39
መቱ ጋካ አሳ ፓጸꬃ
ዳዊተ ዛማረቱዋ ካፑዋ ጁዱቶ የጼዳ አማኑዋ ቃላ (1 ኦዱዋ 25:3)
1 ታን፥ “ታ እንጻርሳን ናጋራ ኦናዳን፥
ታ ኦግያ ናጋና።
ኢታ አሳቱ ታ ስንꬃን ደእያ ዎደ፥
ታ ዶና ባራና” ያጋድ።
2 ሽን ታን ዱድያዳን ጮኡ ጋድ፤
ታን ሀራይ አቶ ሎኦባ ሃሳይያዋካ አግና፥
ታ ዋዪ ያ ዳሬዳ።
3 ታ ዎዛናይ ታ ጋርሳን ሴሌዳ፤
ታ ቆፋይ ፖዱ ጊደ፥ ኤጽ ከሴዳ።
ያትና፥ ታ እንጻርሳን ሀዋዳን ያጋድ፤
4 “አቤት መꬍና ጎዳዉ፥ ታ ደኡዋ ዉርሰꬃነ
ታ ደአናዉ አቴዳ ጋላሳ ታና በሳ።
ቃይ ታ ደኡ ዉራናዉ አይ ኬሻ ኤሌልንቶ፥ ታና ኤርሳ።
5 ኔን ታ ላይꬃ ጺ ታካ ኬሻ ከሳዳ።
ታ ላይꬃይ ነ ስንꬃን ባይናዋ ማላ፤
ቱሙዋፐ አሳይ ኡባይ እት ገደ ሸምፕያ ጫርኩዋ ማላ።
6 ቱሙዋፐ አሳይ ኤሹዋዳን ሀመቴ፤
ቱሙዋፐ ጮ መላ ስመረቴ።
እ ማጹዋ ሺሼ፤ ሽን አካና አሳ ኤረና።
7 “አቤት ጎዳዉ፥ ሀእ ስም፥
ታን ናግያዌ አዬ?
ታን ህዶታ ኦꬅያዌ ኔናና።
8 ታ ባይዙዋ ኡባፐ ታና አሻ፤
ኤያቱዋን ታና ቶሽሶፓ።
9 ሀዋ ኡባ ኦꬄዳዌ
ኔና ግድያ ድራዉ፥ ታን ዱዳድ፤
ዶናነ ፖጋበይከ።
10 ነ ቦሻ ታ ቦላፐ ደንꬃ።
ነ ኩሽያ ምኖተꬃ ጋሱዋን ታን ዳቡራድ።
11 ኔን አሳ አ ናጋራ ድራዉ፥ ሴራሳነ ሙራሳ፤
አ አልኦ ሸምፑዋ ብልኣዳን ዉርሳሳ።
ቱሙዋፐ አሳይ ኡባይ እት ገደ ጫርክያ ጫርኩዋ ማላ።
12 “አቤት መꬍና ጎዳዉ፥ ታ ዎሳ ስሳ፤
ታና ማዳናዉ ታ ዋሱዋ ሀይዛ።
ታ አፎꬃ ጮኡ ጎፓ፤
አያዉ ጎፐ፥ ታን ታ አዎቱዋ ኡባዳን በተነ እማꬃ ግዳደ፥
ኔናና ደአይ።
13 ታን ሻከታናፐነ ꬋያናፐ፥
ካሰታደ ናሸታና ማላ፥
ሀእ ታና አጋ” ያጋድ።