10
Zhuda tara yɛkeele mbele
pe Yɛnŋɛlɛ li naŋgbanwa pi yirige
pe Yɛnŋɛlɛ li naŋgbanwa pi yirige
1 Leele mbele pe ma kondɛgɛŋgɛlɛ mbasinŋgele tɛgɛtɛgɛ,
poro mbele pe ma kakɔnndɛgɛŋgɛlɛ tɛgɛ ma ke yɔnlɔgɔ,
jɔlɔgɔ yɛn pe wogo!
2 Pe ma ko pye ma, jaŋgo mbe mbele pe yɛn tege ni pe tanga ki shɔ pe yeri,
na woolo mbele pe yɛn fyɔnwɔ fɛnnɛ, mbe ŋga ki daga pe ni ki shɔ pe yeri.
Pe ma naŋgunjaala pe pye paa yarijɛndɛ nda pè koli ti yɛn,
mbe pijiriwele pe san mbe pe kɛɛ yaara ti shɔ pe yeri.
3 Na ye kapere ti fɔgɔ tɔnpilige ki ka ka gbɔn, yiŋgi ye yaa ka pye san?
Na jɔlɔgɔ ki ka ka yiri wa lege mbe pan mbe to ye na pilige ŋga ni, yiŋgi ye yaa ka pye san?
Ye yaa ka fe mbe kari ambɔ fɔ kɔrɔgɔ mbe yo wi ye shɔ?
Ye yaa ka ye yarijɛndɛ ti tɛgɛ se yeri?
4 Ye se ka ya mbe kala la yɛgɛ pye, kaawɔ mbe gbɔw wa kasopiile sanmbala pe sɔgɔwɔ,
mbe to tara leele mbele pe yaa gbo pe ni.
Ɛɛn fɔ konaa ki ni fuun, we Fɔ wi naŋgbanwa pi woro na sogo wi na,
wi yɛn maa kɛɛ ki yirige pe na bere.
Jɔlɔgɔ yɛn Asiri tara fɛnnɛ
pe wogo
pe wogo
5 We Fɔ wì yo fɔ: «Jɔlɔgɔ yɛn Asiri tara fɛnnɛ pe wogo,
poro mbele pe yɛn paa na naŋgbanwa kanŋgaga yɛn.
Ŋgbologo ŋga ki yɛn pe kɛɛ,
ko yɛn nala kɔnrɔ tandorogo ki nari.
6 Mi ma pe yirige mbe pe wa cɛnlɛ na li woro na fyɛ mi ŋa Yɛnŋɛlɛ na yɛgɛ li na,
cɛnlɛ na kanla nawa pi ŋgban, mi ma pe yeri mbe pe wa ki cɛnlɛ woolo pe na,
jaŋgo pe sa pe kɛɛ yaara ti koli, pe pe san pe pe yarijɛndɛ ti shɔ pe yeri,
mbe pe tangala paa ca nawa koŋgolo fɛnrɛgɛ yɛn.
7 «Ɛɛn fɔ Asiri tara fɛnnɛ pe sigi jɛn mbe wali ki na ma,
pee jatere pye ki na ma.
Ɛɛn fɔ poro jatere wo yɛn mbaa jɔgɔwɔ piin,
mbe cɛngɛlɛ lɛgɛrɛ tɔngɔ.
8 Katugu pè yo fɔ: ‹Naga yɛn ma, we kundigile pe ni fuun pe woro wunlumbolo wi le?
9 Naga yɛn ma, we sila Kalino ca ki pye paa yɛgɛ ŋga na wàa Karikemishi ca ki pye wi le?
Ma Hamati ca ki pye paa yɛgɛ ŋga na wàa Aripadi ca ki pye wi le,
ma Samari ca ki pye paa yɛgɛ ŋga na wàa Damasi ca ki pye wi le†10.9: Asiri tara fɛnnɛ pàa malaga gbɔn ki cara ti ni, ma ya ti ni.?
10 Kì kaa pye wè ya ma kɛɛ taga wunluwɔ tara nda ti maa yarisunndo gbogo ti na mari shɔ,
ma si yala, ki yarisunndo tì lɛgɛ ma wɛ Zheruzalɛmu ca naa Samari ca woro ti na,
11 kona ŋga wè pye Samari ca naa ki yarisunndo ti na,
naga yɛn ma, we se ya mbege nuŋgba ki pye Zheruzalɛmu ca naa ki yarisunndo yanlɛrɛ ti na wi le?› »
12 Ɛɛn fɔ na we Fɔ wi ka ka wi kapyegele ke pye mbe ke yɔn fili sanga ŋa ni wa Siyɔn yanwiga ki na, konaa wa Zheruzalɛmu ca ki ni, wi yaa yo fɔ: «Mi yaa yiri Asiri tara wunlunaŋa wi kɔrɔgɔ wi yɛɛ gbɔgɔwɔ jatere konaa wi yɛɛ nagawa mba wi maa piin na yɛgɛ tungu pi kala na. 13 Katugu Asiri tara wunlunaŋa wì yo fɔ:
‹Mì ki ni fuun ki pye na yɛɛra fanŋga ki ni,
konaa na yɛɛra kajɛnmɛ pi ni, katugu mì jilige;
mì cɛngɛlɛ sanŋgala ke tara kɔngɔlɔ ke wɔ wa ke yɔngɔlɔ ke ni, ma ka taga na tara ti na,
mì pe yarijɛndɛ ti shɔ pe yeri.
Mì wunlumbolo tirige ma pe laga wa pe jɔnrɔ ti na,
paa lenaŋa kotogofɔ yɛn.
14 Mì leele pe yarijɛndɛ ti shɔ pe yeri na kɛɛ ki ni,
paa yɛgɛ ŋga na lere ma kàa sannjɛsere laga we;
mì tara woolo pe ni fuun pe yarijɛndɛ ti koli pe yeri,
paa yɛgɛ ŋga na lere ma kaa sannjɛlɛ jɛnrɛwɛ koli we.
Yaraga ka kpɛ si kanwiga gbɔn,
nakoma mbe yɔn yɛngɛ, nakoma mbe sɛnpyɔ yo.› »
15 Naga yɛn ma, gbɔnlɔgɔ ki maa ki yɛɛ gbogo ŋa wila kɔɔn ki ni wi na wi le?
Naga yɛn ma, tire kɔnsi wi maa yɛɛ mbɔnrɔ ŋa wila kɔɔn wi ni wi na wi le?
Ki yɛn ndɛɛ kanŋgaga ko ki yɛn na ki yigifɔ wi kɛɛ ki yinrigi,
ki yɛn ndɛɛ ŋgbologo ko ki yɛn na ki yigifɔ wi kɛɛ ki yinrigi.
16 Ki kala na, we Fɔ, Yawe Yɛnŋɛlɛ na yawa pi ni fuun fɔ li yaa cɔgɔrɔ yama wa Asiri tara maliŋgbɔɔnlɔ mbele pe yɛn fanŋga ni pe na;
pe gbɔgɔwɔ kala li yaa ka sogo paa yɛgɛ ŋga na kasɔn ma kaa na yiin ma yaara sogo.
17 Yɛnŋɛlɛ na li yɛn Izirayɛli woolo pe yanwa, li yaa ka pye paa kasɔn yɛn;
Izirayɛli woolo pe Yɛnŋɛlɛ kpoyi li yaa ka pye paa kasɔn yinnɛ yɛn,
na li yaa yantiire naa wuuro pyew ti sogo,
mberi kɔ pilige nuŋgba ki ni.
18 Li yaa ka pe kɔɔrɔ tiyɔnrɔ naa pe tire kɛɛrɛ tiyɔnrɔ ti sogo mberi kɔ pew,
ki yaa ka pye paa yaŋa yɛn, ŋa yama pùu fanŋga ki kɔ.
19 Pe kɔɔrɔ tire nda ti yaa ka koro, ti yaa ka pye jɛgɛlɛ,
fɔ pyɔ jɛɛ mbe ka ya mberi jiri mberi yɔn jɛn.
Izirayɛli woolo mbele
pe yaa ka koro go na pe kala
pe yaa ka koro go na pe kala
20 Ko sanga wo ni, Izirayɛli woolo sanmbala mbele pe yaa ka koro go na, poro Zhakɔbu setirige piile mbele pe yaa ka shɔ mbe koro yinwege na, pe se ka kɛɛ kan mbele paa pe gbɔɔn pe na naa. Ɛɛn fɔ pe yaa ka kɛɛ kan Yawe Yɛnŋɛlɛ, Izirayɛli woolo Yɛnŋɛlɛ kpoyi lo na kaselege ni. 21 Pe sanmbala mbele pe yaa ka koro, pe yaa ka sɔngɔrɔ mbe pan, poro Zhakɔbu setirige piile mbele pe yaa ka koro, pe yaa ka sɔngɔrɔ mbe pan Yɛnŋɛlɛ na fanŋga fɔ li kɔrɔgɔ. 22 E, Izirayɛli woolo, ali na yaga lɛgɛ paa kɔgɔje yɔn taambugɔ ki yɛn, ye jɛnri ye yaa ka sɔngɔrɔ mbe pan. Ye tɔngɔ kala lì kɔn ma tɛgɛ makɔ. Ko yaa ti kasinŋge ki yaa la kee yɛgɛ. 23 We Fɔ, Yawe Yɛnŋɛlɛ na yawa pi ni fuun fɔ, li tɔngɔwɔ kala na kɔn ma tɛgɛ, li yaa li pye mbeli yɔn fili tara ti lagapyew ki ni†10.23: Ɔrɔmu 9.27-28.
Yɛnŋɛlɛ li yaa jɔlɔgɔ wa
Asiri tara fɛnnɛ pe na
Asiri tara fɛnnɛ pe na
24 Ki kala na, we Fɔ, Yawe Yɛnŋɛlɛ na yawa pi ni fuun fɔ, pa lì yo yɛɛn fɔ: «Na woolo, yoro mbele ye yɛn ma cɛn wa Siyɔn ca, yaga kaa fyɛ Asiri tara fɛnnɛ pe yɛgɛ. Pe yɛn na ye gbɔɔn kanŋgaga ni, ma pe ŋgbologo ki yirige ye na paa yɛgɛ ŋga na Ezhipiti tara fɛnnɛ pàa pye naga piin we. 25 Ɛɛn fɔ sanni wagati jɛnri ni, na naŋgbanwa gbɔɔ pi yaa kɔ ye ni, ɛɛn fɔ na kɔnrɔ tandorogo ki yaa pye poro Asiri tara fɛnnɛ poro ni mbe pe tɔngɔ.» 26 Yawe Yɛnŋɛlɛ na yawa pi ni fuun fɔ li yaa yiri pe kɔrɔgɔ sapige ni, paa yɛgɛ ŋga na làa ki pye Madiyan tara fɛnnɛ pe na wa Orɛbu walaga ki tanla we. Li yaa ka li kanŋgala li yirige wa kɔgɔje wi go na, paa yɛgɛ ŋga làa li yirige Ezhipiti tara ti na we†10.26: Kiti 7.25; Ɛki 14.15-28.
27 Ko pilige ko ni, Asiri tara fɛnnɛ pe tugugbɔrɔ nda wa ye pajoro ti na,
ti yaa laga wa ti na;
pe nɛrɛ tunŋgo pyetige ŋga pè taga wa ye yɔlɔgɔ ki na kila yiin ye ni,
ki yaa ka laga wa;
ye yaa ka tugbɔlɔ, fɔ mbege kaari mbege laga wa†10.27: Ŋga kì yo fɔ: Ye yaa ka tugbɔlɔ, fɔ mbege kaari mbege laga wa, ki sɛnrɛ ti woro ma filige Eburuye sɛnrɛ ti ni..
Juguye pè yɔngɔ
Zheruzalɛmu ca ki ni
Zheruzalɛmu ca ki ni
28 Juguye pè gbɔn wa Ayati ca ki na,
pè Migirɔn ca ki kɔn ma yiri,
pè saa pe tuguro ti tɛgɛ wa Mikimashi ca.
29 Ye wele, pe yɛn na tooro wa yanwira ti sɔgɔwɔ kombile li ni.
Pè yo fɔ: «Ye pan we sa wɔnlɔ wa Geba ca!»
Arama ca woolo pe yɛn na seri fyɛrɛ ti kala na;
Gibeya ca woolo, ko ŋga ki yɛn Sawuli ca ye, pe yɛn na fee.
30 Yoro Galimu ca woolo, yaa jɔrɔgi!
Yoro Layisha ca woolo, yaa ye yɛɛ kɔrɔsi!
Yoro Anatɔti ca woolo, jɔlɔgɔ yɛn ye wogo!
31 Madimena ca woolo pè gbɔn ma jaraga,
Gebimu ca woolo pe yɛn na fee na larasaga jaa!
32 Nala yɛrɛ, juguye pe yaa sa yere wa Nɔbu ca;
pe yaa pe kɛɛ ki yirige Siyɔn ca woolo pe yanwiga ki mɛgɛ ni,
ko ŋga ki yɛn Zheruzalɛmu ca tinndi we.
33 Ye wele, we Fɔ, Yawe Yɛnŋɛlɛ na yawa pi ni fuun fɔ,
li yɛn na tige njere ti yaanla fanŋga gbɔgɔ ni;
li yɛn na tire tugbɔɔrɔ ti kɔɔnlɔ,
na tire titɔɔnrɔ tugbɔɔrɔ ti kɔɔnlɔ nari jaanri.
34 Li yɛn na kɔlɔgɔ tire ti kɔɔnlɔ gbɔnlɔgɔ ni nari jaanri,
paa yɛgɛ ŋga na Liban tara sɛdiri tire tiyɔnrɔ ti yɛn na tuunri tara we†10.34: Eza 37.24; Nawu 1.1-4; Sofo 2.13-15.
†10:9 10.9: Asiri tara fɛnnɛ pàa malaga gbɔn ki cara ti ni, ma ya ti ni.
†10:23 10.23: Ɔrɔmu 9.27-28
†10:26 10.26: Kiti 7.25; Ɛki 14.15-28
†10:27 10.27: Ŋga kì yo fɔ: Ye yaa ka tugbɔlɔ, fɔ mbege kaari mbege laga wa, ki sɛnrɛ ti woro ma filige Eburuye sɛnrɛ ti ni.
†10:34 10.34: Eza 37.24; Nawu 1.1-4; Sofo 2.13-15