22
Yɛnŋɛlɛ yɔn sɛnrɛ nda tìla yo Zheruzalɛmu ca ki wogo na
1 Sɛnŋgbanra nda tìla yo yariyanra gbunlundɛgɛ ki wogo na.
Zheruzalɛmu ca, ki cɛn mɛlɛ?
Yiŋgi na, a ca woolo pe ni fuun pè si lugu wa biriyinrɛ ti go na?
2 Mboro ca ŋga tinmɛ gbɔɔ maa yinrigi wa ma ni,
ca ŋga ki yɛn ma yin tinmɛ lɛgɛrɛ naa yɔgɔrimɔ ni we.
Ma woolo mbele pè ku, tokobi ma wi pe gbo,
pee pe gbo malaga gbɔnsaga na.
3 Ma maliŋgbɔɔnlɔ teele pe ni fuun pè pinlɛ ma fe,
sandiga wɔnfɛnnɛ pè pe yigi malaga kasopiile.
Pɔ̀ɔn ca woolo mbele fuun pe yan pe yigi malaga kasopiile,
ali mbele pàa fe ma kari lege pè pe yigi malaga kasopiile.
4 Ki kala na, mi yɛn naga yuun ye kan fɔ:
«Ye ye yɛrɛ ti laga na na,
yanla yaga mbe gbele jɛŋgɛ.
Yaga kaa ye yɛɛ tege mbe yo fɔ ye yaa na kotogo ki sogo na na,
na woolo pe tɔngɔwɔ pi kala na.
5 Katugu ki nala pilige ŋga ki yɛn yɛwɛrɛgɛ pilige,
naa jatere piriwɛn pilige konaa lawɔrɔ pilige.»
We Fɔ, Yawe Yɛnŋɛlɛ, Yɛnŋɛlɛ na yawa pi ni fuun fɔ lo lì ko wa we na wa yariyanra gbunlundɛgɛ ki ni.
Pe yɛn na ca ki malaga sigembogo ki jaanri,
jɔlɔgɔ gbeere yɛn na yinrigi wa yanwira kɛɛ yeri na sagawa jaa.
6 Elamu tara maliŋgbɔɔnlɔ pè pe sanŋgbɔye pe lɛ;
maliŋgbɔɔnlɔ yɛn wa pe malaga gbɔnwotoroye pe ni, a pèle lugu shɔnye na.
Kiri ca maliŋgbɔɔnlɔ pè pe tugurɔn sigeyaara ti yirige funwa na.
7 E, Zheruzalɛmu ca fɛnnɛ, ye gbunlundɛrɛ nda tì yɔn ti ni fuun ti na, ti yɛn ma yin malaga gbɔnwotoroye pe ni!
Maliŋgbɔɔnlɔ mbele pe yɛn shɔn lugufɛnnɛ, pè pan ma yere malinjɛ wi na wa ye ca mbogo yeyɔngɔ ki na.
8 Pè Zhuda tara woolo pe go sigeyaara ti shɔ pe yeri.
Ko pilige ko ni, go ŋga pàa pye na yinri Kɔlɔgɔ go pa pe jigi wìla pye ki maliŋgbɔnyaara ti na.
9 Mbogo ŋga ki yɛn ma Davidi ca ki maga, ki jɛɛnri sara lɛgɛrɛ yèri yan;
yàa tɔnmɔ yɛtɛgɛwɛ tɛgɛ ye yɛɛ kan wa nɔgɔna tɔnmɔ wege ki ni.
10 Yàa Zheruzalɛmu ca yinrɛ ti jiri mari yɔn jɛn,
ma yinrɛ ta jaanri ti ni, mbe ta mbe ka taga ca ki malaga sigembogo ki liriwɛn pi na.
11 Yàa tɔnmɔ wege ka wɔ wa mboro shyɛn ti sɔgɔwɔ pi ni, jaŋgo mbe tɔnmɔ wege lɛgɛ ki tɔnmɔ pi tile mboo le wa ki ni.
Ɛɛn fɔ ŋa wi yɛn ki kagala ŋgele ke pyefɔ, ye sila pye na wo wele.
Ŋa wìgi kagala ke gbɛgɛlɛ maga lɛ wa fafafa, ye sila wi jate.
12 Ko pilige ko ni, we Fɔ, Yawe Yɛnŋɛlɛ na yawa pi ni fuun fɔ làa ye yeri,
ma yo fɔ yaa gbele, yaa yuŋgbɔgɔrɔ sɛnrɛ yuun,
ye ye yinrɛ ti kulu, ye jatere piriwɛn yaripɔrɔ le ye yɛɛ na.
13 Ɛɛn fɔ, ye wele, ye yɛn nayinmɛ na, na yɔgɔri!
Ye yɛn na nɛrɛ kuun, na simbaala kɔnlɔgi,
na kara ti kaa, na duvɛn woo.
Ye yɛn na yuun fɔ: «Ye ti waa nii waa woo,
katugu goto we yaa ku†22.13: Pɔli wìla ki sɛnrɛ nda ti yo wa 1 Korɛn 15.32laga ki ni.!»
14 Yawe Yɛnŋɛlɛ na yawa pi ni fuun fɔ lìgi sɛnrɛ nda ti le na nuŋgbolo ma yo fɔ:
«Ki kajɔɔgɔ ŋga ki se kala yaga ye na fɔ ye sa ku.»
We Fɔ, Yawe Yɛnŋɛlɛ na yawa pi ni fuun fɔ lo lì yo ma.
Yɛnŋɛlɛ yɔn sɛnrɛ nda tìla yo
Shebina wi wogo na
Shebina wi wogo na
15 We Fɔ, Yawe Yɛnŋɛlɛ na yawa pi ni fuun fɔ, pa lì yo yɛɛn fɔ: «Yiri ma kari wa Shebina wi yeri, wo ŋa wi yɛn ma cɛn wunluwɔ go ki go na, maga yo wi kan fɔ:
16 ‹Yiŋgi yaraga ki yɛn ma yeri lagamɛ,
ma sege woo wiwiin wi yɛn ma yeri lagamɛ,
fɔ a maa fanga woo ma yɛɛ kan lagamɛ?
Ma yɛn na fanga woo ma yɛɛ kan wa yanwira ti go na,
nɔɔ gboo wi sinlɛsaga ki tɛni wa walaga ki ni mbege tɛgɛ.
17 Wele, mboro ŋa naŋa fanŋga fɔ, Yawe Yɛnŋɛlɛ li yaa ma yigi mbɔɔn kunnu jɛŋgɛ,
mbɔɔn wa fanŋga ni fɔ lege.
18 Li yaa kɔɔn wa maa koŋgi, maa koŋgi paa fuŋgɔrɔgɔ yɛn,
mbe kari tara ta ni, nda ti nawa pì gbɔgɔ.
Pa ma yaa ka sa ku wa, ma malaga gbɔnwotoroye mbele pe yɛn gbɔgɔwɔ ni, pa pe yaa ka koro wa,
mboro ŋa màa fɛrɛ wa ma tafɔ wi go woolo pe na we.
19 Mi yaa kɔɔn purɔ mbɔɔn laga wa ma tunŋgo ki na,
we Fɔ wo wì yo ma, fɔ mi yaa kɔɔn tile mbɔɔn laga wa ma cɛnsaga ki na.
20 Ko pilige ko ni, mi yaa kanla tunmbyee wi yeri,
Hilikiya pinambyɔ Eliyakimu we.
21 Mi yaa kɔɔn legbɔɔlɔ derigbɔgɔ ki le wi kan,
mbɔɔn kurusijara wi pɔ wa wi sɛnnɛ,
mbɔɔn fanŋga ki le wi kɛɛ.
Wi yaa ka pye Zheruzalɛmu ca woolo pe to,
mbe pye Zhuda tara wunluwɔ pi to.
22 Mi yaa ka Davidi wi wunluwɔ go lakile wi le wi kɛɛ.
Wi ka go ŋga yɛngɛ, lere kpɛ se ya mbege tɔn.
Wi ka go ŋga tɔn, lere kpɛ se ya mbege yɛngɛ†22.22: Mati 16.19; Naga 1.18; 3.7.
23 Mi yaa kaa kan mboo yerege wa tara ti na, paa tugumbolo yɛn lashelege ka na;
wi wunluwɔ jɔngɔ ki yaa ka gbɔgɔwɔ ta, mbe mɛgbɔgɔ kan wi to go woolo pe yeri.›
24 «Wi go woolo pe ni fuun pe yaa ka pye mbe yanŋga yanŋga wi na, legbɔɔlɔ mbe pinlɛ lepigile ke ni, paa yɛgɛ ŋga na pe ma kaa yaapire yanŋga tugumbolo na, mbege lɛ wɔjɛŋgɛlɛ ke na mbe saga wa cɔgbɔrɔ ti na.» 25 Yawe Yɛnŋɛlɛ na yawa pi ni fuun fɔ lo lì yo ma fɔ: «Ko pilige ko ni, ki tugumbolo na pàa kan mali yerege lashelege ka na, li yaa ka kɔw mbe wɔ wa. Pe yaa kali kaari mbeli jaanri. Tuguro nda fuun tìla pye ma yanŋga yanŋga li na, ti yaa ka toori mbe jɔgɔ.» Yawe Yɛnŋɛlɛ lo lì yo ma.