1 Sɛnŋgbanra nda tìla yo Mowabu tara ti wogo na.

Ee, Ari ca ŋga wa Mowabu tara kì tɔngɔ yembinɛ nuŋgba li ni!

Ee, Kiri ca ŋga wa Mowabu tara kì tɔngɔ yembinɛ nuŋgba li ni†15.1–16.14: Eza 25.10-12; Zhere 48.1-47; Eze 25.8-11; Amɔ 2.1-3; Sofo 2.8-11!

2 Dibɔn ca woolo pè kari wa pe yarisunŋgo gbɔgɔgo ki ni,

pè kari wa pe sunzara nda wa tinndiye pe na ti na, mbe sa gbele wa.

Mowabu cɛnlɛ woolo pe yɛn na kunwɔ gbelege gbele Nebo ca naa Medeba ca ki kala na.

Pe ni fuun pè pe yinrɛ ti kulu, ma pe siyɔɔlɔ pe kulu.

3 Pè jatere piriwɛn yaripɔrɔ le pe yɛɛ na wa ca nawa koŋgolo ke ni;

pe ni fuun nuŋgba nuŋgba pe yɛn na gbele,

pe yɛn na yɛntunwɔ woo

wa pe biriyinrɛ ti go na konaa wa pe katoro ti ni.

4 Ɛshibɔn ca woolo naa Eleyale ca woolo pe yɛn na jɔrɔgi na sagawa jaa.

Pe jɔrɔgɔmɔ pi yɛn na gbɔɔn fɔ wa Yahazi ca.

Ki kala na, Mowabu cɛnlɛ woolo pe maliŋgbɔɔnlɔ pe yɛn na kɔŋgɔlɔ waa,

pe sunndo wila kɔɔn pe na fɔ jɛŋgɛ.

5 Na nawa pì tanga na na Mowabu cɛnlɛ woolo pe wogo na;

pe woolo mbele pe yɛn na fee malaga ki yɛgɛ, pè saa gbɔn wa Sowari ca,

fɔ ma saa gbɔn wa Egilati Shelishiya ca.

Pe yɛn na gbele na nuru na kee wa Luhiti ca ki yeri;

ma pe ta wa Horonayimu ca konɔ li na paa kee, pe yɛn na kɔŋgɔlɔ waa jɔgɔwɔ mba pì pye pe na pi kala na.

6 Nimirimu ca tɔnmɔ lara tì waga,

yan kì waga,

wasege yan kì kɔ,

yan tipirige woro laga ka kpɛ ni.

7 Ki kala na, pe kɛɛ yaara nda tì koro pe yeri,

konaa tɛgɛwɛ mba fuun pàa ya ma tɛgɛ,

sɔli tire ti yɛn yanwira lafogo ŋga ni, pe yɛn nari koli na kee ti ni wa ki puŋgo na.

8 Katugu gbeere yɛn na yinrigi Mowabu tara ti kɛɛ ki ni fuun ki na,

pe gbelege ki yɛn na gbɔɔn fɔ wa Egilayimu ca ki na,

na gbɔɔn fɔ wa Bɛri Elimu ca ki na.

9 Dimɔ ca lɔrɔ tɔnmɔ pi ni fuun pì kanŋga kasanwa;

ɛɛn fɔ mi yaa ka jɔlɔgɔ kagala kele yɛgɛ taga Dimɔ ca wogolo ke na naa.

Mowabu cɛnlɛ woolo mbele pè shɔ ma koro go na, mbele pè koro wa tara ti ni,

mi yaa ti jara mbe yiri pe kɔrɔgɔ mbe to pe na.