41
ሀርጋንቻ አሳ ዎሳ
ዛማረቱዋ ካፖ የጸቴዳ፥ ዳዊታ ማዝሙርያ
1 ህዬሳዉ ቆፕያ አሳይ አንጀቴዳዋ፤
መቱዋ ጋላስ መꬍና ጎዳይ አ አሼ።
2 መꬍና ጎዳይ አ ናጊደ፥ ፓጻ ዎꬄ።
እነ ቢታ ቦላን አንጀቴዳዋ ግዴ፤
ጾሳይ አ አ ሞርከቱዋ አሞ አꬂደ እመና።
3 መꬍና ጎዳይ አ ሀርግያ ሂꬃን ደእሺናካ ማዴ፤
እ ሳከትናካ፥ አ ፓꬄ።
4 ታና ግዶፐ፥ ታን፥ “አቤት መꬍና ጎዳዉ፥
ታን ኔና ናቄዳ ድራዉ፥ ታና ማራ፤
ሀርግያፐካ ታና ፓꬃ” ያጋድ።
5 ታ ሞርከቱ ኢታባን ታና ሃሳዪደ፥
“እ አዉደ ሀይቃንዴሻ?
ቃይ አ ሱንꬃይካ አዉደ ꬋያንዴሻ?” ያጊኖ።
6 ታና በአናዉ ይያ ኦንነ ታዉ ዎርዶባ ኦዴ፤
ባረ ዎዛናን ታና ዝግርያዋ ብዴ።
ሄዋፐ ጉይያን፥ ካረ ከሲደ፥
ያነ ሃነ ኦዱዋ ላሌ።
7 ታና እጽያ ኡባቱ
እትፐ ታ ቦላን ሳሱኪኖ፤
“ኢታባይ አ ቦላ ጋኬ” ጊደ ቆፒኖ።
8 ኡንቱንቱ “አ ኢታ ሀርጊ ኦይቄዳ፤
እ ሄ ግሴዳሳፐ ኡባካ ደንደና” ያጊኖ።
9 ሀራይ አትና፥ ታን አማነትያ ታ ሲቆ ላጊ፥ ማቶሳ 26:23፤ ማር. 14:18፤ ሉቃሳ 22:21፤ ዮሃ. 13:18
ታን ባርሴዳዌ ታ ኩሽያ ሳኤዳ።
10 ሽን አቤት መꬍና ጎዳዉ፥ ኔን ታና ማራ፤
ታን ኡንቱንቱ ኩሽያ ከሳናዳን፥
ታና ሀርግያ ሂꬃፐ ደንꬃ።
11 ኔን ታናን ናሸታናዋ ታን ኤራይ፤
አያዉ ጎፐ፥ ታ ሞርኪ ታና፥
ጾኒደ ጋይረና።
12 ኔን ታና ታ ሱረተꬃ ድራዉ ዘምፕሳዳ፤
ነ ስንꬃን ታና መꬍናዉ ዎꬃዳ።
13 መꬍና ጎዳይ፥ እስራኤልያ ጾሳይ፥
መꬍናፐ መꬍና ጋካናዉ ጋላተቶ። ማዝ. 106:48
አመንእ። አመንእ።