39
Metuu Gakka Asaa Paas'etsaa
Daawite Zammaaretuwaa Kaappuwaa Juddutoo Yes's'eedda Amanuwaa K'aalaa (1 Od. 25:3)
1 Taani, «Ta ins's'arssan nagaraa ootsennaadan,
ta ogiyaa naagana.
Iita asatuu ta sintsan de'iyaa wode,
ta doonaa barana» yaagaad.
2 Shin taani duudiyaadan c'o"u gaad;
taani haray atto lo"obaa haasayiyaawaakka aggina,
Ta waayii yaa dareedda.
3 Ta wozanay ta garssan seeleedda;
ta k'ofay poddu giide, ees's'i keseedda.
Yaatina, ta ins's'arssan hawaadan yaagaad:
4 «Abeet Med'inaa Godaw, ta de'uwaa wurssetsaanne
ta de'anaw atteedda gallassaa taana bessa.
K'ay ta de'uu wuranaw ay keeshshaa elleellintto, taana erissa.
5 Neeni ta laytsaa s'ii takkaad'e keeshshaa kessaadda.
Ta laytsay ne sintsan bayinnawaa mala;
tumuwaappe Asay ubbay itti gede shemppiyaa c'arkkuwaa mala.
6 Tumuwaappe Asay eeshuwaadan hamettee;
tumuwaappe c'oo mela simerettee.
I mas'uwaa shiishshee; shin akkana asaa erenna.
7 «Abeet Godaw, ha"i simmi,
taani naagiyaawe ayee?
Taani hidootaa ootsiyaawe neenana.
8 Ta bayzzuwaa ubbaappe taana ashsha;
eeyyatuwaan taana tooshissoppa.
9 Hawaa ubbaa ootseeddawe
neena gidiyaa diraw, taani duudaad;
Doonaanne pogabeykke.
10 Ne boshaa ta bollaappe dentsa.
Ne kushiyaa minotetsaa gaasuwaan taani daaburaad.
11 Neeni asaa Aa nagaraa diraw, seeraasanne muraasa;
Aa al"o shemppuwaa bil"aadan wurssaasa.
Tumuwaappe Asay ubbay itti gede c'arkkiyaa c'arkkuwaa mala.
12 «Abeet Med'inaa Godaw, ta woosaa sisa;
taana maaddanaw ta waasuwaa hayzza.
Ta afotsaa c'o"u gooppa;
ayaw gooppe, taani ta aawotuwaa ubbaadan betenne imatsaa gidaade,
neenana de'ay.
13 Taani shaakkettanaappenne d'ayanaappe,
kasetaade nashettana mala,
ha"i taana agga» yaagaad.