140
Iitatuwaa Bolla Shiik'eedda Woosaa
Zammaaretuwaa Kaappoo Yes'etteedda, Daawite s'aafeedda mazamuriyaa
1 Abeet Med'inaa Godaw, iita asatuwaappe taana ashsha;
makkalanchcha asatuwaappe taana naaga.
2 Unttunttu ubbaa wode,
iitabaa ootsanaw mak'ettiino;
ubbaa gallassikka,
walassaa dentsetsanaw k'oppiino.
3 Unttunttu barenttu ins's'arssaa shooshshaawaadan k'arayiino;Rom. 3:13
unttunttu doonaappe asaa wod'iyaa hasuwaa shooshshaa yishshaa mala haasayay kesee.
4 Abeet Med'inaa Godaw, iita asatuwaa kushiyaappe,
taana ashsha;
ta gediyaa k'as's'anaw k'oppiyaa makkalanchcha asatuwaappe taana naaga.
5 Otoranchcha asatuu taw diizzaa giigisseeddino;
gitiyaa hiis's'eeddino;
taana oyk'k'anaw p'iriyaa ogiyaan wotseeddino.
6 Taani Med'inaa Godaa, «Neeni ta S'oossaa» yaagay.
Abeet Med'inaa Godaw, taani watiwatiyaa watiwatuwaa sisa.
7 Abeet Ubbaa Mooddiyaa Med'inaa Godaw,
taana ashshiyaa minoo,
olaa gallassi taw gonddale gidaadda.
8 Abeet Med'inaa Godaw,
iitatoo unttunttu amuwaa immoppa;
unttunttu iita mak'k'uwaa polissoppa.
9 Ta morkkatuwaan taana s'oonissoppa;
unttunttu doonaappe kesiyaa iitabay unttunttoo simmo.
10 Unttunttu bolla s'uuggiyaa bonk'k'uu k'oletto;
unttunttu taman olettino;
hewaappe laa"entso denddenna olan oletino.
11 Zigiriyaawantta biittay tookkoppo;
makkalanchcha asatuwaa iitabay shankkatiide oyk'k'o.
12 Med'inaa Goday hiyyeesatoo pirddiyaawaanne,
metootanchchatuwaa maataa naagisiyaawaa eray.
13 Tumuppe s'illotuu ne suntsaa galatana;
suure asatuu ne sintsan de'ana.