13
Babilɔni tara ti tɔngɔkala
1 Yɛnŋɛlɛ yɔn sɛnrɛ nda Yɛnŋɛlɛ làa naga Amɔzi pinambyɔ Ezayi wi na Babilɔni tara ti wogo na.
2 We Fɔ wì yo fɔ: «Ye kacɛn yaraga ka yirige wa naayeri yanwiga ka go na, ŋga ki yɛn waga!
Ye ye magala li yirige ye leele pe yeri!
Ye kɛɛ wa pe yeri,
pe pan pe ye wa legbɔɔlɔ pe yeyɔngɔ ki ni.
3 Nambala mbele pè tɛgɛ pe yɛ na kan, mì konɔ kan pe yeri,
mìlan maliŋgbɔɔnlɔ kotogofɛnnɛ pe yeri,
poro mbele mi yaa ti panla naŋgbanwa pi kayaŋga wɔ we;
poro mbele na gbɔgɔwɔ kala li yɛn ma pe ndanla we.»
4 Tinmɛ gbɔɔ pa yɛn na yinrigi wa yanwira ti go na,
paa janwa gbɔlɔ tinmɛ yɛn!
Wunluwɔ tara woolo poro tinmɛ gbɔɔ wi,
cɛngɛlɛ ŋgele kè gbogolo koro tinmɛ gbɔɔ wi!
Yawe Yɛnŋɛlɛ na yawa pi ni fuun fɔ li yɛn nali maliŋgbɔɔnlɔ pe jinri malaga ki mɛgɛ ni.
5 Pe yɛn na paan ma yiri taleere ta ni,
ma yiri fɔ wa dunruya wi kɔsaga ki na.
Yawe Yɛnŋɛlɛ lo naa li naŋgbanwa pi kayaŋga wɔfɛnnɛ pe ni,
pe yaa ka ki tara nda ti ni fuun ti tɔngɔ.
6 Yaa kunwɔ gbelege gbele,
katugu Yawe Yɛnŋɛlɛ li pilige kì yɔngɔ;
ki yɛn na paan, ko ki yɛn yawa pi ni fuun fɔ wi jɔgɔwɔ pyepilige gbɔgɔ ye†13.6: Zhowɛ 1.5.
7 Ki kala na, leele pe ni fuun pe kɛyɛn yì fanla pe na,
lere pyew wi sunndo wila kɔɔn wi na.
8 Fyɛrɛ gbɔrɔ pe yigi,
jɔlɔgɔ naa tege yɛn pe na.
Pe yɛn na nagala jɔlɔgɔ ki kala na paa jɛlɛ selara ma kaa yiri wi ni we.
Pe ni fuun nuŋgba nuŋgba pe yɛn na pe yɛɛ wele lawɔrɔ ni;
pe yɛnlɛ lì yanlaga pe na.
9 Ye wele, Yawe Yɛnŋɛlɛ li pilige ki yɛn na paan,
ki yɛn pilipege, naa kɔnrɔ tandorogo konaa naŋgbanwa gbɔɔ pilige.
Li yaa ka tara ti tɔngɔ ti koro waga,
mbe kapere pyefɛnnɛ pe kɔ mbe pe wɔ wa.
10 Naayeri wɔnŋgɔlɔ koro naa ke wɔnŋgɔlɔ gbogolomɔ pi ni, ke se kaa yanwa yinrigi naa.
Yɔnlɔ ki yaa ka kanŋga diwi ki yirisanga wi ni,
yeŋge ki se ka ki yanwa pi yirige†13.10: Eze 32.7; Mati 24.29; Maki 13.24-25; Luki 21.25; Naga 6.12-13; 8.12.
11 We Fɔ wì yo fɔ: «Mi yaa ka jɔlɔgɔ wa dunruya woolo pe na pe tipewe pi kala na,
mbe lepeele pe jɔlɔ pe kapere ti kala na.
Mi yaa ka mbele pe maa yɛgɛ tungu leele na pe yɛɛ gbɔgɔwɔ pi kɔ,
mbe lewɛlimbɛlɛ pe yɛɛ nagawa pi kɔ.
12 Mbe sɛnwee yan, mi yaa ka ti ki ŋgban mbe wɛ tɛ piiri wi yanga na,
mbe ti sɛnwee piile pe yanga ki ŋgban mbe wɛ Ofiri tara tɛ wi na.»
13 Ki kala na, mi yaa naayeri wi tigile,
mbe tara ti yɛgɛ mberi fɛngɛ wa ti nɔgɔna cɛnyaara ti na.
Mi ŋa Yawe Yɛnŋɛlɛ na yawa pi ni fuun fɔ na naŋgbanwa gbɔɔ pi kala na,
pilige ŋga ni na kɔnrɔ tandorogo ki yaa yiri we.
14 Kona, pe yaa pye paa lufaa yɛn, ŋa pe yɛn na puro,
paa simbaala yɛn, mbele kɔnrifɔ woro pe na mbe pe gbogolo.
Pe ni fuun nuŋgba nuŋgba pe yaa ka sɔngɔrɔ wa pe cɛnlɛ woolo pe yeri,
pe ni fuun nuŋgba nuŋgba pe yaa ka fe mbe kari pe tara.
15 Na paga ka mbele fuun yan, pe yaa ka pe furugu wangala ni;
na paga ka mbele fuun yigi, pe yaa ka poro gbo tokobi ni.
16 Pe yaa ka pe piile tunmɔmbɔlɔ pe wa tara, mbe pe tɔngɔlɔ pe yɛgɛ sɔgɔwɔ;
pe yaa ka pe go nawa yaara ti koli,
mbe pe jɛɛlɛ pe yigi mbe sinlɛ pe ni fanŋga na.
17 Wele, mi yaa Medi tara fɛnnɛ pe sun mbe pe wa Babilɔni tara fɛnnɛ pe na.
Poro woro na warifuwe wi jate,
pee si jori tɛ kala.
18 Pe yaa ka pe lefɔnmbɔlɔ pe wɔn pe wangala ke ni, mbe pe jaanri tara;
piile pe yuŋgbɔgɔrɔ se ka pye pe na,
pe se ka piile tunmɔmbɔlɔ pe yinriwɛ ta.
19 Kona, Babilɔni ca ŋga kìla pye wunluwɔ tara pyew ti ca tiyɔngɔ ye,
ko ŋga kìla pye Babilɔni tara fɛnnɛ pe yɛɛ fereyaraga konaa pe yɛɛ gbɔgɔwɔ pi go ye,
ki yaa pye paa Sodɔmu naa Gomɔri cara nda Yɛnŋɛlɛ làa tɔngɔ ti yɛn†13.19: Zhenɛ 19.24.
20 Lere se ka pye mbe cɛn wa ki ni,
ki yaa ka koro waga sanga pyew fɔ tetete.
Ali mbele pe maa yanri na cɛɛn pe yaayoro ti ni na toro, pe se ka pe paara yinrɛ ti kan wa,
yaayoro kɔnrifɛnnɛ pe se ka cɛn wa pe yaayoro ti ni tila wogo wa.
21 Ɛɛn fɔ yanyaara nda wa gbinri wi ni to ti yaa kaga pye ti sinlɛsaga,
kuwere to ti yaa ka ye wa pe yinrɛ ti ni mberi yin.
Kɔnrɔsogoloye pe yaa kaga pye pe cɛnsaga,
sikapɛnɛ pe yaa kaa yeni mbaa kanni wa†13.21: Naga 18.2.
22 Komboolo poro pe yaa kaa gbele wa pe wunluwɔ yinrɛ ti ni,
dabaala poro pe yaa kaa gbele wa pe yuŋgbɔrɔ ŋgbɔrɔ tiyɔnrɔ ti ni.
Babilɔni ca ki kɔsanga wì gbɔn,
ka se taga wa ki piliye yɔn ki na naa.