19
Kunwɔ yurugo ŋga kìla kɔ
Izirayɛli tara yɛkeele pe wogo na
Izirayɛli tara yɛkeele pe wogo na
1 Kona, a we Fɔ wì sho fɔ: «Mboro wo na, Ezekiyɛli, ma kunwɔ yurugo kɔ Izirayɛli tara teele pe wogo na, ma yo fɔ:
2 E, ma nɔ wìla pye paa jara nɔ gbɔɔ†19.2: Jara nɔ gbɔɔ ŋa wi sɛnrɛ tì yo, wo yɛn ma taanla Zheruzalɛmu ca ko ni nakoma Zhuda cɛnlɛ lo ni. yɛn jaraye pe sɔgɔwɔ!
Wìla pye ma sinlɛ wa jara yirifɔnmbɔlɔ pe sɔgɔwɔ, naa piile pe yɔn suro ti woo.
3 Wìla wi pyɔ wa koro,
a wì yiri ma pye jara yirifɔnŋɔ.
Ŋa wìla kagbogo ki fɔrɔgɔ,
a wila leele pe kuun.
4 Cɛngɛlɛ kèle yɛgɛ woolo la wi kala li logo,
a pè ti wì to wege ka ni.
A pè suu yigi ma tugurɔn kannjinɛ le wa wi numala li na, mɛɛ kari wi ni wa Ezhipiti tara†19.4: Ki sɛnrɛ nda ti yɛn na para Zhuda tara wunlunaŋa Yowahazi wo sɛnrɛ na..
5 «Naa jara nɔ wìla kaa ki yan wùu pinambyɔ wi sige ma saa te,
a wi jigi wì si kɔn wi na.
A wì suu pyɔ wa yɛgɛ lɛ maa koro,
maa pye jara yirifɔnŋɔ.
6 A wi nɛɛ yanri jara sanmbala pe sɔgɔwɔ.
Wìla yiri ma pye jara yirifɔnŋɔ;
wìla kagbogo ki fɔrɔgɔ,
a wila leele pe kaa.
7 Wìla pe malaga sigeyinrɛ ti jaanri†19.7: Ki laga ŋga ki sɛnrɛ ti woro ma filige Yɛnŋɛlɛ sɛnrɛ sɛwɛ ŋa wi yɛn Aramuye sɛnrɛ ni wi ni., ma pe cara ti tɔngɔ.
Wi gbelege ki kala na, tara to naa ti nawa yaara ti ni fuun ti sunndo wìla kɔn ti na.
8 Cɛngɛlɛ ŋgele ke yɛn maa maga, kè si yiri wi kɔrɔgɔ,
ma yiri kɛɛ ki ni fuun ki na.
Kàa ke mɛrɛ ti jan wi na,
a wì to wa ke wege ki ni.
9 Pàa tugurɔn kannjinɛ le wa wi numaga ki na
maa le gbaga ka ni,
ma kari wi ni wa Babilɔni tara wunlunaŋa wi yeri.
Pàa saa wi tɔn malaga sigego ka ni,
jaŋgo paga kaa magala li logo naa wa Izirayɛli tara yanwira ti na.»
Kunwɔ yurugo ŋga kìla kɔ
ɛrɛzɛn tirige ki wogo na
ɛrɛzɛn tirige ki wogo na
10 Ma nɔ wìla pye paa ɛrɛzɛn tirige yɛn, ŋga ki yɛn ma sanri lɔgɔ yɔn na.
Pire lɛgɛrɛ naa njere lɛgɛrɛ la pye ki na tɔnmɔ lɛgɛwɛ pi kala na.
11 Njere tugbɔɔrɔ la pye ki na,
a ki njere tì pye wunlumbolo pe kanŋgala.
Kìla tɔnlɔ ma yagara ma wɛ tire sannda ti na;
pe ma koro lege naga yaan ki yagawa,
naa ki njere lɛgɛrɛ ti kala na.
12 Ɛɛn fɔ pàa ki kɔw naŋgbanwa gbɔɔ ni maga wa tara;
yɔnlɔ yirisaga tifɛlɛgɛ kìla ki pire ti waga, a tì toori.
Ki njere tugbɔɔrɔ tìla kaari ma waga;
a kasɔn kìri sogo.
13 Koni pè saa ɛrɛzɛn tirige ki sanri wa gbinri wi ni, wa lawaga tara nda tɔnmɔ woro wa.
14 Kasɔn yiri wa ki tirige ki ni maga njere to naa ki pire ti sogo.
Njege gbeŋge si koro ki na naa, ŋga ki mbe ya pye wunluwɔ kanŋgala.
Ki yurugo ŋga ki yɛn kunwɔ yurugo; ki yaa koro mbaa koo kunwɔ yurugo yɛn.