85
Asaa Sarotetsaw Shiik'eedda Woosaa
Zammaaretuwaa Kaappoo Yes'etteedda, K'oraaha naanatuwaa mazamuriyaa
1 Abeet Med'inaa Godaw, neeni ne biittaw keekkaadda;
Yaak'ooba asaa omooduwaappe zaaraadda.
2 Neeni ne asaa naak'uwaa atto gaadda;
unttunttu nagaraa ubbaa kamaadda.
3 Neeni ne hank'k'uwaa ubbaa aggaada;
ne hank'k'uwaa suuluwaappekka simmaadda.
4 Abeet nuuna ashshiyaa S'oossaw,
nuuna guyye zaara.
Neeni nuw hank'k'eteeddawaa agga.
5 Neeni nuuna med'inaw hank'k'ettay?
Ne hank'k'uwaa yeletaa ubbaa gakkanaw gam"isay?
6 Ne Asay neenan nashettana mala,
nuuna ooratsa.
7 Abeet Med'inaa Godaw, aggena ne siik'uwaa nuuna bessa;
neeni nuuna ashsha.
8 Taani Med'inaa Goday S'oossay odiyaawaa sisana.
Nuuni nu booza ogiyaa guyye baana d'ayooppe,
I nuw, bare asaw, «Sarotetsaa immana» giide odee.
9 Tumukka S'oossaw yayyiyaawantta ashshanaw
I matan de'ee;
hewenne, Aa bonchchuu nu biittan de'anaassa.
10 Aggena siik'uunne tumatetsay
ittippe gakkettana.
S'illotetsaynne sarotetsay,
ittippe yerettana.
11 Tumatetsay sa'aappe pude kesana;
S'oossaa s'illotetsay saluwaappe duge s'eelana.
12 Ee, Med'inaa Goday keekkabaa immana;
nu biittaykka lo"o katsaa mokkana.
13 S'illotetsay S'oossaappe sintsanna heemettana;
aw ogiyaa giigissana.