8
Yesuusi Ooratsa K'aalaa C'aak'uwaa
K'eesatuwaa Ubbatuwaa Kaappuwaa
K'eesatuwaa Ubbatuwaa Kaappuwaa
1 Nuuni haasayiyaa wolk'k'aamabay hawaa; saluwaan Ubbaappe Bolla S'oossay uttiyaa kawutetsaa oydiyaappe ushechcha baggana utteedda k'eesatuwaa ubbatuwaa kaappuu, hawaa malay nuw de'ee.Maz. 110:1 2 Geeshsha Sa'aaninne tumu Dunkkaaniyaan I ootsee; he Dunkkaanii Asay esseeddawaa gidennaan, S'oossay esseeddawaa.
3 K'eesatuwaa ubbatuwaa kaappuu ubbay imuwaanne yarshshuwaa S'oossaw immanaw suntsetteedda diraw, ha k'eesatuwaa ubbatuwaa kaappookka yarshshanaw ittibay de'anaw koshshee. 4 Simmi sa'aan I de'iyaawaa gidooppe, ubbakka k'eesa gidenna; ayaw gooppe, higgii azaziyaawaadan, imuwaa immiyaa k'eesatuu de'iino. 5 Unttunttu k'eesatuwaadan ootsiyaa kiitay saluwaan de'iyaa oosoo tumu leemisuwaanne eeshuwaa; ayaw gooppe, Muse Dunkkaaniyaa essana hanishin, S'oossay Aa, «Akeeka; ubbabaakka taani neena deriyaa huup'iyaan besseedda leemisuwaa kaalaade ootsa» yaageedda.Kes. 25:40 6 Shin Yesuusi gaannatiyaa c'aak'uu kasewaappe aad'd'iyaawaadankka, aw imetteedda oosuukka unttunttuwaappe aad'd'ee; ayaw gooppe, he c'aak'uu S'oossay immana geedda ubbaappe aad'd'iyaa kiitaan oosetteedda.
7 Ayaw gooppe, koyro c'aak'uwaan balay baynnawaa gidintto, laa'entso c'aak'uwaa koshshenna. 8 Shin unttuntta boriidde, Goday hawaadan yaagee;
«Taani Israa'eeliyaa asaananne Yihudaa asaana,
ooratsa c'aak'uwaa c'aak'k'etiyaa gallassatuu yaanawaa.Erm. 31:31-34
9 He c'aak'uu taani Gibs'e gadiyaappe,
unttunttu aawotuwaa kushiyaa oyk'k'aade, goochcha kesseedda wode,
unttunttunna c'aak'k'eteedda c'aak'uwaa mala gidenna.
Unttunttu ta c'aak'uwaan ammanettibeenna diraw,
taanikka unttuntta aggaad.
Taani, Goday, hawaa oday.
10 Ayaw gooppe, he gallassatuwaappe guyyiyaan,
taani Israa'eeliyaa asaana c'aak'k'etana c'aak'uu hawaa:
Taani ta higgiyaa unttunttu k'ofaan wotsana;
k'ay unttunttu wozanaankka s'aafana.
Taani unttunttu S'oossaa gidana; unttunttukka ta asaa gidana.
11 Unttunttuppe ooninne bare shooruwaa,
woy bare ishaa,
‹Godaa era› yaagiide tamaarissenna.
Ayaw gooppe, unttunttu na'aappe c'imaa gakkanaw ubbay taana eriino.
12 Taani unttunttu naak'uwaa maarana;
unttunttu nagaraakka laa'entso hassaykke»
yaagee. 13 S'oossay ooratsa c'aak'uwaa giide haasayiyaawan koyrowaa ec'iseedda; k'ay ec'iyaabaynne wuriyaabay ellekka d'ayana.