143
ጾሳ ማዱዋ ደማናዉ ሺቄዳ ዎሳ
ዳውት ጻፌዳ ማዛሙርያ
1 አቤት መꬍና ጎዳዉ፥ ታ ዎሳ ስሳ፤ ታ ዋትዋቱዋ ሀይዛ።
ኔን ጽሉዋነ አማነትያዋ ግድያ ድራዉ፥
ታዉ ዛሩዋ እማ።
2 ነ ስንꬃን ጽሎ ግዳና አሳይ ባዋ፤ ሮመ 3:20፤ ጋላ. 2:16
ሄዋ ድራዉ፥ ታና ነ ቆማ ፕርዳዉ ሺሾፓ።
3 ታና ታ ሞርኪ የደርሲደ፥
ቢታና ጋꬅ ክንቼሬꬄዳ፤
በን ሀይቄዳ አሳቱዋዳን ታና ꬉማን ዎꬄዳ።
4 ሄዋ ድራዉ፥ ታን ህዶታ ቃንጻድ፤
ታ ዎዛናይካ ይባቴዳ።
5 ታን በን ዎደቱዋ ሀሳያይ፤
ኔን ኦꬄዳ ኦሱዋ ኡባ ዛራ ዛራደ ቆፓይነ
ነ ኩሺ ኦꬄዳዋ አኬካይ።
6 ታን ታ ኩሽያ ኔኮ ምጫድ፤
መላ ቢታይ ሃꬃ ኮይያዋዳን፥
ታ ሸምፑ ኔና ሳመቴ።
7 አቤት መꬍና ጎዳዉ፥ ታዉ ዛሩዋ እማናዉ ኤሌላ!
ታን ህዶታ ቃንጻድ።
ታን ዱገ ዱፉዋን ገልያ አሳቱዋ ማላ ግደናዳን፥
ነ ሶምኡዋ ታፐ ገንꬆፓ።
8 ታን ኔና አማነትያ ድራዉ፥
ዎንታ ዎንታ አገና ነ ሲቁዋ ታና በሳ።
ታን ታ ሸምፑዋፐ ኔና ዎስያ ድራዉ፥
ታን ባናዉ በስያ ኦግያ ታና ታማርሳ።
9 አቤት መꬍና ጎዳዉ፥ ታን ኔኮ ባቃቴዳ ድራዉ፥
ታና ታ ሞርከቱዋፐ አሻ።
10 ኔን ታ ጾሳ ግድያ ድራዉ፥
ታን ነ ሸንያ ኦꬃና ማላ፥ ታና ታማርሳ፤
ሎኦ አያናን ታና ሱረ ኦግያ ካለꬃ።
11 አቤት መꬍና ጎዳዉ፥ ነ ሱንꬃ ድራዉ፥ ታና አሻ፤
ነ ጽሎተꬃን ታና መቱዋፐ ከሳ።
12 አገና ነ ሲቁዋን ታ ሞርከቱዋ ዎꬋ፤
ታ ባልጋራቱዋ ኡባ ꬋይሳ፤
አያዉ ጎፐ፥ ታን ነ ቆማ።