10
Jɔlɔgɔ yaa to
Izirayɛli tara wunluwɔ pi na
Izirayɛli tara wunluwɔ pi na
1 Izirayɛli woolo pàa pye paa ɛrɛzɛn tirige tiyɔngɔ yɛn,
ŋga kìla pye na sɛni fɔ jɛŋgɛ.
Naa ki pire tila kaa na lege,
a pè si pe sunzara ti lɛgɛ.
Naa pe tara tila kaa na yɔngɔ na kee yɛgɛ,
sinndɛɛrɛ tiyɔnrɔ nda pè yerege yerege na sunnu ti na, a pè siri fere.
2 Kila pe kɔɔn shyɛnzhyɛn wa pe nawa,
ɛɛn fɔ koni, pe yaa pe kapere ti go kala li lɛ.
Yawe Yɛnŋɛlɛ li yaa pe sunzara ti jaanri,
mbe pe sinndɛɛrɛ titɔɔnrɔ nda pè yerege na sunnu ti na ti jɔgɔ.
3 Koni pe yaa kaa yuun fɔ:
«Wunluwɔ woro we yeri;
katugu wee fyɛ Yawe Yɛnŋɛlɛ li yɛgɛ.
Ali na wunluwɔ ka pye wa yɛrɛ, yiŋgi wi mbe ya yɔn we kan?»
4 Go fu sɛnrɛ pe maa yuun.
Pe maa wuguro jagara wungu na pe yɛɛ kaan,
na yɔn finliwɛ nii pe yɛɛ ni sɛnwara ni.
Ki kala na, kiti kɔnkagala kè lɛgɛ pe sɔgɔwɔ†10.4: Laga ŋga kì yo fɔ: Kiti kɔngɔ kì lɛgɛ pe sɔgɔwɔ, Yɛnŋɛlɛ sɛnrɛ sɛwɛɛlɛ pele ni, ki yɛn ma yɔnlɔgɔ wa ma yo fɔ: Kasinŋge ki yɛn pe yɛgɛ na paa yɛgɛ ŋga na yan ŋga shɔnrɔ ni ki ma fi wa sɔnŋgooro ti ni wa kɛrɛ we.,
paa yɛgɛ ŋga na yan ŋga shɔnrɔ ni ki ma fi wa sɔnŋgooro ti ni wa kɛrɛ we.
5 «Samari ca woolo pe yɛn na fyɛ Bɛti Avɛni ca napige yanlɛgɛ ŋga ki yɛn pe yarisunŋgo ki wogo na;
katugu pe yarisunŋgo ki gbɔgɔwɔ pì kɔ ma wɔ wa pe sɔgɔwɔ.
Ki woolo pe yɛn na kunwɔ gbelege gbele ki wogo na,
poro naa saraga wɔfɛnnɛ mbele pàa pye na yɔgɔri ki faa gbɔgɔwɔ pi wogo na we.
6 Pe yaa ka kari ki yarisunŋgo ki ni wa Asiri tara,
mbe saga kan wunlunaŋa gbɔɔ Yarɛbu wi yeri yarikanga.
Kona, fɛrɛ yaa ka Efirayimu cɛnlɛ woolo pe yigi.
Izirayɛli woolo pe yaa ka fɛrɛ shɔ pe kapyere ti kala na.
7 «Samari ca ki wogo kì kɔ!
Ki wunlunaŋa wi wogo kì kɔ
paa yɛgɛ ŋga na kanŋgekɔngɔ ma kaa pye tɔnmɔ mba pila fuun na kee pi go na.
8 Sunzara nda wa tinndiye pe na wa Bɛti Avɛni ca,
to nda Izirayɛli woolo pàa pye na kapege piin wa ti na,
ti yaa tɔngɔ mbe wɔ wa.
Wuuro naa yanpege yaa ka fi wa pe saara wɔsara ti na.
Kona, pe yaa kaa ki yuun yanwira ti kan fɔ:
‹Ye we lara!›
mbaa ki yuun tinndiye pe kan fɔ:
‹Ye toori we na†10.8: Luki 23.30; Naga 6.16!›
9 «Maga lɛ wa Gibeya ca kala li pyewagati wi na,
Izirayɛli woolo yè kapege pye;
ye fa ya mbe kanŋga.
Naga yɛn ma, ki woro ma yala malaga ki to kapegbɔgɔ pyefɛnnɛ pe na wa Gibeya ca wi le†10.9: Kiti 19.1-30?
10 Yawe Yɛnŋɛlɛ lì yo fɔ:
Wagati ŋa ka kanla ndanla, mi yaa pe kapere ti fɔgɔ tɔn pe na.
Cɛngɛlɛ kele yɛgɛ yaa ka gbogolo mbe yiri pe kɔrɔgɔ.
Pe yaa ka pe pɔ yɔngɔwɔ ni mbe kari pe ni pe kapere lɛgɛrɛ ti kala na.
11 «Efirayimu cɛnlɛ woolo pe yɛn paa nasumboro yɛn, ŋa wì koro ma yɔn.
Mbaa yarilire ti tangala mbaa ti pire ti woo, ki yɛn ma pe ndanla.
Ɛɛn fɔ mi yaa nɛrɛ tunŋgo pyetige taga wa pe yɔlɔgɔ tiyɔngɔ ki na,
mbe falinɛrɛ capire pɔ pe na.
Zhuda cɛnlɛ woolo pe yaa la kɛɛrɛ ti wari,
Zhakɔbu cɛnlɛ woolo pe yaa la lawaraga ki kanimboro ti yaari.
12 «Yaa kasinŋge piin,
pa ye yaa kajɛŋgɛ ta wa tɔnli.
Ye ye jogo wi kanŋga,
katugu wagati wì gbɔn ye Yawe Yɛnŋɛlɛ li lagaja,
fɔ li ka sa pan li ye pye lesinmbele.
13 Ɛɛn fɔ yè tipege pye,
a yè kambasinŋge ta tɔnli,
ma yagbogowo tɔnli ta ma li;
katugu yè ye jigi wi taga ye yɛɛra fanŋga ko na,
ma ye jigi wi taga ye maliŋgbɔɔnlɔ pe lɛgɛwɛ po na.
14 Ki kala na, malaga tinmɛ yaa ka yiri wa ye woolo pe sɔgɔwɔ.
Pe yaa kaa malaga sigecara ti jaanri,
paa yɛgɛ ŋga na wunlunaŋa Shalima wìla Bɛti Aribɛli ca ki tɔngɔ malaga gbɔnpilige ki na we.
Ki pilige ŋga pàa nɛɛlɛ pe purugu ma pinlɛ pe piile pe ni we.
15 Betɛli ca kala li yaa ka ŋga taga ye na koyi yɛɛn,
kapege ŋga yè pye ma saa toro ki da wi na ki kala na.
Na laga ki ka kaa paan mbe laga sanga ŋa ni, malaga ki lɛsaga,
ko yaa yala pè kɔ Izirayɛli tara wunlunaŋa wi na makɔ.»