132
Geeshsha Golliyaa Sabbanaw Shiik'o Mazimuriyaa
Pudetsaa kesiidde yes's'eedda yetsaa
1 Abeet Med'inaa Godaw,
Daawitanne I danddayeedda metuwaa k'oppa.
2 Med'inaa Godaw I c'aak'k'eeddawaa,
Yaak'ooba s'oossaw, Wolk'k'aamaw
I hawaadan yaagiide geppeeddawaa hassaya;
3 «Hawaappe guyiyaan taani ta golle gelikke,
woy ta hiis'an gisikke.
4 Taani ta ayifiyaa c'iilimmikke,
woy gem"ishikke.
5 Hewenne, taani Med'inaa Godaw sa'aa,
Yaak'ooba S'oossaw, Wolk'k'aamaw
de'iyaasaa giigissana gakkanaassa» yaageedda.
6 Hekko, nuuni Taabootaabaa,
Efiraatan siseeddo;2 Od. 6:41-42
Yi'aariima giyaa biittaan Aa nuuni demmeeddo.
7 Nuuni, «Ane I de'iyaasaa boytte;
Aa gedii yed'd'iyaasaan guufanniide,
aw goyinneetto» yaageeddo.
8 Abeet Med'inaa Godaw, dendda!
Ne minotetsaw mallaa gidiyaa ne Taabootaanna,
ne Geeshsha Golliyaa gelaade de'a.
9 Ne k'eesatuu s'illotetsaa mayno;
ne asatuu nashshechchaw yes's'ino.
10 Ne k'oomaa Daawita diraw,
neeni okkeedda kaatiyaa aggoppa.
11 Med'inaa Goday Daawitaw laamettena c'aak'uwaa
hawaadan yaagiide c'aak'k'eedda;2 Sam. 7:12-16; 1 Od. 17:11-14; Maz. 89:3-4; Kit. 2:30
«Ne gulbbataappe yeletteedda ne naanatuwaappe ittuwaa
taani kawutsana.
12 Ne naanatuu ta c'aak'uwaanne
taani tamaarissiyaa timirttiyaa naagooppe,
unttunttu naanatuukka ne kawutetsaa araatan med'inaw uttana» yaageedda.
13 Med'inaa Goday S'iyoone dooreedda;
barew de'iyaasaa ootsanawukka amottiide,
hawaadan yaageedda;
14 «Hawe taw med'inaw de'iyaa sa'aa;
taani amotteedda diraw, hawaan uttana.
15 Taani daro katsaa immaade S'iyoono anjjana;
izin de'iyaa hiyyeesatuwaakka k'umaa kalissana.
16 Izin de'iyaa k'eesetuwaakka
taani atotetsaa mayzzana;
izin S'oossaa asatuukka nashshechchaw yes's'ana.
17 «Ha sa'aan,
Daawita zeretsaappe ittuwaa kawutsana;1 Kat. 11:36
taani okkeedda kaatiyaa kawutetsaa gam"etsana.
18 Taani Aa morkkatuwaa yeellaa mayzzana;
shin Aa huup'iyaan de'iyaa kawutetsaa kallachchay p'oolana» yaageedda.