6
Jɔlɔgɔ yɛn Izirayɛli tara
penjagbɔrɔ fɛnnɛ naa legbɔɔlɔ
pe wogo
penjagbɔrɔ fɛnnɛ naa legbɔɔlɔ
pe wogo
1 Leele mbele pe yɛn ma cɛn yɛyinŋge na wa Siyɔn ca ki ni,
konaa mbele pe jigi wi yɛn ma cɛn pe na wa Samari yanwiga ki na,
jɔlɔgɔ yɛn pe wogo.
Jɔlɔgɔ yɛn Izirayɛli cɛngɛlɛ teele mbele pe yɛn cɛnsara koŋgbannda ti na pe wogo,
poro mbele leele pe maa paan pe kɔrɔgɔ na pe yewe pe pe saga.
2 Ye kari wa Kaline ca ye sa ŋga kì pye wa ki wele.
Ye yiri le ye kari wa Hamati cagbɔgɔ ki ni.
Ko puŋgo na, ye kari wa Filisiti tara fɛnnɛ pe ca Gati ki ni.
Yege wele na kaa pye ki cara ti jiti ma wɛ ye wunluwɔ shyɛn mba pi na,
na kaa si pye pe tara tì gbɔgɔ ma wɛ ye woro ti na.
3 Ye yɛn naga lagajaa mbe jɔlɔgɔ pilige ki lali ye yɛɛ ni,
ɛɛn fɔ legbogo kagala koro ye yɛn na yɔngɔ ye yɛɛ ni.
4 Pè sinlɛ lakajanye mbele pè gbegele solo ŋgangala ni pe na,
ma sɛnŋgɛlɛ sangasanga sinlɛyaara na.
Wa yaayoro ŋgbelege ki ni, simbapɛnɛ yirifɔnmbɔlɔ naa napɛnɛ yirifɔnmbɔlɔ mbele pè tɔrɔ tɔrɔ wa naŋgboŋgo,
poro pe ma wɔ na kuun na kaa.
5 Pe maa go fu yuuro koo ŋgɔni wi na,
pe maa pe yɛɛ yaan,
paa yɛgɛ ŋga na Davidi la pye, na yarigbɔnrɔ fɔnndɔ gbegele yɔrɔ woro.
6 Pe maa duvɛn wi woo jɛŋgɛlɛ ke ni kè yinyin,
na pe yɛɛ faa sinmɛ nuwɔ taan jɛmbɛ ni.
Ɛɛn fɔ jɔgɔwɔ mba pi yɛn ma Zhozɛfu wunluwɔ pi ni fuun pi maga mbe to pi na, ko si pe jori.
7 Ki kala na, poro pe yaa yigi koŋgbanmbala, mbe kari pe ni wa kulowo pi ni.
Ki ka pye ma, pe liwɛn gbɔɔ naa pe sɔgɔlɔ gbɔlɔ li yaa kɔ mbe wɔ wa.
8 We Fɔ, Yawe Yɛnŋɛlɛ lì wugu li yɛɛra mɛgɛ ki na. Yawe Yɛnŋɛlɛ, Yɛnŋɛlɛ na yawa pi ni fuun fɔ lì yo fɔ:
«Zhakɔbu setirige piile pe yɛɛ gbɔgɔwɔ kapyegele kànla mbɛn.
Pe wunluwɔ yinrɛ ti kala lii na ndanla.
Mi yaa ca ko naa ki nawa yaara ti le ki juguye pe kɛɛ.»
9 Na go ŋga woolo ka koro leele kɛ, poro fun pe yaa ka ku. 10 Na gboo wi lere wa ka pan mboo lɛ wa go ki ni, mbe yiri wi ni mbe yo wi yaa saa sogo†6.10: Ki vɛrise ŋa wi sɛnrɛ ti woro ma filige. Ki yaa pye Amɔsi wi yɛn na para tara to yɛgɛwɛ sɛnrɛ na, mba pi yaa ka ti lelɛgɛrɛ mbe ku fɔ pe se ka wagati ta mbe gboolo pe le. Ko yaa ki kan paa gboolo pe sori. Yɛgɛ o yɛgɛ, Yɛnŋɛlɛ sɛnrɛ yofɔ wi yɛn na ŋga yuun mbege filige, ko yɛn fɔ legbogo ki yaa ka lɛgɛ fɔ mbele pe yaa ka koro go na, pe se ka ya mbe gboolo pe le., na kiga yala lere wa yɛn wa go yɛgɛ, wi yaa ka wo yewe mbe yo fɔ: «Lere wa yɛn wa ma ni naa le?» Pa ko fɔ wo yaa wi yɔn sogo mbe yo fɔ: «Ayoo, lere woro laga.» Kona, ŋa wì ku wi lere wi yaa wi pye mbe yo wi pyeri, katugu kii daga pe Yawe Yɛnŋɛlɛ li mɛgɛ ki yeri.
11 Wele, Yawe Yɛnŋɛlɛ li yɛn na konɔ na kaan li na:
Li yaa ka yuŋgbɔrɔ ŋgbɔrɔ ti jaanri, mbe yumbigile ke pye yumbara.
12 Yege logo ma yo shɔnye pe maa fee yaanŋguro na le?
Lere maa fali ti na falinɛrɛ capige ni le?
Ɛɛn fɔ, yè kaselege ki kanŋga maga pye paa shɔnrɔ yɛn, ma kasinŋge ki tɔnli wi kanŋga maa pye paa yaritisorogo yɛn.
13 Lodebari†6.13: Eburu sɛnrɛ ti ni, Lodebari kɔrɔ wowi ŋa fɔ yaraga ma. ca ŋga yè ya ki ni, ye yɛn na yɔgɔri ko kala na, na yuun fɔ: «Ye sigi jɛn mbe yo we yɛɛra fanŋga ko kì ti we Karinayimu†6.13: Eburu sɛnrɛ ti ni, Karinayimu kɔrɔ wowi ŋa fɔ yawa. ca ki shɔ wi le?» 14 Ki kala na, ye wele, mi ŋa Yawe Yɛnŋɛlɛ, Yɛnŋɛlɛ na yawa pi ni fuun fɔ mì yo fɔ: «Yoro Izirayɛli sege woolo wele, mi yaa cɛnlɛ la yirige mbe wa ye na. Pe yaa ka ye jɔlɔ, mbege lɛ wa Hamati ca yɔn ki na fɔ sa gbɔn wa Araba tara lafogo ki na.»
†6:10 6.10: Ki vɛrise ŋa wi sɛnrɛ ti woro ma filige. Ki yaa pye Amɔsi wi yɛn na para tara to yɛgɛwɛ sɛnrɛ na, mba pi yaa ka ti lelɛgɛrɛ mbe ku fɔ pe se ka wagati ta mbe gboolo pe le. Ko yaa ki kan paa gboolo pe sori. Yɛgɛ o yɛgɛ, Yɛnŋɛlɛ sɛnrɛ yofɔ wi yɛn na ŋga yuun mbege filige, ko yɛn fɔ legbogo ki yaa ka lɛgɛ fɔ mbele pe yaa ka koro go na, pe se ka ya mbe gboolo pe le.
†6:13 6.13: Eburu sɛnrɛ ti ni, Lodebari kɔrɔ wowi ŋa fɔ yaraga ma.
†6:13 6.13: Eburu sɛnrɛ ti ni, Karinayimu kɔrɔ wowi ŋa fɔ yawa.