አዉደነ ታና ዬላዮፓ።

ነ ጽሎተꬃን ታና አሻ።

ኤለካ ታና አሻ።

ታና አሽያ ምኖ ጌሱዋ ታዉ ግዳ።

ነ ሱንꬃ ድራዉ፥ ኔን ታና ካለꬃነ ነ ኦግያ በሳ።

ኡንቱንቱ ታዉ ቆስ ዎꬄዳ ጲርያፐ ታና ኔን ናጋ።

ታን ታ ሸምፑዋ ነ ኩሽያን ዎꬃይ፤ሉቃሳ 23:46

ኔን ታና ዎዛ።

ሽን ታን መꬍና ጎዳን አማነታይ።

ታ ቱጋ ኔን ኤሬዳ ድራዉ፥

ናሸቻን ኖጩ ጋና።

ታ ገደቶካ ላአተꬃ እማዳ።

ታን መቱዋን ገሌዳ ድራዉ፥ ታዉ ቃረታ።

ታ አሹካ፥ ታ ሸምፑካ ዳቡሬዳ።

ታ ላይꬃቱካ ኦልሽን ዉሬድኖ።

ታ መቀꬃቱካ አርጋጬድኖ።

ታን ታ ሾሮቶ ዬላ፥

ኦግያን ታና በኤዳዋንቱካ ታፐ ባቃቲኖ።

መእና ኦሌዳ ኦቱዋ ማላ ግዳድ።

ዳጋማይ ኡባ ሳን ደኤ።

ኔን ታ ጾሳ ያጋይ።

ታና የደርስያ ታ ሞርከቱዋ ኩሽያፐ ታና ኔን አሻ።

አገና ነ ሲቁዋን ታና አሻ።

ታና ዬላዮፓ።

ኡንቱንቱ ዱፉዋን ገሊደ፥ ስርጵ ጊኖ።

ጻሊደ ሃሳይያ ድራዉ፥

ኔኮ ባቃትያዋንቶ አሳ ስንꬃን፥

ኔን ኦꬄዳ ነ ኬካተꬃይ አያ ዳሬ!

አሳ ማቁዋፐ አሻሳ።

ኢታ እንጻርሳፐ አሻሳ።

እ ታና ማላልስያ ባረ አገና ሲቁዋ በሴዳ ድራዉ፥

“ታን ነ ስንꬃፐ ክቻድ” ያጋድ።

ታ ዋሱዋ ኔን ስሳዳ።

መꬍና ጎዳይ አማነትያዋንታ ናጌ፤

ሽን ኦቶራንቻቶ ኡንቱንቱ ጋትያ ዉርስ ጭጌ።

ምንተነ ዎዛናምተ።