75
S'oossay Pirddiyaawaa Gidussaa
Zammaaretuwaa Kaappoo Aasaafi. «D'ayssoppa» Geetettiyaa Diitsaa waatsan Yes's'eedda Yetsaa.
1 New galataa immeeto; abeet S'oossaw, neena galateetto;
«Ne suntsay woggaa» giide awaayeetonne,
malalissiyaa ne oosuwaa ubbaa odeetto.
2 S'oossay, «Dooraade keereedda gallassi,
suure pirddaa pirddanawe taana.
3 Sa'aynne an de'iyaawanttu ubbay k'aas's'inakka,
Aa tuusaa minisa essiyaawe taana.
4 Taani otoranchchatuwaa, Otorettoppite yaagay;
iitatuwaakka, Hintte kac'iyaa dentsoppite.
5 Hintte kac'iyaa d'ok'k'issi bessoppite;
zaatturiide haasayoppite yaagay» yaagee.
6 Bonchchuu away doliyaasaappe
woy wulliyaasaappe
woy bazzuwaappe yeenna.
7 Shin pirddiyaawe S'oossaa;
I ittuwaa bolla pirddee;
ittuwaa shatintsee.
8 Med'inaa Godaa kushiyan itti wanc'c'ay de'ee;
he wanc'c'ay S'oossaa hank'k'uwaa woyniyaa eessan kumi utteedda.
I hewaappe ushshaa tigina,
sa'aan de'iyaa iita asatuu hewaa ushana;
unttunttu orc'c'uwaakka ashshenan c'inggisiide ushana.
9 Shin taani Yaak'ooba S'oossaabaa odananne
med'inaw Aa sabbana.
10 I iita asatuwaa kac'iyaa ubbaa mentsana,
shin s'illotuwaa kac'ii d'ok'k'u d'ok'k'u gaana.