115
Itti Tumu S'oossaa
1 Abeet Med'inaa Godaw, nu gishsha gidenna;
nu gishsha gidennaan, aggena ne siik'owunne
ne tumatetsaa diraw, ne suntsaa bonchcha.
2 Kawutetsatuu ayaw,
«Unttunttu S'oossay hak'an de'ii?» giinoo?
3 Nu S'oossay saluwaana;
I bare doseeddawaa ay gidooppekka ootsee.
4 Shin unttunttu eek'atuu biraanne work'k'aa;Maz. 135:15-18; Sas'. 9:20
unttunttu asaa kushiyaan med'etteeddawantta.
5 Unttunttoo doonay de'ee; shin haasayikkino;
ayifii de'ee; shin s'eellikkino.
6 Unttunttoo haytsay de'ee; shin sissikkino;
siid'ii de'ee; shin singgikkino.
7 Unttunttoo kushii de'ee; shin oyk'k'i erikkino;
gediikka de'ee; shin hamettikkino;
unttunttu barenttu pillanttiyaanna kooshshaa sissikkino.
8 Unttuntta med'd'iyaawanttunne,
unttunttun ammanettiyaawanttu ubbay unttunttu mala gidino.
9 Hinttenoo, Israa'eeliyaa asatoo,
Med'inaa Godaan ammanettite!
I hinttena maaddiyaawaanne hintte gonddalliyaa.
10 Hinttenoo, Aaroona golliyaa asatoo,
Med'inaa Godaan ammanettite!
I hinttena maaddiyaawaanne hintte gonddalliyaa.
11 Hinttenoo, Med'inaa Godaw yayyiyaawanttoo,
Med'inaa Godaan ammanettite!
I hinttena maaddiyaawaanne hintte gonddalliyaa.
12 Med'inaa Goday nuuna k'oppee; I nuuna anjjana.
I Israa'eeliyaa asatuwaa anjjana.
I Aaroona golliyaa asatuwaa anjjana.
13 Med'inaa Godaw yayyiyaawantta,
guutsatuwaakka gitatuwaakka I gatso anjjana.Sas'. 11:18; 19:5
14 Med'inaa Goday hinttenakka hintte naanatuwaakka darisso!
15 Saluwaanne sa'aa med'd'eedda Med'inaa Godaan anjjettite!
16 Bolla d'ok'k'a saluu Med'inaa Godaawaa;
shin sa'aa I asaw immeedda.
17 Hayk'k'eeddawanttu, duufuwaan c'o"u geeddawanttu,
Med'inaa Godaa galatikkino.
18 Shin nuuni, pas'a de'iyaawanttu,
hachcheppe doommiide
med'inaa gakkanaw Med'inaa Godaa galateetto.
Med'inaa Godaa galatite!