ጌሻ ማጻፋ ማዝሙርያ 52

ኢታቱዋ ዉርሰꬃ ካጫ

ዛማረቱዋ ካፖ የጸቴዳ፥ ኤዶማ ቢታ አሳ ግድያ ዶይቅ ሳኦላኮ ቢደ፥ “ዳዊተ አብመሌካ ጎለ ቤዳ” ያጊደ ኦዲደ ስምና ዳዊታ አኬካ ግንጹዋ.

1 ኔኖ፥ ዎልቃማ ብታንያዉ፥

ጾሳ አሳቱዋ ቦላ ኢታባ ኦꬅያዋዳን፥

ጋላሳ ኡባን አያዉ ጬቀታይ?

2 ኔኖ፥ ዎርዶባ ሀንያዎ፥

ኔን ሀራቱዋ ꬋይሳናዉ ማቀታሳ።

ነ እንጻርሳይ ኩሳ ማቂልያ ማላ።

3 ኔን ሎኡዋፐ ኢታ ሲቃሳ፤

ቃይ ቱሙዋ ሃሳይያዋፐ፥

ዎርዱዋ ሃሳይያዋ ዶሳሳ።

4 ኔኖ፥ ዎርዳንቻዉ፥

ኔን ቆህያ ቃላ ኡባ ሲቃሳ።

5 ሽን ጾሳይ ኔና መꬍናዉ ꬋይሳና።

እ ኔና ዳፋናነ ነ ጎልያፐ ቦንቂደ ከሳና፤

እ ኔና ፓጻ ደእያዋንቱ ግዶፐ ꬎቆላና።

6 ጽሎቱ ሀዋ በኢደ ያያና።

ኡንቱንቱ ሀዋዳን ያጊደ፥ ነ ቦላ ሚጫና፤

7 “ጾሳ ባረዉ ጌሱዋ ኦꬅቤና፥

ባረ ዱረተꬃ ዳሩዋን አማነቴዳ፥

ኢታ ኦሱዋን ምኔዳ ብታንያ

ሀዋ በእተ!” ያጋና።

8 ሽን ታን ጾሳ ጎልያን አጭያ ዎጋራ ማላ።

አገና አ ሲቁዋን ታን መꬍ መꬍናዉ አማነታይ።

9 ኔን ኦꬄዳ ድራዉ፥

ታ ኔና ጋላታና፥

ታን ኔን ኬካ ግድያ ድራዉ ነ ሱንꬃን ህዶታ ዎꬃይ።

ታን ጾሳ አሳቱዋ ስንꬃን ኔና ሳባና።