YƐNŊƐLƐ LAA LI WOOLO PE JƐRƐGI
4
4–11
Yɛnŋɛlɛ li yaa kiti kɔn
li woolo pe na
li woolo pe na
1 Yoro Izirayɛli woolo, ye Yawe Yɛnŋɛlɛ li sɛnrɛ ti logo.
Katugu kiti yɛn Yawe Yɛnŋɛlɛ li yeri li kɔn tara woolo pe na,
katugu mbe pye tagawa ni kì kɔ, kajɛŋgɛ kì kɔ.
Lere si Yɛnŋɛlɛ li jɛn naa laga tara ti ni.
2 Yaraga ko ka woro wa daŋga sɛnrɛ, naa yagbogowo, naa yuro konaa nandara to puŋgo na.
Lewɛlɛwɛ kapyere to pe yɛn na piin.
Pe yɛn na leele pe kuun kɔnlɔ fu.
3 Ki kala na, pe yaa kaa kunwɔ gbelege gbele laga tara ti ni.
Tara woolo pe ni fuun pe yaa ka cɔgɔ cɔgɔ,
mbe pinlɛ woŋgaala naa sannjɛrɛ ti ni fuun ti ni,
ali yɛrɛ kɔgɔje ŋgbanra ti yaa ka kɔ mbe wɔ wa.
4 Ɛɛn fɔ lere kpɛ ka ka baga lere na,
lere kpɛ ka kaa lewee yɛnlɛ wa jɛrɛgi;
yoro saraga wɔfɛnnɛ wele, yoro mi yaa kiti kɔn ye na.
Mi ŋa Yawe Yɛnŋɛlɛ, muwi mì yo ma.
5 Ye yaa ka kurugo mbe to yɔnlɔ ŋgbanga na,
yoro naa Yɛnŋɛlɛ yɔn sɛnrɛ yofɛnnɛ pe ni, ye yaa ka kurugo mbe to yembinɛ.
Mi yaa ka ye nɔ wi tɔngɔ mboo wɔ wa.
6 Na woolo pe yɛn na kuun kambajɛnmɛ pi kala na.
Kì kaa pye yè je mbanla jɛn,
mi fun mi yaa je ye na mbe ye wɔ wa na saraga wɔgɔtunŋgo ki ni.
Kì kaa pye mi ŋa ye Yɛnŋɛlɛ yè je na lasiri wi na,
mi fun mi yaa fɛgɛ ye piile pe na.
7 Pè se ma lɛgɛ yɛgɛ ŋga na,
kapere nda pè pye na na, pa tì lɛgɛ ma fun.
Mi yaa ka pe gbɔgɔwɔ pi kanŋga mboo pye fɛrɛ kala.
8 Kapere ti kala yagawa jasaara nda na woolo pe maa woo, to saraga wɔfɛnnɛ pe ma tɛgɛ na pe yɛɛ baro.
Pe yɛn na jaa na woolo pe koro paa kapere ti piin paa kee yɛgɛ.
9 Kala na li yaa pye saraga wɔfɛnnɛ pe na, lo nuŋgba lo li yaa pye leele sanmbala pe na.
Mi yaa ka jɔlɔgɔ wa pe na pe tangalɔmɔ pi kala na.
Mi yaa ka pe sara mbe yala pe kapyegele ke ni.
10 Pe yaa kaa kaa,
ɛɛn fɔ pe se ka tin.
Pe yaa kaa nanjara ti piin,
ɛɛn fɔ pe se ka se mbe lɛgɛ;
katugu mi ŋa Yawe Yɛnŋɛlɛ, pè laga na na.
11 Nanjara, naa duvɛn lɛɛ konaa duvɛn fɔnŋɔ wi ni, ti ma lere go jɔgɔ wi na.
12 Yarisunndo nda ti yɛn tikɔnrɔ woro, to na woolo pe maa yewe.
Pe jɛɛrɛ pyekanŋgagala koro ke maa pe yɔn sogo;
katugu nanjara jatere ŋa wi yɛn pe ni, wì pe puŋgo.
Pe yɛn na nanjara ti piin ma pe yɛɛ lali mi ŋa pe Yɛnŋɛlɛ na ni.
13 Pe ma saa na saara yaayoro ti kuun wa yanwira ti go na,
na wusuna nuwɔ taan wi sori wa tinndiye pe go na,
naa wa tigbɔrɔ ti nɔgɔ, wa pepiliye tire konaa terebɛnti tire ti nɔgɔ,
to nda ti yinmɛ pi yɛn ma tanla.
Ki kala na, ye sumborombiile pe yɛn na nanjara piin.
Ye pinambiile pe jɛɛlɛ pe yɛn na nandara piin.
14 Mi se ka jɔlɔgɔ wa ye sumborombiile pe na pe nanjara to kala na,
nakoma mbe jɔlɔgɔ wa ye pinambiile pe jɛɛlɛ pe na pe nandara to kala na;
katugu saraga wɔfɛnnɛ poro jate pe yɛn na kee nanjaala pele kɔrɔgɔ,
na pinlɛlɛ na saara ti woo nanjaala mbele pe maa nanjara piin yarisunndo gbɔgɔwɔ pi na pe ni.
Cɛnlɛ na li woolo pe yɛn tijinliwɛ fu, pe yaa ka kɔ mbe wɔ wa.
15 Yoro Izirayɛli woolo wele, yè ye yɛɛ kan nanjara ti yeri.
Ɛɛn fɔ yaga ka ti Zhuda tara woolo pege kala cɛnlɛ la pye mbe pye kajɔɔgɔ pyefɛnnɛ.
Yaga ka kari wa Giligali ca,
Yaga ka wugu mbe yo fɔ:
«Mì wugu Yawe Yɛnŋɛlɛ na yinwege wolo li mɛgɛ ki na.»
16 Izirayɛli woolo pè yiri ma je
paa yɛgɛ ŋga na nasumboro ma kaa panraga we.
Koni, na yège yan yɛɛn, Yawe Yɛnŋɛlɛ li mbe yɛnlɛ mbaa pe yɛgɛ sinni mbaa kee pe ni mɛlɛ,
paa simbapiile yɛn wa naniwɛ gbɔɔ pi ni?
17 Efirayimu†4.17: Efirayimu wi yɛn Izirayɛli cɛngɛlɛ kɛ ma yiri shyɛn lo la nuŋgba, ɛɛn fɔ lagamɛ, maga logo Efirayimu, ko yɛn na para Izirayɛli tara ti yɔnlɔparawa kamɛŋgɛ kɛɛ wunluwɔ po sɛnrɛ na. cɛnlɛ woolo poro pè yɛɛ kan yarisunndo gbɔgɔwɔ pi yeri.
Ye pe yaga wa paa ki piin!
18 Na paga pe duvɛn wi wɔ mbe kɔ, pe mɛɛ saa na nanjara piin;
pe yɛkeele fɛrɛmbandawa kapyere to ti yɛn ma pe ndanla.
19 Tifɛlinjolo yaa ka pan mbe pe lɛ mbe kari pe ni.
Pe yaa ka fɛrɛ shɔ pe saara nda paa woo ti kala na.
†4:15 4.15: Bɛti Avɛni mɛgɛ ki kɔrɔ wowi ŋa fɔ: Tipege go. Betɛli ca ko Yɛnŋɛlɛ yɔn sɛnrɛ yofɔ wìla yeri Bɛti Avɛni. Betɛli mɛgɛ ki kɔrɔ wowi ŋa fɔ: Yɛnŋɛlɛ go. Ki wagati wi ni, Giligali naa Betɛli cara to tìla pye yarisunndo gbɔgɔsara nda pàa pye na jate jɛŋgɛ, pa Izirayɛli woolo pàa pye na kee wa, ma saa na yarisunndo ti gbogo.
†4:17 4.17: Efirayimu wi yɛn Izirayɛli cɛngɛlɛ kɛ ma yiri shyɛn lo la nuŋgba, ɛɛn fɔ lagamɛ, maga logo Efirayimu, ko yɛn na para Izirayɛli tara ti yɔnlɔparawa kamɛŋgɛ kɛɛ wunluwɔ po sɛnrɛ na.