ጌሻ ማጻፋ ማዝሙርያ 60

ጾሳይ አሽያዋ ቆንጭስያ ዎሳ

ዛማረቱዋ ካፖ፥ ማስጰጾምያንነ ሶባላን ደኤዳ ሶርያ አሳቱዋና ኦለቴዳ ዎደነ፥ ዮኣብ ጉየ ስሚደ ማጽንያ ዛንጋራን ታማነ ላኡ ሻኡ አሳ ዎꬌዳ ዎደ፥ ዳውት ትምርትያዉ ጻፌዳ ዎሳ። አድልያ ጪሻ ዋꬃ. ማርካተꬃ ዎሳ።

1 አቤት ጾሳዉ፥ ኔን ኑና አጋዳ፤

ኑና መንꬃዳ።

ኔን ኑና ሀንቀታዳ፤

ሽን ሀእ ኑኮ ስማ።

2 ኔን ቢታ ቃꬃዳነ ዛእሳዳ፤

ቢታይ ኮኮርያ ድራዉ፥ ኔን አ ዛኡዋ ባራ።

3 ኔን ነ አሳ መቱዋ በሳዳ፤

ኔን ኑና ጋንድጋርስያ ዎይንያ ኡሻዳ።

4 ነዉ ያይያዋንቱ፥

ባረንቱ ሞርክያ ዎንዳፍያፐ አታና ማላ፥

ማላ እማዳ።

5 ኔን ሲቅያዋንቱ አታና ማላ፥

ነ ኡሸቻ ኩሽያን ኑና አሻ፤

ኔን ኑዉ አላ።

6 ጾሳይ ባረ ጌሻ ሳኣን ሀዋዳን ያጌዳ፤

“ታን ጾናደ ሰኬማ ቢታ ሻካና፤

ቃይ ሱኮታ ዛንጋራ ልካና።

7 ጋላኣደ ታዋ፤ ምናሰካ ታሳ፤

ኤፍሬም ታ ሁጲያ ናግያ ቆብያ፤

ይሁዳይ ታ ካዉተꬃ ጻምኣ።

8 ሞኣበ ታን ሜጨትያ ኩይጻሩዋ፤

ኤዶም ታዋ ግድያዋ ኤርሳናዉ ታ ጫማ አ ቦላ ዎꬃይ፤

ታን ፕልስጼማ ጾናደ ገሬራይ” ያጌዳ።

9 ግምበቴዳ ካታማኮ፥ ታና ኦኔ አፋናዌ?

ኤዶማ ጋካናዉ ታና ኦኔ ካለꬃናዌ?

10 አቤት ጾሳዉ፥ ኑና አጌዳዌ ኔና ግድኪ?

አቤት ጾሳዉ፥ ኔን ኑ ቶራንቻቱዋና ኦላዉ ከሳካ።

11 አሳ ማዱ ፓና ድራዉ፥

ሞርክያና ኦለታናዉ ኔን ኑና ማዳ።

12 ጾሳ ዎልቃን ኑ ሞርከቱዋ ኑን ጾናና፤

ኑ ሞርከቱዋ የꬋናዌ አ።