Ichcheshentso Mas'aafaa
107
(107—150)
Metuwaa Ubbaappe Ashiyaa S'oossaa Galatite
1 Med'inaa Godaa galatite!1 Od. 16:34; 2 Od. 5:13; 7:3; Izr. 3:11; Maz. 100:5; 106:1; 118:1; 136:1; Erm. 33:11 Ayaw gooppe,
I keeka; aggena Aa siik'uu med'inaassa.
2 Med'inaa Goday ashsheedawanttunne,
morkkatuwaa kushiyaappe wozeeddawanttu,
hewaadan giide haasayino.
3 Unttuntta I biittatuwaappe,
away doliyaasaappenne wulliyaasaappe,
huup'issanne gedissa baggappe
shiishsheeddawantta.
4 Unttunttuppe ittuu ittuu bazzuwaa biittan yuuyyeeddino.
Barenttu de'iyaa katamaa biyaa ogiyaa,
demmanaw danddayibeykkino.
5 Unttunttu koshateeddinonne saametteeddino;
unttunttu yibbaateeddino.
6 Unttunttu metooteedda wode,
Med'inaa Godaw waasseeddino;
I unttuntta unttunttu waayiyaappe ashsheeda.
7 Unttunttu de'ana katamaa gakkanaw,
I unttuntta sitta ogiyaanna kaaletseedda.
8 Aggena Aa siik'oonne,
I asaw ootseedda malalissiyaabaw,
unttunttu Med'inaa Godaa galatino.
9 Ayaw gooppe, I saametteeddawantta alee;
Koshatteeddawanttakka lo"obaa kalissee.
10 Unttunttuppe ittuu ittuu
d'ip'p'i go d'umaa giddon utteeddino;
Unttunttu birataa sanssalatan waayetteeddino.
11 Ayaw gooppe, unttunttu S'oossaa k'aalaw makkaleeddinonne,
Ubbaappe D'ok'k'iyaa S'oossaa zoriyaa kad'eeddino.
12 I unttuntta tugga oosuwaan daabursseedda;
unttunttu kunddeeddino;
shin unttuntta maaddiyaawe d'ayeedda.
13 Unttunttu metooteedda wode, Med'inaa Godaw waasseeddino;
I unttuntta unttunttu waayiyaappe ashsheedda.
14 Bareto d'umaappekka kesseedda;
unttunttu k'ashetteedda birataa sanssalataakka duutseedda.
15 Aggena Aa siik'oonne
I asaw ootseedda malalissiyaawoo
unttunttu Med'inaa Godaa galatino.
16 Ayaw gooppe, I nahaasiyaappe oosetteedda penggiyaa mentseedda;
Birataa kulbbuwaakka d'ukkeedda.
17 Unttunttuppe ittuu ittuu booza gideeddino;
Barenttu ootseedda nagaraa gaasuwaaninne,
barenttu iitatetsaa gaasuwaan tuggateeddino.
18 Unttunttu k'uma ubbaa shenetiide,
hayk'k'oo mateeddino.
19 Unttunttu metooteedda wode, Med'inaa Godaw waasseeddino;
I unttuntta unttunttu waayiyaappe ashsheeda.
20 I bare k'aalaa kiittiide, unttuntta patseedda;
duufuwaan geliyaawaappe ashsheeda.
21 Aggena Aa siik'oonne
I asaw ootseedda malalissiyaawoo
unttunttu Med'inaa Godaa galatino.
22 Unttunttu aw galataa yarshshuwaa yarshshino;
K'ay nashshechchaa yetsan I ootseeddawaa odino.
23 Unttunttuppe ittuu ittuu,
markkabiyaan wolk'k'aama abbaa bollan beeddino.
Unttunttu he wolk'k'aama abbaa bolla barenttu oosuwaa ootsiyaawantta.
24 Unttunttu Med'inaa Godaa oosuwaa,
I c'iimmaa garssan ootseedda malalissiyaabaa be'eeddino.
25 I azaziide, gotiyaa dentseedda;
abbaa hobbii k'aas's'eedda.
26 Unttunttu pude saluwaa c'ugudetteeddino;
hewaappe duge c'iimmaa wod'd'eeddino.
He iita metuu gakkina, unttunttu wozanay toyyu geedda.
27 Unttunttu matsotteedda asaadan
d'ubettiide ganddigaareeddino;
unttunttu eraykka jolleedda.
28 Unttunttu metooteedda wode, Med'inaa Godaw waasseeddino;
I unttuntta unttunttu waayiyaappe ashsheeda.
29 I gotiyaa c'o"u ootseedda;
abbaa beetaakka sirp'p'i ootseedda.
30 C'o"u geedda diraw,
unttunttu nashetteeddino;
S'oossay unttuntta unttunttu amotteedda katamaa aheedda.
31 Aggena Aa siik'oonne
I asaw ootseedda malalissiyaabaw
unttunttu Med'inaa Godaa galatino.
32 Unttunttu Aa asatuwaa shiik'uwaan d'ok'k'u d'ok'k'u ootsino;
k'ay c'imatuwaa shiik'uwaan Aa galatino.
33 S'oossay shaafatuwaa melisseedda;
pulttotuukka goggennaadan te"eedda.
34 Hewan de'iyaa asatuwaa iitatetsaa diraw,
Mokkiyaa aradda biittaakka,
mokkenna mela biittaw laammeedda.
35 I zaariide mela bazzuwaan haatsay eellanaadan,
k'ay mela biittan pulttuu d'uuk'k'anaadan ootseedda.
36 Kosheteeddawantta he sa'aan wotseedda;
unttunttu barenttoo de'iyaa katamaa kees's'eeddino.
37 Unttunttu barenttu goshshan zeriide,
woyniyaa tokkiide,
daro murutaa shiishsheeddino.
38 I unttuntta anjjina, unttunttu loytsi c'oratteeddino;
unttunttu mehiyaakka guutsibeenna.
39 Asatuu s'oonettiyaa wodenne unttunttu uk'k'unnaa,
metuwaanne kayyuwaa gaasuwaan kawushiyaa wode,
40 S'oossay kaappotuwaa kad'eeddawaa bessee;
ogii bayinna bazzuwaan toyilakattanaadan I unttuntta ootsee.
41 Shin I hiyyeesatuwaa tuggaappe kessiide,
unttunttu golle asaa dorssaa wudiyaadan c'orayee.
42 Suure asatuu I ootsiyaawaa be'iide nashettiino;
shin iita asatuu ubbay c'o"u giino.
43 Aad'd'eeda Eranchcha gidiyaawe ha yewuwaa k'oppo;
Med'inaa Godaa aggena siik'uwaa akeeko.