22
ጽሎ አሳ መቱዋነ ህዶታ
ዛማረቱዋ ካፖ የጸቴዳ፥ ዳዊታ ማዝሙርያ። ዎንታ ጉራ “ገንእያ” የꬃዳን የጸቴዳ ዳዊታ ማዝሙርያ
1 ታ ጾሳዉ፥ ታ ጾሳዉ፥ ታና አያዉ አጋዲ?ማቶሳ 27:46፤ ማር. 15:34
ታና ማዳ ጋደ ታን ነዉ ዋትዋትያ ዎደ፥
አያዉ ታፐ ሃካይ?
2 አቤት ታ ጾሳዉ፥ ጋላሳን ኡባን ታን ነዉ ዋሳይ፤
ሽን ኔን ታዉ አላካ።
ቃማን ኡባንካ ነዉ ዋሳይ፥
ሽን ዎፓ ደምከ።
3 ግዶፐነ፥ ኔን ጌሻ።
እስራኤልያ ጋላታይ ነ አራታ ዩሹዋን ደኤ።
4 ካሰ ኑ አዎቱ ኔናን አማነቴድኖ፤
ኔናን አማነትና፥ ኔን ኡንቱንታ አሻዳ።
5 ነዉ ዋሲደ አቴድኖ፤
ኔናን አማነቲደ ዬላትበይክኖ።
6 ሽን ታን አሳ ግድከ፤ ታን ጉጹንያ።
ታን አሳን ካꬌተዳዋነ ቅሊጨቴዳዋ።
7 ታና በእያ ኡባቱ ቅꬊኖ፤ማቶሳ 27:39፤ ማር. 15:29፤ ሉቃሳ 23:35
ኡንቱንቱ ታና ጽት ጼሊኖነ ባረንቱ ሁጲያ ቃꬂኖ።
8 ያቶፐ፥ “እ መꬍና ጎዳን አማነቴዳ፤ ማቶሳ 27:43
አያዉ አ አሸኔ?
መꬍና ጎዳይ አ ዶሶፐ፥
አነ አ አሾ” ያጊኖ።
9 ግዶፐነ፥ ታና ታ አት ኡሉዋፐ ሱረ የልሴዳዌ ኔና፤
ታ አት ꬋንꬃ ꬋምያ ዎደካ ታን አማነታናዳን ኦꬃዳ።
10 ታን የለቶደፐ ዶማደ ኔናን ድጫድ፤
ታ አት ኡሉዋፐ ዶማደካ፥ ኔን ታ ጾሳ።
11 መቱ ታኮ ማትያ ድራዉነ
ታና ማድያዌ ባይና ድራዉ፥
ሀእ ኔን ታፐ ሃኮፓ።
12 ዳሮ ሞርከቱ ኮሩማ ቦራቱዋዳን ታና ዶዲኖ፤
ቃይጭያ ባሳነ ቢታ ቦራቱዋዳን ታና ዶዲኖ።
13 መንሬꬅያነ ጉድያ ጋሙዋዳን
ባረንቱ ዶና ታ ቦላ ሀንጊኖ።
14 ታን ሃꬃዳን ጎጋድ፤
ታ መቀꬃቱ ባረንቱ ኩሻፐ ኮለቴድኖ።
ታ ዎዛናይ ኤሳ ሙቃዳ ማላ፥
ታ ግዶን ሴር ዉሬ።
15 ታ ቆꬊ ኮንኣዳን መሌ፤
ታ እንጻርሳይ ኮክያና ኦይቀቴ።
ኔን ታና ሀይቄዳ አሳዳን ባናን የጋዳ።
16 ካናቱ ታና ተኤድኖ፤
ኢታ አሳቱ ታ ዩሹዋን ዶዴድኖ።
ታ ኩሸቱዋነ ታ ገደቱዋ ጫዲኖ።
17 ታ መቀꬃቱዋ ኡባ ታን ፓይዳይ።
ታ ሞርከቱ ታና ጼሊኖነ ደረቂኖ።
18 ታ ማዩዋ ሻክ አኪኖ፤ ማቶሳ 27:35፤ ማር. 15:24፤ ሉቃሳ 23:34፤ ዮሃ. 19:24
ታ አዱሳ ማዩዋን ሳማ የጊኖ።
19 አቤት መꬍና ጎዳዉ፥ ኔን ታፐ ሃኮፓ።
አቤት ታ ዎልቃዉ፥ ታና ማዳናዉ ኤለካ ሃያ።
20 ታና ማሻፐ አሻ፤
ታ አልኦ ደእያ ካናቱዋ ዎልቃፐ አሻ።
21 ጋሞቱዋ ዶናፐ ታና አሻ፤
ቃይጭያ ባዙዋ ቦራቱዋ ካጭያፐ ታና ናጋ።
22 ታን ነ ሱንꬃ ታ እሻቶ ኦዳና፤ እብራ. 2:12
ማባራ ሺቁዋንካ ኔና ጋላታና።
23 ህንተኖ፥ መꬍና ጎዳዉ ያይያዋንቶ፥ አ ጋላትተ።
ህንተኖ፥ ያቆባ ዘረꬃቶ፥
ኡባይካ አ ቦንችተ።
ህንተኖ፥ እስራኤልያ ዘረꬃቶ፥
ኡባቱካ ቦንቹዋን አዉ ያይተ።
24 እ ናቀቴዳዋንታ ካና፤
ኡንቱንታ ጋኬዳ ቆሁዋ ታዉ አይ መቴ ጌና።
ባረ ሶምኡዋ ኡንቱንቱፐ ገንና፤
ሽን ኡንቱንቱ ማዶ አኮ ዋስያ ዎድያን፥
ኡንቱንቱ ዋሱዋ ስሴ።
25 ታን ኔን ኦꬄዳ ሎኦ ኦሱዋ ድራዉ፥
ኩንꬄዳ ሺቁዋን ጋላታና።
ታን ሺቀቴዳዋ ነዉ ያይያ አሳ ስንꬃን ጋꬃና።
26 ህዬሳቱ ሚደ ካላና።
መꬍና ጎዳ ኮይያዋንቱ አ ጋላታና።
ኡንቱንቱ መꬍናዉ ደአና።
27 ሳኣ ጋጻ ጋካናዉ አሳይ ኡባይ
ሀሳዪደ፥ መꬍና ጎዳኮ ስማና።
አሳ ዛረ ኡባይ አዉ ጎይናና።
28 አያዉ ጎፐ፥ ካተትያ ማታይ መꬍና ጎዳዋ፤
ካዉተꬃቱዋ እ ሞዴ።
29 ሳኣን ደእያ ዱረ አሳቱ ኡባይ
አዉ ጎይናና።
ባረንታ ሀይቁዋፐ አሻናዉ ዳንዳየናዋንቱነ
ባናዉ ላመትያዋንቱ ኡባቱ አዉ ጉልባታና።
30 ይያ ዘረꬃይ አዉ ኪተታና፤
አሳይ ጎዳ ኦሱዋ ይያ የለታዉ ኦዳና።
31 ብሮ የለትቤና አሳይካ አ ጽሎተꬃ ኦዳና።
“ጾሳይ ባረ አሳ አሼዳ” ያግያዌ ኦደታና።