሀዋ ማላ የዎቱዋፐ እቱዋነ ታን ኦꬄዳዋ ግዶፐ፥
5 ታ ሞርኪ ታና የደርሲደ ኦይቆ።
ታና ሳኣን የሬꬆ፤
ያቲደ፥ ታና ቢታን ኦል ባሾ።
6 አቤት መꬍና ጎዳዉ፥ ነ ሀንቁዋን ደንዳ ኤቃ፤
ታ ሞርከቱዋ ኤጽያ ሀንቁዋ ቦላ ደንዳ።
ታ ጾሳዉ ጎዳዉ፥ ቤጎታ፤ ቱሙዋ ፕርዳ።
7 ካዉተꬃቱዋ ሺቁ ነ ዩሹዋን ሺቆ፤
ኔን ኡንቱንቱፐ ቦላና ግዳደ ሃና።
8 መꬍና ጎዳይ ካዉተꬃቱዋ ቦላ ፕርዴ።
አቤት መꬍና ጎዳዉ፥ ታዉ ታ ጽሎተꬃዳን ፕርዳ፤
አቤት ኡባፐ ꬎቃዉ፥ ታ ሱረተꬃዳን ፕርዳ።
9 ቆፋነ ዎዛና ብዳደ ኤርያ ጽሎ ጾሳዉ፥ ሳፃ 2:23
ኢታቱዋ ገንያ ኔን ꬋይሳ።
ሽን ጽሉዋ ሳሮታን ምንሳ ዎꬃ።
10 ዎዛና ጽሉዋ አሽያ ጾሳይ
ታዉ ጎንዳለ።
11 ጾሳይ ጽሉዋ ፕርድያዋ፤
እ ሀች ሀች ሀንቀትያ ጾሳ።
12 አሳይ ባረ ናጋራ ፓጺደ ስመናን እጾፐ፥
ጾሳይ ባረ ማሻ ሌፌ፤
እ ባረ ዎንዳፍያ ጊግሴ።
13 እ ባረ ዎꬍያ ኦላ ሚሻቱዋ ጊግሴ፤
ታማ ላጩዋዳን ጶልያ ባረ ዎንዳፍያ ቶራ ጊግሴ።
14 ኢታተꬃ ሻሃሬዳ፥
ገንያ ሻሃራ ሻሃሬዳዌ፥ ዎርዱዋ የሌ።
15 ሀራ አሳቶ ኦላ ቦኬዳ አሳይ
ባረ ቦኬዳ ኦላን ባረዉ ኩንዴ።
16 እ አህያ ገኒ አ ሁጲያዉ ስሜ።
አ ማካላይነ አ ሁጲያዉ ስሜ።
17 መꬍና ጎዳ ጽሎተꬃ ድራዉ፥
ታን አ ጋላታና፤
ቃይ ኡባፐ ꬎቂያ መꬍና ጎዳ ሱንꬃዉ፥
ታን ጋላታ የጻና።