135
ጋላታ ማዝሙርያ
1 መꬍና ጎዳ ጋላትተ!
ህንተኖ መꬍና ጎዳ ቆማቶ፥
መꬍና ጎዳ ሱንꬃ ጋላትተ!
2 ህንተኖ መꬍና ጎዳ ጎልያ ግዶን፥
ኑ ጾሳ ጎልያ ዳባባን ኤቄዳዋንቶ፥
ጾሳ ጋላትተ!
3 መꬍና ጎዳይ ኬካ ግድያ ድራዉ፥
መꬍና ጎዳ ጋላትተ!
እ ሎአ ግድያ ድራዉ፥
አ ሱንꬃ ሳቢተ!
4 መꬍና ጎዳይ ያቆባ ባረ ሁጰው፥
እስራኤልያ አሳካ ባረዉ ቡዞ ኦꬂደ ዶሬዳ።
5 መꬍና ጎዳይ ዎልቃማ ግድያዋነ
ኑ ጎዳይ ጾሳቱዋ ኡባፐ ꬎቂያዋ፥
ታን ኤራይ።
6 ሳሉዋንካ ሳንካ፥
አባቱዋንነ ኡንቱንቱ ጪሞቱዋ ኡባ ግዶንካ፥
መꬍና ጎዳይ ባረ ዶሴዳዋ ኡባ ኦꬄ።
7 እራ ቶኮ ሻርያ ሳኣ ጋጻፐ እ ደንꬄ፤
እ እራና ዋልቃንꬃ ኪቴ፤
ባረ ምንጅያ ሳኣፐ ጫርኩዋ ከሴ።
8 ግብጼ ቢታን አሳ ናናቱዋፐነ፥
መህያ ማራፐ፥
ባይራ የለቴዳዋንታ ዎꬌዳ።
9 ኔኖ ግብጼ፥ ፓርኦናነ አ ቆማቱዋ ሙራናዉ፥
ህንተንቱ ግዶን ኦራꬃባነ ማላልስያባ የዴዳ።
10 እ ዳሮ ካዉተꬃቱዋ ባይዜዳ፤
ዎልቃማ ካተቱዋካ ዎꬌዳ።
11 አሞረቱዋ ካትያ ስሆና፥
ባሳነ ካትያ ኦጋነ፥
ካናነ ካተቱዋ ኡባ ዎꬌዳ።
12 ኡንቱንቱ ቢታ ባረ አሳቱዋ፥
እስራኤላቱዋ ላትሴዳ።
13 አቤት መꬍና ጎዳዉ፥ ነ ሱንꬃይ መꬍናዉ ደአና፤
የለታፐ የለታ ጋካናዉ መꬍና ጎዳይ ሀሳየታና።
14 መꬍና ጎዳይ ባረ አሳዉ ፕርዳና፤
እ ባረ ቆማቶ ቃረታና።
15 ጋድያ አሳቱዋ ኤቃቱ አሳ ኩሺ
ብራፐነ ዎርቃፐ መꬌዳዋንታ።ማዝ. 115:4-8፤ ሳፃ 9:20
16 ኡንቱንቶ ዶናይ ደኤ፥ ሽን ሃሳይክኖ፤
አይፊ ደኤ፥ ሽን ጼልክኖ።
17 ሀይꬃይ ደኤ፥ ሽን ስስክኖ፤
ኡንቱንቱ ዶናን ሸምፑ ባዋ።
18 ኡንቱንታ መꬌዳዋንቱነ፥
ኡንቱንቱን አማነትያዋንቱ፥
ኡባይ ኡንቱንቱዳን ሀንኖ።
19 እስራኤልያ ጎልያ አሳቶ፥
መꬍና ጎዳ ጋላትተ፤
አሮና ጎልያ አሳቶ፥
መꬍና ጎዳ ጋላትተ፤
20 ሌዊያ ጎልያ አሳቶ፥
መꬍና ጎዳ ጋላትተ፤
መꬍና ጎዳዉ ያይያዋንቶ፥
ኡባይ መꬍና ጎዳ ጋላትተ።
21 የሩሳላመን ደእያ መꬍና ጎዳይ
ጽዮነን ጋላተቶ!
መꬍና ጎዳ ጋላትተ!