Bibulu Jinmiire ni OZE 12

Yɛnŋɛlɛ làa Zhakɔbu setirige piile
pe jɛrɛgi

1 Efirayimu cɛnlɛ woolo pe yɛn na finlɛlɛ nala mari.

Izirayɛli woolo pe yɛn nala fanla na mari.

Ɛɛn fɔ Zhuda cɛnlɛ woolo poro yɛn na tanri bere mi ŋa Yɛnŋɛlɛ na ni,

pè koro sinmbele mi ŋa Yɛnŋɛlɛ na kpoyi na ni†.

2 Efirayimu cɛnlɛ woolo pe yɛn na pe yɛɛ baro tifɛlɛgɛ ko ni,

yɔnlɔ yirisaga tifɛlɛgɛ† ko pe taga ki na naga puro.

Yagbogolo koro pè koro na finlɛlɛ konaa na lewɛlɛwɛ kapyere piin pilige pyew.

Pè yɔn finliwɛ le Asiri tara fɛnnɛ pe ni.

Pe maa sinmɛ liwoo torogi wa Ezhipiti tara.

3 Yawe Yɛnŋɛlɛ li yɛn na kiti kɔɔn Zhuda tara woolo pe na,

li yaa ka yiri poro Zhakɔbu setirige piile pe kɔrɔgɔ mbe yala pe tangalɔmɔ pi ni.

Li yaa ka pe sara mbe yala pe kapyere ti ni.

4 Sanga ŋa ni Zhakɔbu wìla pye wa wi nɔ lara,

wìla wi nɔsepyɔ lenaŋa ŋa wìla pye wi waan yɛnlɛ wi yigi wi yeŋgbele li na†.

Naa wìla kaa yiri ma lɛ sanga ŋa ni, a wì si ŋgbeli Yɛnŋɛlɛ li ni†.

5 Wìla ŋgbeli mɛrɛgɛ wi ni, ma ya wi ni.

Zhakɔbu wìla gbele ma mɛrɛgɛ wi yɛnri, ma yo wi yinmɛ tirige wi na.

Wìla Yɛnŋɛlɛ li yan wa Betɛli ca.

Pa Yɛnŋɛlɛ làa para wi ni wa ki laga ki na†.

6 Yawe Yɛnŋɛlɛ lo li yɛn Yɛnŋɛlɛ na li yɛn yawa pi ni fuun fɔ;

li mɛgɛ koyi ŋga Yawe Yɛnŋɛlɛ.

7 Ki kala na, ki daga ma sɔngɔrɔ ma pan ma Yɛnŋɛlɛ li kɔrɔgɔ.

Maa tanri kajɛŋgɛ naa kasinŋge konɔ li na.

Mɔɔ jigi wi taga ma Yɛnŋɛlɛ li na.

8 Efirayimu cɛnlɛ woolo pe yɛn paa jawo pyefɛnnɛ yɛn,

mbele pè pe culo wi gbɔn maa piri.

Mbaa nii leele pe go na, ko ki yɛn ma pe ndanla.

9 Efirayimu cɛnlɛ woolo pe yɛn na yuun fɔ:

«Kaselege ko na, wè yarijɛndɛ lɛgɛrɛ ta.

Wè penjagbɔrɔ ta.

Ɛɛn fɔ, ko ki ni fuun ŋga ko yɛn we kɛɛ tunŋgo ko tɔnli.

Pe se ka kajɔɔgɔ ka kpɛ yan laga we sɔgɔwɔ ki pye kapege.»

10 Muwi mi yɛn Yawe Yɛnŋɛlɛ, ye Yɛnŋɛlɛ le,

maga lɛ yè yiri wa Ezhipiti tara.

Mi yaa ti yaa cɛɛn paara yinrɛ ni naa,

paa yɛgɛ ŋga na kìla pye na piin ye shɛrɛgɛ fɛti piliye yi na we†.

11 Mìla para Yɛnŋɛlɛ yɔn sɛnrɛ yofɛnnɛ pe ni,

ma yariyanra lɛgɛrɛ naga pe na.

Mìla yomiyɛgɛlɛ le Yɛnŋɛlɛ yɔn sɛnrɛ yofɛnnɛ pe yɔn, a pè ke wa ye kan.

12 Kì kaa pye Galaadi tara fɛnnɛ pe yɛn mbasinmbele,

ki kala na, pe yaa kɔ wagafe.

Pe yɛn na napɛnɛ woo saraga wa Giligali ca.

Ɛɛn fɔ pe saara wɔsara ti yaa ka jaanri, mbe pye sinndɛɛrɛ gbogolosara

wa kɛɛrɛ ti ni sɔnŋgooro ti sɔgɔwɔ.

13 Zhakɔbu wìla fe ma kari wa Aramu tara,

wo ŋa Izirayɛli, wìla saa tunŋgo pye wa jɛlɛ kala na, maa pɔri.

Jɛlɛ kala na, wìla pye na yaayoro kɔnri mbe ta mboo pɔri†.

14 Yawe Yɛnŋɛlɛ làa Izirayɛli woolo pe yirige wa Ezhipiti tara Yɛnŋɛlɛ yɔn sɛnrɛ yofɔ wo wa fanŋga na.

Yɛnŋɛlɛ yɔn sɛnrɛ yofɔ wo wa fanŋga na làa pye na Izirayɛli woolo pe kɔrɔsi†.

15 Efirayimu cɛnlɛ woolo pè Yawe Yɛnŋɛlɛ li nawa pi ŋgban fɔ jɛŋgɛ.

Ki kala na, legbogo kagala ŋgele pè pye, Yawe Yɛnŋɛlɛ li yaa ti ki go kala li to pe na,

mbe ti tifagawa kapyere nda pè pye ti sɔngɔrɔ pe na.

†12:1 12.1: Ŋga kì yo fɔ: Pè koro sinmbele mi ŋa Yɛnŋɛlɛ na kpoyi na ni, pèle ki kanŋga ma yo fɔ: Pè koro sinmbele mbele pe yɛn kpoyi pe ni; a pèle ki kanŋga naa ma yo fɔ: Zhuda cɛnlɛ woolo pè yiri ma je mi ŋa Yɛnŋɛlɛ na na, konaa ma je mbele pe yɛn kpoyi ma pye sinmbele pe na.

†12:2 12.2: Izirayɛli tara yɔnlɔ yirisaga tifɛlɛgɛ ki yɛn tifɛlɛgɛ ŋga ki ma yaraga ki ni fuun ki waga, ma tara ti kanŋga gbinri, ŋa yaraga woro wa. Laga ki laga ŋga ki ni, yɔnlɔ yirisaga tifɛlɛgɛ ki yɛn ma taanla Asiri tara to ni.

†12:4 12.4: Ŋga kì yo fɔ: Wìla wi nɔsepyɔ lenaŋa ŋa wìla pye wi waan yɛnlɛ wi yigi wi yeŋgbele li na, ko kɔrɔ wo yɛn fɔ wìla cɛn wi go na; Zhenɛ 25.26; 27.35-36.

†12:4 12.4: Zhakɔbu wìla ŋgbeli Yɛnŋɛlɛ li ni laga ŋga na yege wele wa Zhenɛ 32.25-29laga ki ni.

†12:5 12.5: Zhenɛ 28.10-22; 32.24-26

†12:10 12.10: Levi 23.42-43

†12:13 12.13: Zhenɛ 29.1-20

†12:14 12.14: Ɛki 12.50-51