110
S'oossay Dooreedda Kaatiyaa Daawite s'aafeedda mazamuriyaa
1 Med'inaa Goday ta Godaa,Mat. 22:44; Mar. 12:36; Luk'. 20:42-43; Kit. 2:34-35; 1 K'or. 15:25; Efe. 1:20-22; K'ol. 3:1; Ibr. 1:13; 8:1; 10:12-13
«Taani ne morkkatuwaa neeni gediyaan
yed'd'a ek'k'iyaawaa ootsana gakkanaw,
hawaan taappe ushechcha baggana utta» yaageedda.
2 Med'inaa Goday ne minotetsaa s'am"aa S'iyooneppe kiittana;
yaatina, «Ne morkkatuwaa moodda!» yaagana.
3 Neeni ne morkkatuwaanna olettiyaa gallassi,
ne Asay eeno gaana.
Wontta guura ketterssaadan,
ne wodalla Asay neekko geeshsha deretuwaan shiik'ana.
4 Med'inaa Goday, «Malkka S'edek'i k'eesiyaa gideeddawaadan,
neenikka med'inaw k'eesiyaa gidana» yaagiide c'aak'k'eedda;
I bare k'ofaa laammenna.Ibr. 5:6; 6:20; 7:17, 21
5 Goday ne ushechchan de'ee;
bare hank'k'uwaa gallassi I kaatetuwaa kinchchereetsana.
6 Kawutetsaa bolla I pirddana;
olaa dembbatuwaakka anhaa s'alala ootsana;
sa'aan ubbaan de'iyaa kaatetuwaa I mentsereetsana.
7 Kaatii ogiyaa matan de'iyaa haatsaa pulttuwaappe ushiide,
I bare huup'iyaa d'ok'k'u ootsana.